ជីវិតកម្សាន្ដ

ពែក មី ចេញមុខសុំឲ្យឈប់បង្កើតរឿងព្រលឹងឧកញ៉ា ឈាង រ័ត្ន

បានផុស

៥ ខែ មុន

នៅ

ថ្ងៃសុក្រ ២០ តុលា ២០២៣

ដោយ

តាមការកត់សម្គាល់ចាប់តាំងពីលោកឧកញ៉ា ឈៀង រ័ត្ន បានចែកឋាន ក្រៅតែការវែកញែកបញ្ហាមួយចំនួនពាក់ព័ន្ធគ្រួសារ និងការចង-ក សម្លាប់ខ្លួនក៏កើតមានរឿងរ៉ាវផ្សេងៗដូចជា,ព្រលឹងឧកញ៉ាឈាង រ័ត្ន ទៅពន្យល់សប្តិបុគ្គលមួយចំនួន និងមានបុគ្គលខ្លះទៀតតាំងខ្លួនជាគ្រូ ហើយលើកឡើងថា ព្រលឹងឧកញ៉ា ឈាង រ័ត្ន ចូលរូប (សណ្ឋិត) ដើម្បីប្រាប់រឿងរ៉ាវគ្រួសារ និងមូលហេតុនៃការស្លាប់ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញរឿងហេតុនេះ បានធ្វើឲ្យមានមតិវែកញែកជាថ្មីដោយសារតែមកទល់ពេលនេះ នៅតែបន្តកើតមាន ឡើងជាបន្តបន្ទាប់មិនទាន់ជ្រះស្រឡះនៅឡើយ។ ងាកមកតារាកំប្លែងនាយ ពែក មី មិនត្រឹមតែបង្ហាញការហួសចិត្តប៉ុណ្ណោះទេ លោកថែមទាំងអង្វរដោយទទូចឲ្យបញ្ឈប់រាល់ទង្វើរដែលបង្កើតរឿងដែរថា ព្រលឹងឧកញ៉ា ឈាង រ័ត្ន ចូលរូប ឬពន្យល់សប្ដដែលនាំឲ្យប៉ះពាល់ដល់អារម្មណ៍ក្រុមគ្រួសារ។

នាយ ពែក មី បានលើកឡើងថា «ព្រលឹងមេ ឈាង រ័ត្ន ទៅចូលគ្រូមន្តអាគមជាច្រើនតើបងប្អូនជឿទេ? តែសម្រាប់ខ្ញុំ គឺសុំមិនជឿហើយ បើបងប្អូនណាជឿក៏ជឿទៅខ្ញុំដូចជាឆ្ងល់នៅពេលបើកហ្វេសប៊ុកឃើញតែគ្រូនេះ គ្រូនោះនិយាយថាព្រលឹងមេ ឈាង រ័ត្ន ទៅពន្យល់សប្តបែបនេះ បែបនោះ ហើយក៏សម្បូរម្លេះគ្រូៗ ឥឡូវក៏ចេញមុខច្រើនម្ល៉េះ ចុះហេតុអ្វីព្រលឹង ខ្មោចជាច្រើនទៀតមិនទៅពន្យល់សប្ដផង ម្តេចទៅតែព្រលឹងខ្មោចអ្នកល្បីអញ្ចឹង»។

នាយ ពែក មី បានបន្តថា មានគ្រូខ្លះមិនត្រឹមតែថាព្រលឹងទៅពន្យល់សប្តទេ ថែមទាំងចេញមកនិយាយពន្យល់ហេតុផលបែបនេះ បែបនោះទៀតផង ចេញមកធ្វើឲ្យគេក្ដៅក្រហាយនឹងបានធ្វើប៉ះពាល់ដល់អ្នកស្លាប់ទៅហើយ ព្រមទាំងអ្នកនៅរស់ផងដែរ។

លោកបន្ថែមថា «ខ្ញុំសូមអង្វរគ្រូៗទាំងឡាយ ឈប់ទៅព្រោះថា ហេតុអ្វីបាននាំគ្នាលើកនិយាយតែរឿងបែបហ្នឹង ឬពន្យល់សប្តតែព្រលឹងអ្នកល្បី ចុះព្រលឹងអ្នកអត់ល្បីទៅណាអស់ហើយ»។

យ៉ាងណានាយ ពែក មី ក៏មិនបានហាមឃាត់អ្នកដែល ជឿនោះដែរដោយលោកចាត់ទុកថាជាសិទ្ធសេរីភាពបុគ្គលរៀងៗខ្លួន ប៉ុន្តែចំពោះលោកគឺមិនជឿទេហើយថែមទាំងធុញទៀតផង៕

អត្ថបទ៖ ចាន់រ៉ា