ផលិតករខ្មែរពីររូប អរគុណរាជរដ្ឋាភិបាលអនុគ្រោះព្យួរទុកកាតព្វកិច្ចបង់ពន្ធរយៈពេល៥ឆ្នាំ

ផលិតករភាពយន្តខ្មែរបានបង្ហាញក្តីរំភើបខ្លាំង បន្ទាប់ពីរាជរដ្ឋាភិបាលដែលនៅបន្តជួយដល់វិស័យភាពយន្តនៅកម្ពុជា ក្នុងការអនុគ្រោះព្យួរទុកកាតព្វកិច្ចបង់ពន្ធ ជូនដល់ផលិតករភាពយន្តក្នុងស្រុក ត្រូវបានពន្យាររយៈពេល៥ឆ្នាំទៀត(២០២៤-២០២៨)។

បន្ទាប់ពីទទួលដំណឹងដ៏រំភើបនេះ លោក ហ៊ុយ យ៉ាឡេង ដែលជាផលិតករភាពល្បីឈ្មោះបានបង្ហាញអារម្មណ៍សប្បាយរីករាយនិងអរគុណដល់រាជរដ្ឋាភិបាលកម្ពុជា ដែលបានយកចិត្តទុកដាក់ជួយដល់ផលិតករក្នុងស្រុក។ លោកថ្លែងបញ្ជាក់ថា នេះជាដំណឹងដ៏សែនរីករាយមុនពិធីបុណ្យអុំទូក លោកសូមអរគុណដល់រាជរដ្ឋាភិបាលដែលនៅបន្តជួយដល់វិស័យភាពយន្តនៅកម្ពុជាក្នុងការអនុគ្រោះព្យួរទុកកាតព្វកិច្ចបង់ពន្ធជូនដល់ផលិតករភាពយន្តជាតិ។

ចំណែកផលិតករភាពយន្ត លោក លៀក លីដា បានលើកឡើងដែរថា“ក្នុងនាមខ្ញុំជាផលិតករក៏ដូចជាប្រធានសមាគមផលិតករភាពយន្តកម្ពុជា គឺសូមថ្លែងអំណរគុណយ៉ាងជ្រាលជ្រៅជូនចំពោះសម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តល់ការអនុគ្រោះព្យួទុកកាតព្វកិច្ចបង់ពន្ធរយ:ពេល០៥ឆ្នាំ (២០២៤-២០២៨)ជូនផលិតករភាពយន្តក្នុងស្រុក”។ 

លោកបន្តថា ការផ្តល់ការអនុគ្រោះនេះគឺជាការយកចិត្តទុកដាក់ពីសំណាក់រារដ្ឋាភិបាលព្រមទាំងជាការរួមចំណែកយ៉ាងសំខាន់ក្នុងការគាំទ្រ និងលើកទឹកចិត្តជូនផលិតករភាពយន្តក្នុងស្រុក ដើម្បីបន្តសកម្មភាពផលិតភាពយន្តប្រកបដោយគុណភាពគុណតម្លៃ សម្រាប់បម្រើអារម្មណ៍ប្រជាពលរដ្ឋផងនិងរួមចំណែកផ្សព្វផ្សាយពីវប្បធម៌ជាតិផង។

លោក លៀក លីដា បញ្ជាក់បន្ថែមថា ការផ្តល់ការអនុគ្រោះព្យួទុកកាតព្វកិច្ចបង់ជូនផលិតករភាពយន្តក្នុងស្រុកនេះ គឺធ្វើឡើងតាមរយៈសំណើសុំកិច្ចអន្តរាគមន៍របស់ក្រសួងវប្បធម៌ និងវិចិត្រសិល្ប:ដោយយោងតាមកាស្នើរបស់សមាគមផលិតករភាពយន្តកម្ពុជា។ អរគុណលោកប្រធាន Pok Borak ដែលបានយកចិត្តទុកដាក់យ៉ាងខ្លាំងលើគ្រប់គ្រងបញ្ហារបស់ផលិតករទាំងអស់៕

អត្ថបទ៖ ចាន់រ៉ា