ផ្លូវការ! Jennie ប្រកាសឈ្មោះក្រុមហ៊ុនផ្ទាល់ខ្លួន ក្នុងនាមជាស្ថាបនិក

Jennie សមាជិកក្រុម BLACKPINK បានបញ្ជាក់ជាផ្លូវការថា នាងបានបង្កើតស្លាកយីហោផ្ទាល់ខ្លួន ដែលមានឈ្មោះថា ODDATELIER សម្រាប់សកម្មភាពផ្ទាល់ខ្លួនរបស់នាងតែប៉ុណ្ណោះ។

នៅថ្ងៃទី ២៤ ខែធ្នូនេះ (ម៉ោងនៅកូរ៉េ KST) សមាជិកក្រុម BLACKPINK បានបង្ហាញនៅលើគណនី Instagram ផ្ទាល់ខ្លួនរបស់នាងថា ចាប់ពីឆ្នាំ ២០២៤ ការប្រឹងប្រែងទោលរបស់នាងនឹងត្រូវបានអនុវត្តតាមរយៈក្រុមហ៊ុន ODDATELIER (OA) ដែលជាក្រុមហ៊ុនដែលនាងបង្កើតឡើងដើម្បីបណ្តាក់ទុកក្នុងសកម្មភាពទោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈគណនីផ្ទាល់ខ្លួន Jennie បានបញ្ចាក់យ៉ាងច្បាស់ការថា៖

សួស្តី នេះជា Jennie “ឆ្នាំនេះពោរពេញទៅដោយសមិទ្ធផលជាច្រើន ហើយខ្ញុំពិតជាអរគុណខ្លាំងណាស់សម្រាប់ក្តីស្រលាញ់ដែលខ្ញុំទទួលបាន។ ខ្ញុំក៏រំភើបផងដែរចំពោះអ្វីដែលនឹងមកដល់ នៅពេលខ្ញុំចាប់ផ្តើមដំណើរទោលរបស់ខ្ញុំនៅឆ្នាំ២០២៤ ជាមួយក្រុមហ៊ុនដែលខ្ញុំបានបង្កើតឡើងហៅថា OA។ សូមបង្ហាញក្តីស្រលាញ់ជាច្រើនសម្រាប់ការចាប់ផ្តើមថ្មីរបស់ខ្ញុំជាមួយ OA ហើយជាការពិតណាស់ BLACKPINK នឹងនៅតែបន្តទៅមុខដដែល។ សូមអរគុណ!”

សូមបញ្ចាក់ដែរថា ODDATELIER ត្រូវបានសហស្ថាបនិកដោយ Jennie និងម្តាយរបស់នាងនៅក្នុងខែវិច្ឆិកាឆ្នាំនេះ ប៉ុន្តែបច្ចុប្បន្នមិនមានសិល្បករផ្សេងទៀតដែលពាក់ព័ន្ធជាមួយស្លាកសញ្ញានេះទេ ហើយគេហទំព័រផ្លូវការបានបន្តគាំងដោយសារតែមានចរាចរណ៍ខ្ពស់ជុំវិញព័ត៌មានដែលគួរឲ្យរំភើបរបស់នាង ព្រមទាំងជាអំណោយដល់អ្នកគាំទ្រទូទាំងពិភពលោកផងដែរ។

ទោះយ៉ាងណាក៏ដោយ កាលពីប៉ុន្មានសប្ដាហ៍មុន Jennie រួមជាមួយនឹងសមាជិក BLACKPINK ផ្សេងទៀតបានចុះកិច្ចសន្យាផ្តាច់មុខជាមួយផលិតកម្មយក្ស YG Entertainment សម្រាប់សកម្មភាពក្រុមប៉ុណ្ណោះ។ ស្របពេលដែល នាងទើបប្រកាសក្ដៅៗថា បានបង្កើតស្លាកសញ្ញាផ្ទាល់ខ្លួន ក្នុងនោះសមាជិកក្រុម BLACKPINK នឹងចូលរួមក្នុងសកម្មភាពក្រោមវិធីសាស្រ្តដាច់ដោយឡែក ប៉ុន្តែពួកនាងនៅតែរួមគ្នាដដែលទេ ៕

អត្ថបទ៖ សាង ស្រីល័ក្ខ