ជីវិតកម្សាន្ដ

ជិតចូលឆ្នាំថ្មី ! ខាត់ សុឃីម ដាស់តឿនត្រូវស្រលាញ់សងគុណម្តាយ-ឪពុកឲ្យបានច្រើន ទាន់មានឱកាស

បានផុស

២ years មុន

នៅ

ថ្ងៃអង្គារ ២ មេសា ២០២៤

ដោយ

តារាស្រីពហុជំនាញអ្នកនាង ខាត់ សុឃីម បានចេញសារថ្មីមួយ ដើម្បីធ្វើការដាស់តឿនដល់យុវជនខ្មែរគ្រប់ៗ រូប ត្រូវមានភាពកតញ្ញូ ស្រលាញ់ ដឹងគុណ ចំពោះឪពុក-ម្តាយ ឲ្យបានច្រើន ខណៈឱកាស នៃពិធីបុណ្យចូលឆ្នាំថ្មី ប្រពៃណីជាតិខ្មែរ ឈានជិតចូលមកដល់នាពេលឆាប់ៗ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាចម្រៀងល្បីឈ្មោះអ្នកនាង ខាត់ សុឃីម បាននិយាយចេញពីអារម្មណ៍ពិតផ្ទាល់ខ្លួនថា «ទឹកចិត្តអ្នកម្ដាយមិនអាចកាត់ថ្លៃបានទេ..ម្ដាយឯណាចង់ឲ្យកូនឈឺ ចង់ឲ្យកូនយំ គឺគ្មាននោះទេ ដូច្នេះចូរស្រលាញ់អ្នកម្ដាយរបស់ខ្លួនឲ្យច្រើនៗ ទាន់នៅមានឱកាស»។ អ្នកនាង ថា «មានលុយជូនលុយ មានពេលនាំគាត់ដើរលេងទិញម្ហូបឆ្ងាញ់ៗ ជូនគាត់ កុំចាំដល់គាត់ស្លាប់បាត់ ចាំសែនម្ហូបឲ្យគាត់ គឺគាត់មិនបានទទួលទេ»។

ជាមួយគ្នានេះ អ្នកនាង ខាត់ សុឃីម ក៏បានលើកឡើងពីការដឹងគុណដល់ឪពុក-ម្តាយរបស់ខ្លួនឯងផងដែរ ដោយ អ្នកនាង បានថ្លែងពីទឹកចិត្តថា «មួយជាតិនេះ កូនសងគុណម៉ែពុកមិនអស់ទេ កូនសុំទោសរាល់កំហុសគ្រប់យ៉ាងដែលកូនសាងដោយអចេតនាលើម៉ែ-ពុក….»។ បន្ថែមពីនេះ តាមរយៈកិច្ចសម្ភាសន៍ តារាស្រីពហុជំនាញរូបនេះ បានបញ្ជាក់ថា «ទឹកចិត្តម្តាយពេលខ្លះយើងមើលឃើញធម្មតាៗ ប្រហែលគិតថា ពួកគាត់ស្រលាញ់កូនមិនស្មើគ្នាទេ»។

ខាត់ សុឃីម បន្តទៀតថា តាមពិតទៅ ទឹកចិត្តម្តាយគ្រប់រូប ទោះបីជាមើលឃើញកូនអាក្រក់កម្រិតណាក៏គាត់នៅតែស្រលាញ់កូនដូចគ្នា។ គ្រាន់តែថា ម្តាយខ្លះគាត់បញ្ចេញឲ្យដឹង ឯខ្លះទៀតគាត់មិនឲ្យយើងដឹងឡើយ ពិសេសអ្នកដែលមានកូនច្រើន តួយ៉ាងដូចឪពុកម្តាយអ្នកនាងតែម្ដង។ អ្នកនាង ខាត់ សុឃីម ក៏បានលើកឧទាហរណ៍ជាក់ស្ដែងដូចជាអ្នកនាងផ្ទាល់ គឺទឹកចិត្តម្តាយស្រលាញ់កូនស្មើគ្នា មិនថាប្រុស ឬស្រីទេ។

យ៉ាងណាមិញ ខាត់ សុឃីម បានបញ្ជាក់បន្ថែមថា សូមកូនៗទាំងអស់ ត្រូវស្រលាញ់ឪពុក-ម្តាយឲ្យបានច្រើន ហើយបើនឹកគាត់ពេលណា ត្រូវទៅលេងគាត់ឲ្យបានញឹកញាប់ និងផ្តល់ការយកចិត្តទុកដាក់ដល់ពួកគាត់ កុំចាំដល់ពេលបាត់បង់ពួកគាត់ទើបស្តាយក្រោយ៕

អត្ថបទ ៖ ចាន់រ៉ា