Suga ជាសមាជិក BTS ដំបូងស្ថិតក្រោមការស៊ើបអង្កេត ហើយអាចនឹងចាកចេញពីក្រុមដូចករណី T.O.P

ការចាប់អារម្មណ៍ពីមហាជនជាច្រើនកំពុងកើនឡើងយ៉ាងគគ្រឹកគគ្រេងពាក់ព័ន្ធនឹងរឿងក្ដីរបស់ Suga ដែលមានឈ្មោះពិតថា Min Yoon Gi នាពេលនេះបានទស្សនទាយថា រូបគេនឹងក្លាយជាសមាជិក BTS ដំបូងដែលបង្ហាញមុខក្នុងក្រុមប៉ូលិស បន្ទាប់ពីថ្មីៗនេះលោកបានបង្កគ្រោះថ្នាក់ចរាចរណ៍​​ ក្រោមឥទ្ធិពលស្រវឹងជោគជាំ។

ស្ថានីយ៍ប៉ូលិស Yongsan ក្នុងទីក្រុងសេអ៊ូល បានប្រកាសកាលពីថ្ងៃអាទិត្យថា ពួកគេគ្រោងនឹងកោះហៅ Suga មកសាកសួរក្នុងពេលឆាប់ៗនេះ។ ការស៊ើបអង្កេតកំពុងត្រូវបានសម្របសម្រួលជាមួយភ្នាក់ងារ Big Hit Music និងរដ្ឋបាលកម្លាំងទាហាន ព្រោះថា Suga បច្ចុប្បន្នកំពុងបំពេញកាតព្វកិច្ចយោធាជាភ្នាក់ងារសេវាកម្មសង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាប្រុសវ័យ៣១ឆ្នាំ ត្រូវ​បាន​គេ​ប្រទះ​ឃើញ​ដេក​នៅ​នឹង​ដី បន្ទាប់​ពី​ធ្លាក់​ពី​ម៉ូតូស្កូតឺឬ​ Electric Scooter​ នៅ​ក្នុង​តំបន់ Yongsan កាល​ពី​សប្តាហ៍​មុន។ ប៉ូលិស​ដែល​ឆ្លើយ​តប​បាន​រក​ឃើញថា គាត់មាន​ក្លិន​ជាតិ​អាល់កុលលើខ្លួន ទើបសម្រេចនាំ​ទៅ​កន្លែង​ក្បែរ​ដើម្បីពិនិត្យមើល។ នៅពេលនោះ កំហាប់ជាតិអាល់កុលក្នុងឈាម (BAC)មានដល់ទៅ ០.២២៧% លើសពីដែនកំណត់ផ្លូវច្បាប់ ០.០៨% សម្រាប់ការព្យួរអាជ្ញាប័ណ្ណ ព្រមទាំងផាកពិន័យ និងការដកហូតប័ណ្ណបើកបររបស់គាត់។

ទោះបីជាយ៉ាងណាក៏ដោយ ដោយសារតែកម្រិតនៃការស្រវឹង ប៉ូលិសបានសម្រេចចិត្តដំបូងមិនសាកសួរលើសមាជិក BTS​ ទេ ហើយអនុញ្ញាតឲ្យត្រឡប់ទៅផ្ទះវិញ។ ប៉ុន្តែការស៊ើបអង្កេតបន្ថែមត្រូវបានគ្រោងទុក ដោយផ្តោតលើបរិមាណនៃការប្រើប្រាស់គ្រឿងស្រវឹង និងប្រភេទយានយន្តដែលពាក់ព័ន្ធ។

ដំបូងឡើយ Suga និង Big Hit Music បានបញ្ចាក់ថា វាគ្រាន់តែជាយានជំនិះអគ្គិសនីធម្មតា ប៉ុន្តែក្រោយមកប៉ូលិសបានបំភ្លឺវិញថា វាពិតជាម៉ូតូស្កូតឺមែន។ ភាព​ខុស​គ្នា​នេះ​នាំ​ឲ្យមាន​ការ​សង្ស័យ​ថា ​ឧបទ្ទវហេតុ​នេះ​អាច​នឹង​ត្រូវ​បាន​គេ​ទម្លាក់​ចោល។ ជាការឆ្លើយតប ខាងផលិតកម្មបាននិយាយថា «យើងជឿថាយានជំនិះដែលតារាប្រុសយើងប្រើប្រាស់គឺជាប្រភេទម៉ូតូស្កូតឺរដែលមានកៅអី ដូច្នេះហើយបានជាយើងហៅវាថាជាម៉ូតូអេឡិចត្រិច។ យើងមិនមានចេតនាកាត់បន្ថយស្ថានការណ៍ឬលុបបំបាត់ភត្តុងតាងនោះទេ​ »។

ទន្ទឹមនោះទៀតសោត នៅពេលដែលស្ថានភាពនេះកើតឡើងភ្លាមៗ ទស្សនិកជនក្នុងប្រទេសកូរ៉េជាច្រើន ហាក់ចង់ដឹងប​ន្ថែមទៀតថា តើ Suga បច្ចុប្បន្នកំពុងបម្រើការងារជាបុគ្គលិកសង្គម អាចនឹងក្លាយជាសមាជិក BTS ដំបូងគេដែលបង្ហាញខ្លួនក្នុងក្រុមប៉ូលិស​ ដូចករណីរបស់ T.O.P អតីតសមាជិកក្រុម Big Bang ពីមុនដែរទេ?

ទាក់ទិននឹងរឿងរ៉ាវស្រដៀងគ្នានេះដែរ T.O.P អតីសមាជិក Big Bang គឺជាតារាតែម្នាក់គត់ដែលគេដឹងថា បានស្ថិតក្រោមការស៊ើបអង្កេតរបស់ប៉ូលិសស ពេលកំពុងបម្រើយោធា។ ក្នុងឆ្នាំ២០១៧ T.O.P ប្រឈមមុខនឹងការចោទប្រកាន់ពីបទគ្រឿងញៀន ខណៈពេលដែលបម្រើការជាមន្ត្រីប៉ូលិសជាប់កចិ្ចសន្យា។ គាត់បានបង្ហាញខ្លួននៅក្នុងក្រុមមួយ មុនពេលការកាត់ក្តី​ហើយបានសុំទោសជាសាធារណៈថា “ស្ថានភាពផ្លូវចិត្តបានរំខានដល់ខ្ញុំ និងគំនិតខុសឆ្គងបាននាំឲ្យមានកំហុសធ្ងន់ធ្ងរ ពិតជាសុំទោសទៅកាន់គ្រប់គ្នា” ។

យ៉ាងណា ក្រោយ​ពេល​កើតហេតុ មុខ​តំណែង​របស់​លោក​ត្រូវ​បាន​ដក​ហូត ហើយ​​ត្រូវ​បាន​គេ​ចាត់​ទុក​ថា ​មិន​ស័ក្តិសម​ក្នុង​ការ​ចូល​បម្រើ​ការងារ​ជា​មន្ត្រី​យោធា​វិញ​ទេ ដោយ​លោក​បាន​បំពេញ​កាតព្វកិច្ច​យោធា​ជា​បុគ្គលិក​សង្គមកិច្ច​ជំនួស​វិញ។ ប្រឈមមុខនឹងការរិះគន់ជាបន្តបន្ទាប់ T.O.P ស្រាប់តែប្រកាសចាកចេញពីក្រុមតែម្ដង៕

អត្ថបទ៖ សាង ស្រីល័ក្ខ

ចុចអាន៖មិនមែនតែ Suga ទេ ដែលផឹកស្រវឹងជួបគ្រោះថ្នាក់ តារាប្រុស១៦ដួងនេះ ត្រូវពិន័យនិងជាប់ពន្ធនាគារ