ព័ត៌មានអន្ដរជាតិ

រលំអាងទឹក សង្កត់ក្មេងប្រុស ១៣ឆ្នាំម្នាក់ស្លាប់ និងរបួស២ ក្នុងថ្ងៃអបអរជើងឯក World Cup នៅអេស្ប៉ាញ

បានផុស

៣ នាទី មុន

នៅ

ថ្ងៃចន្ទ ២០ កក្កដា ២០២៦

ដោយ

ក្មេងប្រុសអាយុ ១៣ឆ្នាំម្នាក់បានបាត់បង់ជីវិត បន្ទាប់ពីអាងបាញ់ទឹកមួយបានដួលរលំសង្កត់ អំឡុងពេលរៀបចំពិធីដ៏ធំទទួលស្វាគមន៍ អបអរលើជ័យជំនះរបស់ក្រុមអេស្ប៉ាញកាលពីយប់មិញ។ ហេតុការណ៍នេះ បង្កឱ្យមនុស្ស ២នាក់ផ្សេងទៀតរងរបួស ត្រូវបានកើតឡើងបន្ទាប់ពីម៉ោង ១២:៣០ ព្រឹក នៅក្នុងទីក្រុង Ciudad Rodrigo ប្រទេសអេស្ប៉ាញជិតព្រំដែនប្រទេសព័រទុយហ្គាល់។ នេះបើយោងតាមការចុះផ្សាយរបស់សារព័ត៌មាន Express.Uk នៅថ្ងៃទី២០ ខែកក្កដា ឆ្នាំ២០២៦ ។

ក្រុមគាំទ្រអេស្ប៉ាញ រៀបចំពីធីអបអរដល់ជ័យជំនះជើងឯកពិភពលោក។ រូបភាព៖ AP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្មេងជំទង់រូបនោះ ស្ថិតនៅកន្លែងអាងបាញ់ទឹកជាមួយអ្នកគាំទ្រវ័យក្មេងដទៃទៀត ពេលផ្នែកខាងលើបានដួលរលំមកលើពួកគេ។ ប៉ូលិសអាចជួយសង្គ្រោះក្មេងម្នាក់នោះ ដោយយកកម្ទេចកម្ទីចេញ ហើយបញ្ជូនទៅកាន់មន្ទីរពេទ្យជាបន្ទាន់ តែពេលទៅដល់មន្ទីពេទ្យក៏ទទួលដំណឹងថា ស្លាប់បាត់ទៅហើយ។

ក្រុមប្រឹក្សាមូលដ្ឋានបានប្រកាសកាន់ទុក្ខរយៈពេលបីថ្ងៃ ដោយបន្ថែមថា៖ « ក្រុមប្រឹក្សាក្រុង Ciudad Rodrigo សូមសម្តែងការសោកស្ដាយ និងចូលរួមរំលែកទុក្ខ ចំពោះការស្លាប់របស់កុមារអាយុ ១៣ឆ្នាំម្នាក់។ ទីក្រុង Ciudad Rodrigo ទាំងមូល សូមចូលរួមរំលែកទុក្ខជាមួយក្រុមគ្រួសារ និងមិត្តភក្តិរបស់កុមារក្នុងទុក្ខសោករបស់ពួកគេ។ ការអបអរសាទរជ័យជម្នះរបស់ក្រុមបាល់ទាត់ជម្រើសជាតិអេស្ប៉ាញក្នុងព្រឹត្តិការណ៍ World Cup បានប្រែក្លាយទៅជាសោកនាដកម្មសម្រាប់សហគមន៍ទាំងមូលនៃទីក្រុង Ciudad Rodrigo »។

ក្រុមប្រឹក្សាក្រុងក៏ជូនពរឱ្យប្រជាជនដទៃទៀត ដែលរងផលប៉ះពាល់ដោយឧប្បត្តិហេតុនេះឆាប់ជាសះស្បើយ។ ជាសញ្ញានៃការកាន់ទុក្ខ ចំពោះការបាត់បង់នេះ ទង់ជាតិរបស់ក្រុមប្រឹក្សាក្រុងនឹងបង្ហូតពាក់កណ្តាលដងចាប់ពីថ្ងៃទី២០ ខែកក្កដា ដល់ថ្ងៃទី២២ ខែកក្កដា ឆ្នាំ២០២៦ ៕

Related Topics:អេស្ប៉ាញ