Zhao Lusi បង្ហោះរូបឪពុក កម្ចាត់​​ពាក្យ​ចចាមអារ៉ាមវះកាត់កែមុខ​

តារាសម្ដែងស្រីកំពុងពេញនិយម Zhao Lusi នាពេលថ្មីៗនេះតែងតែលេចឮនូវពាក្យ​ចចាមអារ៉ាម​ថា​មិនឈប់ឈរទាក់ទិនឹងសម្រស់ផូរផង់របស់នាង។ យ៉ាងណា នាងស្រាប់តែបង្ហាញ​រូបភាព​ឪពុកបង្កើតលើបណ្ដាញអ៉ិនធើណេតក្នុងន័យកម្ចាត់​ពាក្យ​ចចាមអារ៉ាម​ថា តារាស្រីត្រកូល Zhao មិនបានកែមុខកែមាត់ដូចគេចោទឡើយ។

រូបថតឪពុកបង្កើតរបស់ Zhao Lusi ត្រូវបានចែករំលែកនៅពេលដែលនាងកាលនៅក្មេង ដែលបង្ហាញពីភាពសង្ហារបស់គាត់អាចក្លាយជាតារាសម្តែងបាន។ ជាពិសេសគេសង្កេតឃើញថា ឪពុកតារាស្រីរូបនេះមាន​ច្រមុះ​ខ្ពស់ទម្រង់មុខស្រួច ដូច្នេះមិនមែនជារឿងចម្លែកទេដែលតារាចិនមានសម្រស់ស្អាតកាត់តាមឪពុកនាង។

ដ្បិតថាយ៉ាងនេះក្ដី នាពេលកន្លងមកអ្នកតារា​សម្ដែង​ចិនវ័យ ២៥ឆ្នាំរូបនេះ តែងតែត្រូវ​បាន​គេ​ដាក់​ការ​សង្ស័យ​ជា​ប្រចាំ ជាពិសេសសម្រស់លេចធ្លោស្អាតប្លែកឲ្យតែពេលនាងបង្ហាញខ្លួនជាសាធារណៈម្ដងៗ។ គេតែងតែសង្កេតមើលមុខដែលមើលទៅស្ដើង ត្របកភ្នែកពីរជាន់ និងច្រមុះស្រួចស្អាតរបស់នាងថាអាចឆ្លងកាត់មុខកំបិត។​ មិនត្រឹមតែប៉ុណ្ណឹងនោះទេ ​អ្នករិះគន់មួយចំនួនបានប្រើពាក្យអាក្រក់ដោយសម្ដៅមកលើនាងថា ការវះកាត់កែសម្ផស្សបានប្រែក្លាយតារាឆ្នើមរូបនេះទៅជាបិសាចពស់​ ហើយក៏ធ្វើឲ្យនាងរឹងដូចមនុស្សក្រមួន។

ក្រោយមក អ្នកគ្រប់គ្រងរបស់នាងក៏បានបកស្រាយយ៉ាងលម្អិត ថារាល់អ្វីដែលទស្សនិកជនឃើញគឺជាលទ្ធផលនៃការសម្រកទម្ងន់ ហើយសម្រស់ដែល Zhao Lusi បានបង្ហាញនោះទៀតសោតគឺបានមកពីការតុបតែងមុខនិងការរៀបចំខ្លួនរបស់នាងតែប៉ុណ្ណោះ។

យ៉ាងណាមិញ តាមរយៈការបង្ហោះរូបភាពឪពុក ត្រឹមមួយភ្លេតប៉ុណ្ណោះ នាងហាក់ទទួលបានការលើកទឹកចិត្តពីសំណាក់អ្នកគាំទ្រជាច្រើន។ ម្នាក់ៗបានលើកសរសើរតួស្រីរូបនេះថាតាមពិតទៅនាងមានរូបសម្រស់ស្អាតពីធម្មជាតិសោះ គ្រាន់តែកាលចូលសិល្បៈដំបូងៗធ្វើឲ្យនាងមានសាច់ទ្រលុកទ្រលន់ និងមុខមូល។ ប៉ុន្តែតាមរយៈរបបអាហារល្អ និងជំនាញផាត់មុខទើបធ្វើឲ្យតួ​ Zhao Lusi​ កាន់តែស្រស់ស្អាតលើសមុនទៀត៕

អត្ថបទ៖ សាង ស្រីល័ក្ខ

ចុចអាន៖​លែងស្លូតដូចមុនហើយ  Zhao Lusi ប្ដឹងអ្នកដែលបរិហារកេរ្តិ៍​  និង​រិះគន់ថានាងកែសម្ផស្ស