លោក យឿន ពិសី សន្យាចូលរួមជួយផ្សព្វផ្សាយ ដើម្បីរកជំនួយជួយទ្រទ្រង់មន្ទីរពេទ្យគន្ធបុប្ផា

តារាចម្រៀងលោក យឿន ពិសី បានប្រកាសដោយសន្យាថា លោកនឹងចូលរួមជួយផ្សព្វផ្សាយដើម្បីស្វែងរកជំនួយជួយទ្រទ្រង់ទៅកាន់ មន្ទីរពេទ្យគន្ធបុប្ផា ។ ការលើកឡើងនេះ គឺបន្ទាប់ពីលោកបានសម្រេចលុបចេញនូវខ្លឹមសារមួយ ដែលលោកបានរិះគន់ចំពោះបុគ្គលិកពេទ្យ ដែលបម្រើការនៅមន្ទីរពេទ្យគន្ធបុប្ផា កាលពីពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈគណនីហ្វេសប៊ុកផ្ទាល់ខ្លួន លោក យឿន ពិសី បញ្ចាក់ថា លោកបានសម្រេចចិត្តលុបការបង្ហោះមួយនោះចេញវិញហើយ ក៏ព្រោះតែអគ្គនាយកមន្ទីរពេទ្យគន្ធបុប្ផា បានទំនាក់ទំនងមកលោក និងសួរនាំពាក់ព័ន្ធជាមួយនឹងរឿងបុគ្គលិករូបណា ដែលមានអាកប្បកិរិយាមិនសមប្រកបជាមួយសាច់ញាតិអ្នកជំងឺ ក៏ដូចជារួមមានទាំងសាច់ញាតិរបស់លោកផងដែរ។

តារាចម្រៀងយឿនពិសី បានបន្ថែមថា លោកអគ្គនាយកមន្ទីរពេទ្យរូបនោះ ក៏បានបញ្ជាក់ជាមួយលោកដែរថា បើសិនជាអ្វីដែលលោកបានលើកឡើង ជាការពិតមែននោះ លោកគ្រូនឹងមិនទុកបុគ្គលិក ដែលមានសម្ដីឬអាកប្បកិរិយាមិនសមរម្យបែបនេះឡើយ ដោយសង្កត់ធ្ងន់ថា “គាត់មិនបណ្ដោយឲ្យត្រីប៉ុន្មានក្បាលដែលស្អុយ ត្រូវរៀលដាលដល់ត្រីក្នុងកន្ត្រកដែលស្រស់ៗផ្សេងទៀតឡើយ”។

ទន្ទឹមនឹងការលើកឡើងនេះ លោក យឿន ពិសី បញ្ជាក់ជំហរដែរថា លោកនឹងចូលរួមជួយផ្សព្វផ្សាយបន្ថែម ដើម្បីរកជំនួយជួយទ្រទ្រង់ទៅកាន់ មន្ទីរពេទ្យគន្ធបុប្ផា ក៏ព្រោះថា មានជីវិតកុមារច្រើនណាស់ដែលកំពុងតែរង់ចាំការសង្គ្រោះ ក៏ដូចជាមានកុមារច្រើនណាស់ ដែលត្រូវបានរស់រានមានជីវិតជាសះស្បើយឡើងវិញពីជំងឺ៕ អត្ថបទ៖ ចាន់រ៉ា