ជីវិតកម្សាន្ដ

Min ចេញមុខសុំទោសទាំងទឹកភ្នែក បន្ទាប់ពីជាប់ចោទឃោសនាឲ្យក្រុមហ៊ុនបោកប្រាស់

បានផុស

២ years មុន

នៅ

ថ្ងៃចន្ទ ១៤ តុលា ២០២៤

ដោយ

តារាសម្ដែងថៃ Min Pechaya បានចេញមុខសុំទោសមហាជនទាំងទឹកភ្នែកជោគថ្ពាល់ ក្នុងពេលដែលនាងមិនបានធ្វើការស្រាវជ្រាវឲ្យហ្មត់ចត់មុនពេលផ្សព្វផ្សាយ The iCon Group ជាក្រុមហ៊ុនមួយកំពុងស្ថិតនៅក្រោមការស៊ើបអង្កេត ពីបទក្លែងបន្លំ ព្រមទាំងត្រូវគេរាយការណ៍ថាបានជំរុញឲ្យមនុស្សជាច្រើនក្ស័យធន។

នៅក្នុងសន្និសីទសារព័ត៌មានកាលពីថ្ងៃសៅរ៍ តារាថៃវ័យ៣៥ឆ្នាំបានបញ្ជាក់ច្បាស់ថា នាងមិនត្រូវបានជួលជាផ្លូវការដោយក្រុមហ៊ុន The iCon Group ដែលលក់ផលិតផលថែរក្សាសម្រស់ អាហារបំប៉នសុខភាព និងផ្តល់វគ្គបណ្តុះបណ្តាលអនឡាញស្តីពីការលក់ និងការការពារសុខភាពទេ។ ផ្ទុយទៅវិញ នាងបានធ្វើជាទូតសុឆន្ទៈផលិតផលតែម្នាក់ឯង ដូចការរាយការណ៍ដោយគេហទំព័រព័ត៌មាន Thairath នាពេលកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះដែរ Min Pechaya បានរៀបរាប់ថា នាងបានចូលរួមជាមួយក្រុមហ៊ុនប្រហែលមួយឆ្នាំមុន ហើយដូចតារាល្បីៗផ្សេងទៀតដែលពាក់ព័ន្ធជឿថាក្រុមហ៊ុននេះស្របច្បាប់ និងមានកេរ្តិ៍ឈ្មោះល្បីល្បាញក្នុងប្រទេស។ យ៉ាងណា នាងទទួលស្គាល់ការបរាជ័យរបស់ខ្លួនក្នុងការស្រាវជ្រាវឲ្យគ្រប់គ្រាន់នូវប្រវត្តិរបស់ក្រុមហ៊ុន និងបានសម្តែងការសោកស្តាយចំពោះអ្នកដែលរងផលប៉ះពាល់ដោយការក្លែងបន្លំ ហើយពេលនេះនាងក៏បានបញ្ចប់ទំនាក់ទំនងជាមួយក្រុមហ៊ុនដែរ។

កាលពីថ្ងៃដដែល ប៉ូលិសថៃបានលាតត្រដាងថា ពួកគេបានប្រមូលសេចក្តីថ្លែងការណ៍ចំនួន ៣០៦ ពីមនុស្សដែលត្រូវបានគេទាញចូលក្នុងគម្រោងវិនិយោគរបស់ក្រុមហ៊ុន។ ជាមួយគ្នានោះ អ្នកនាំពាក្យរងប៉ូលិស លោក Pol Col Uthane Nuipin បានរាយការណ៍ថា ការខាតបង់តាមការប៉ាន់ប្រមាណបានកើនឡើងដល់ ១១៨លានបាត (៣.៥លានដុល្លារអាមេរិក) ចាប់តាំងពីការស៊ើបអង្កេតបានចាប់ផ្តើមកាលពីថ្ងៃព្រហស្បតិ៍។

ក្រុមហ៊ុនមួយនេះត្រូវគេរាយការណ៍ថា បានទាក់ទាញបុគ្គលដែលមានវគ្គសិក្សាទីផ្សារដែលមានតម្លៃក្រោម ១០០បាត ក្រោយមកជំរុញឲ្យពួកគេវិនិយោគបន្ថែមទៀតលើផលិតផលសម្រាប់លក់បន្ត។ លើសពីនេះទៀត អ្នកចូលរួមត្រូវបានតម្រូវឲ្យបង់ប្រាក់សម្រាប់ការចូលរួមក្នុងព្រឹត្តិការណ៍ដែលបង្ហាញពីការយល់ព្រមពីតារាល្បីថែមទៀត។

ក្រៅពី Min Pechaya ក៏មានតារាល្បីៗមួយចំនួនទៀតដែលជាប់ពាក់ព័ន្ធក្នុងរឿងនេះ ក្នុងនោះក៏មានតារាសម្ដែង Boy Pakornផងដែរ។ នៅក្នុងកម្មវិធីទូរទស្សន៍មួយ គាត់បានយំ សុំទោសជនរងគ្រោះ ហើយនិយាយថា គាត់មិនមែនជាអ្នកដឹកនាំក្រុមហ៊ុនទេ គឺគ្រាន់តែថតរូបផ្សព្វផ្សាយ និងចូលរួមក្នុងព្រឹត្តិការណ៍ក្រុមហ៊ុនប៉ុណ្ណោះ។ លោក Pakorn និយាយថា លោកនឹងប្រឹងប្រែងឲ្យអស់ពីសមត្ថភាព ដើម្បីផ្តល់ព័ត៌មានទាំងអស់នៅក្នុងកិច្ចសន្យា ដើម្បីបម្រើការស៊ើបអង្កេតរបស់ប៉ូលិស។

គួររម្លឹកថា ក្រុមហ៊ុន The iCon Group ដែលជាអ្នកផ្សព្វផ្សាយពាណិជ្ជកម្មអនឡាញដ៏ល្បីមួយ បានរងនូវការជាប់ចោទពីបទក្លែងបន្លំសាធារណៈ ការលាងលុយកខ្វក់ និងបទល្មើសពាក់ព័ន្ធដែលបានប៉ះពាល់ដល់ជនរងគ្រោះជាង ៧០០ នាក់។ ក្នុងនោះមានតារាប្រុសស្រីល្បីៗជួរមុខក្នុងប្រទេសថៃកំពុងត្រូវប៉ូលិសស៊ើបអង្កេត ខណៈពេលដែលម្នាក់ៗចេញមុខមកបកស្រាយរៀងៗខ្លួនថា ពួកគេត្រូវជាទូតសុឆន្ទៈតំណាងផលិតផលតែប៉ុណ្ណោះ៕