Angelina-Brad Pitt ជាតារាលំដាប់ពិភពលោក តែកូនៗគ្មានចិត្តដើរតាមគន្លងឪពុកម្តាយទេ

ទោះបីជា Angelina និង Brad Pitt សុទ្ធតែជាតារាលំដាប់ពិភពលោកក៏ដោយ ក៏កូនៗរបស់គូស្នេហ៍មួយគូនេះ មិនមានចេតនាដើរតាមគន្លងឪពុកម្តាយរបស់ពួកគេឡើយ។ ក្នុងអំឡុងពេលនៃការសន្ទនាជាមួយប្រព័ន្ធផ្សព្វផ្សាយនៅឯការបញ្ចាំងភាពយន្ត Maria ក្នុងទីក្រុង Los Angeles តារាវ័យ ៤៩ ឆ្នាំរូបនេះ បានចែករំលែកថានាងមិនរំពឹងថាកូនរបស់នាងណាមួយ នឹងក្លាយជាតារាសម្តែងដូចឪពុកម្តាយរបស់ពួកគេនោះទេ។ ពួកគេទាំងអស់មានភាពអៀនខ្មាស់ សម្ងាត់ និងចូលចិត្តភាពឯកជន។

Angelina Jolie និង Brad Pitt មានកូនចំនួន ៦ នាក់៖ Maddox អាយុ ២៣ ឆ្នាំ Pax Thien អាយុ ២០ ឆ្នាំ Zahara អាយុ ១៩ឆ្នាំ Shiloh អាយុ ១៨ ឆ្នាំកូនភ្លោះ Knox និង Vivienne អាយុ ១៦ ឆ្នាំ។

ថ្មីៗនេះ តារាវ័យ ៤៩ឆ្នាំ​បានសម្រេចចិត្តទម្លាក់ចោលពាក្យបណ្ដឹងអតីតស្វាមី ពីបទប្រមាថ និងវាយដំកូនម្នាក់នៅលើយន្តហោះឯកជន កាលពីឆ្នាំ២០១៦។​ ដកស្រង់ពីប្រភពជិតស្និទ្ធបាននិយាយថា ក្នុងរយៈពេលប៉ុន្មានឆ្នាំចុងក្រោយនេះ Angelina អាចបង្កើតជីវិតដ៏សុខសាន្តសម្រាប់ខ្លួននាង និងកូនៗរ ធ្វើឲ្យពួកគេសប្បាយចិត្ត។ ទោះបីជានាងតស៊ូមួយរយៈក៏ដោយ តែនាងមានមោទនភាពយ៉ាងខ្លាំងចំពោះភាពធន់ និងកម្លាំងរបស់កុមារ។

ប្រភពដដែលបាននិយាយថា ការជាប់គាំងនៅក្នុងអតីតកាល​មិនមែនជាអ្វីដែល Angelina ចង់បាននោះទេ។ នាងកំពុងជំនះអតីតកាលយ៉ាងសកម្ម ដោយផ្តោតលើគ្រួសារ ការងារ និងអនាគត។ នេះជាអ្វីដែលធ្វើឲ្យនាងសប្បាយចិត្ត ។

កាលពីខែកញ្ញាឆ្នាំមុន Angelina ​ បានចែករំលែកអំពីស្នាមសាក់ជាមួយ Vivienne នៅពេលដែលម្តាយនិងកូនស្រីធ្វើការជាមួយគ្នានៅក្នុងរឿង The Outsiders on Broadway ។ ​នាពេលនោះតារាហូលីវូដបង្ហើបថា «​ខ្ញុំបានសាក់ Stay Gold ជាមួយ Vivienne ខណៈពេលដែលយើងកំពុងបង្កើត The Outsiders ។ វាពិតជាមានន័យណាស់ »។ នេះគឺជាឈ្មោះបទចម្រៀងមួយបទដែលនាង Angelina ផលិតឡើងដោយមានការគាំទ្រពី Vivienne ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖ផ្ទុះការវែកញែក ក្រោយបេក្ខនារីជប៉ុន Miss Earth ប្រើ Google Translate ឆ្លើយសំណួរ