ឱក សុគន្ធកញ្ញា ត្រៀមធ្វើ Solo Tour Concert បំពេញបំណងអ្នកគាំទ្រ ក្រោយជោគជ័យលើកទី១

បន្ទាប់ពីជោគជ័យយ៉ាងធំធេងសម្រាប់ព្រឹត្តិការណ៍ប្រគំតន្ត្រី The Q – Rise of The Queen Solo Concert លើកទី១ តារាចម្រៀងល្បីឈ្មោះអ្នកនាង ឱក សុគន្ធកញ្ញា បានបង្ហើបពីគោលបំណងត្រៀមរៀបចំ Solo Tour Concert ដើម្បីបំពេញបំណងអ្នកគាំទ្រ។

ជាការពិត ព្រឹត្តិការណ៍ប្រគំតន្ត្រីដ៏អស្ចារ្យ Solo Concert របស់តារាចម្រៀងចាស់វស្សារូបនេះ កាលពីខែកញ្ញាកន្លងទៅ គឺទទួលបានការគាំទ្រយ៉ាងច្រើនកុះករពីមហាជន ពិសេសយុវវ័យ ខណ:ដែលសាម៉ូខ្លួន ជារឿយៗ បានបង្ហាញក្តីរំភើបទឹកភ្នែកមិនដឹងខ្លួន និងនៅតែរំភើបជាមួយព្រឹត្តិការណ៍នោះជានិច្ច។

តួយ៉ាងថ្មីៗនេះ អ្នកនាង ឱក សុគន្ធកញ្ញា ទើបតែបង្ហាញអារម្មណ៍ដិតដាមនឹងព្រឹត្តិការណ៍នោះ ទៅកាន់អ្នកគាំទ្រជាថ្មីម្តងទៀតថា “រាល់ពេលមើលម្តងៗ អារម្មណ៍នៅតែរំភើប ទឹកភ្នែកហូរដោយមិនដឹងខ្លួន” និងឆ្លៀតថ្លែងអំណរគុណចំពោះការគាំទ្រខ្លួន រួមនិងក្រុមការងារ ដែលអ្នកនាងចាត់ទុកថា ជាផ្នែកដ៏សំខាន់ញាំងឱ្យមានព្រឹត្តិការណ៍នោះឡើង។

រឿងដែលចាប់អារម្មណ៍ថែមទៀត សម្រាប់អ្នកគាំទ្ររបស់តារាចម្រៀងប្រចាំផលិតកម្មហង្សមាសរូបនេះ គឺក្រោយការប្រកាសថា “ជួបគ្នាឆាប់ៗនេះ The Q Rise Of The Queen – Aok Sokunkanha Solo Tour C oncert“ ។

ចំពោះការបង្ហើបដំណឹងនៃព្រឹត្តិការណ៍ Solo Tour Concert របស់ខ្លួននេះដែរ អ្នកនាង ឱក សុគន្ធកញ្ញា មិនទាន់បានបញ្ជាក់ពីថ្ងៃ​កំ​ណត់ ថាគ្រោងធ្វើនៅថ្ងៃណា ឬទីតាំងកន្លែងណានៅឡើយទេ ព្រោះស្ថិតក្នុងដំណាក់​កាលស្ទាប​ស្ទង់ ចិត្តអ្នកគាំទ្ររបស់ខ្លួន។

ជាការកត់សម្គាល់ ព្រឹត្តិការណ៍ប្រគំតន្ត្រី The Q – Rise of The Queen Solo Concert ឱក សុគន្ធកញ្ញា មិនត្រឹមតែទទួលបានជោគជ័យ និងការគាំទ្រភ្លូកទឹកភ្លូកដីពីសំណាក់ទស្សនិកជននោះទេ ព្រឹត្តិការណ៍ប្រគំតន្ត្រីនេះ ថែមទាំងបានបង្កើតបរិយាកាសយ៉ាងសប្បាយរីករាយកក្រើកឆាកតែម្តង៕ អត្ថបទ៖ ចាន់រ៉ា