នាយ តាក់ស៊ី មានសង្ឃឹមខ្លះហើយ ខណ:ថ្នាក់ដឹកនាំនិងសប្បុរសជន ឧបត្ថម្ភថវិកាសង្គ្រោះជីវិត

តារាកំប្លែងនាយ តាក់ស៊ី ថ្មីៗនេះ បានលើកដៃសំពះដង្ហើយសុំជំនួយសប្បុរសជន ដើម្បីព្យាបាលជំងឺនិងប្តូរក្រលៀនសង្គ្រោះជីវិតខណ:ដែលការដូរក្រលៀនម្ខាងគឺត្រូវចំណាយលុយចំនួន ៥ម៉ឺនដុល្លារ។

បន្ទាប់ពីឃើញការអំពាវនាវ និងមានក្តីអាណិតអាសូរដល់តារាកំប្លែងរូបនេះ មកទល់ពេលនេះ សង្កេតឃើញមានថ្នាក់ដឹកនាំកំពូលនិងសិល្បករសិល្បការិនីខ្មែរមួយចំនួន បានចូលរួមឧបត្ថម្ភថវិកាផ្ទាល់ខ្លួន ដើម្បីជួយសង្គ្រោះជីវិតតារាកំប្លែងជើងចាស់នាយ តាក់ស៊ី អំឡុងពេលដែលកំពុងត្រូវការជំនួយ។

តារាកំប្លែងនាយ តាក់ស៊ី បានបង្ហោះនៅលើបណ្តាញសង្គមហ្វេសប៊ុកថ្លែងអរគុណដូច្នេះថា សូមគោរពអរគុណ និងសូមជូនពរសម្តេចបរវធិបតី និងលោកជំទាវ ដែលបានឧបត្ថម្ភថវិកាមួយចំនួនសម្រាប់ព្យាបាលជំងឺដល់រូបខ្ញុំបាទ។ អរគុណដល់ថ្នាក់ដឹកនាំនិងមេៗព្រមទាំងមិត្តភក្កិបងប្អូនហ្វេនៗ ដែលបានឧបត្ថម្ភថវិការដល់រូបខ្ញុំបាទផ្ទាល់សម្រាប់ព្យាបាលជំងឺ (ខ្ញុំបាទនៅខ្វះច្រើនណាស់)។

ទោះបីជាយ៉ាងណាតារាកំប្លែងនាយ តាក់ស៊ី នៅតែបន្តការអំពាវនាវសុំជំនួយពីសប្បុរសជន ដើម្បីបានប្រាក់ព្យាបាលជំងឺនិងវះកាត់ដូក្រលៀនផងដែរ។ នាយ តាក់ស៊ី បានលើកឡើងថា សូមបងប្អូនជួយខ្ញុំឱ្យបានប្តូរក្រលៀនផងខ្ញុំចង់រស់ណាស់។

ដោយឡែកសមាគមសិល្បករខ្មែរនៅយប់ថ្ងៃទី ០១ ខែធ្នូ ឆ្នាំ២០២៤ បានអំពាវនាវសប្បុរសជន ព្រមទាំងអ្នកសិល្ប:ចូលរួមបរិច្ចាគថវិកាជួយដល់តារាកំប្លែងនាយ តាក់ស៊ី ដែលកំពុងសម្រាកព្យាបាលនៅមន្ទីពេទ្យ។ នាយ តាក់សុី កំពុងស្ថិតនៅក្នុងស្ថានភាពលាងឈាមសង្រ្គោះ នៅក្នុងមន្ទីរពេទ្យព្រះកេតុមាលា ដោយសារជំងឺទឹកនោមផ្អែម ធ្វេីឱ្យខូចក្រលៀននិងជំងឺទឹកដក់ក្នុងសួតផងដែរ។

បើតាមលោកវេជ្ជបណ្ឌិត បានបញ្ជាក់ឲ្យដឹងថា នាយ តាក់សុី មានជម្រើសចុងក្រោយពីរ គឺទី១ ត្រូវលាងឈាមពេញមួយជីវិតមួយអាទិត្យចំនួនបីដង និងជម្រើសទី២ គឺត្រូវតែធ្វេីការវះកាត់ប្ដូរក្រលៀនថ្មី៕ អត្ថបទ៖ ចាន់រ៉ា