ពេជ្រ សូលីកា នាំយកថវិកាជិត ១ម៉ឺនដុល្លារ ពីការលក់សំបុត្រ Concert ឧបត្ថម្ភដល់មូលនិធិមន្ទីរពេទ្យគន្ធបុប្ផា

ដើម្បីចូលរួមចំណែកជួយដល់សង្គម ពិសេសកុមារនៅកម្ពុជា តារាចម្រៀងអ្នកនាង ពេជ្រ សូលីកា បានយកនូវថវិកាប្រមាណជិត ១ម៉ឺនដុល្លារ ដែលបានពីការប្រគុំតន្ត្រី Solo Concert កាលពីថ្មីៗកន្លងទៅ ឧបត្ថម្ភជួយដល់មូលនិធិមន្ទីរពេទ្យគន្ធបុប្ផា។

តារាចម្រៀងពេជ្រ សូលីកា បានរៀបរាប់ថា “ថ្ងៃនេះនាងខ្ញំ ពេជ្រ សូលីកា រួមទាំងក្រុមការងារបានពាំនាំយកថវិកាក៏ដូចជាអំណោយផ្សេងៗ បរិច្ចាគទៅកាន់មូលនិធិជូនមន្ទីរពេទ្យគន្ធបុប្ផា ដែលទទួលបានមកពីការលក់សំបុត្រ Twilight The First Concert បរិច្ចាកចំនួន ៣៥.៥៥២.០០០រៀល និងបាយចំនួន ១០០០ប្រអប់ ព្រមទាំងភេសជ្ជៈ ៩០កេសផងដែរ។

ពេជ្រ សូលីកាបន្តទៀតថា ក្នុងនោះក៏មានការចូលរួមចំណែកពីមហាជនដែលជាអ្នកគាំទ្រនាង ចំពោះការជួយទិញសំបុត្រចូលរួមទស្សនា Concert របស់នាង។ ហេតុដូច្នេះហើយ នាងសម្តែងការគោរពអរគុណអ្នកគាំទ្រជាខ្លាំង ដោយគូសបញ្ជាក់ថា “បងប្អូនទាំងអស់គ្នា ក៏ជាចំណែកយ៉ាងធំ សម្រាប់មូលនិធិមួយនេះដូចគ្នា”។

អ្នកនាង ពេជ្រ សូលីកា បានបន្ថែមថា ជាចុងបញ្ចប់នាងខ្ញុំសូមជូនពរដល់ក្មួយៗ ដែលកំពុងទទួលការព្យាបាលទទួលបានជោគជ័យ និងឆាប់ជាសះស្បើយពីជំងឺផ្សេងៗ (ការងារសង្គមមូលនិធិគន្ធបុប្ផាកម្ពុជា)។ តាមរយ:សកម្មភាពសប្បុរសធម៌នេះដែរ ពេជ្រ សូលីកា ក៏ទទួលបានការគាំទ្រជាច្រើនពីមហាជនផងដែរ ។

ទង្វើនេះ ក៏ត្រូវបានទស្សនិកជន និងអ្នកប្រើប្រាស់បណ្តាញសង្គមហ្វេសប៊ុកចាត់ទុកថា ជាសកម្មភាពមនុស្សធម៌ដ៏គំរូល្អមួយក្នុងការងារចូលរួមចំណែកជួយដល់សង្គម។ នាងក៏ត្រូវបានអ្នកនិយមលេងបណ្តាញសង្គមហ្វេសប៊ុកជាច្រើន បានដាក់ក្តីរំពឹងថា តារាស្រីរូបនេះនឹងបន្តធ្វើស​កម្មភាពមនុស្សធម៌នេះបន្ថែមទៀត ដើម្បីក្លាយជាតារាគំរូល្អដល់តារាប្រុស-ស្រីដទៃទៀត ដែលគួតែឆ្លៀតឱកាស ឬពេលវេលាផ្ទាល់ខ្លួន រួមចំណែកការងារសង្គមនេះផងដែរ៕ អត្ថបទ៖ ចាន់រ៉ា