ជីវិតកម្សាន្ដ

តួជើងចាស់របស់ចិន ទទួលមរណភាពក្នុងវ័យ ៩៣ឆ្នាំ

បានផុស

១០ ខែ មុន

នៅ

ថ្ងៃសុក្រ ៤ កក្កដា ២០២៥

ដោយ

យោងតាម St Headline សិល្បករប្រុសរូបនេះ បានទទួលមរណភាពនៅថ្ងៃទី ៤ ខែកក្កដា បន្ទាប់ពីប្រយុទ្ធនឹងជំងឺរលាកសួត។ គាត់បានចូលនិវត្តន៍នៅឆ្នាំ ២០២០ ហើយចាប់តាំងពីពេលនោះមក កម្របានបង្ហាញខ្លួននៅក្នុងកម្មវិធីកម្សាន្តដោយចង់រីករាយនឹងភាពចាស់របស់គាត់ជាមួយកូននិងចៅៗ។ លោក Zhou Botong និងភរិយា បានរៀបការនៅឆ្នាំ ១៩៥៨ មានកូនចំនួន ៤ នាក់ ភរិយាលោកបានទទួលមរណភាពនៅឆ្នាំ ២០១៨។

នៅក្នុងបទសម្ភាសន៍ឆ្នាំ ២០២១ សិល្បករបាននិយាយថា គាត់មិនខ្លាចស្លាប់ទេគ្រាន់តែសង្ឃឹមថា អាចញញឹមនៅពេលចាកចេញ ។ កាលណោះ គាត់បាននិយាយថា «ខ្ញុំបានសម្តែងអស់រយៈពេល៦០ ឆ្នាំមកហើយ ហើយវាហាក់ដូចជាខ្ញុំបានស្លាប់ជាច្រើនដងនៅលើកញ្ចក់អេក្រង់។ ការស្លាប់គឺជារឿងដ៏យុត្តិធម៌បំផុតក្នុងជីវិត មិនថាអ្នកមានឬអ្នកក្រ មនុស្សគ្រប់គ្នាត្រូវតែប្រឈមមុខនឹងវាទាំងអស់»។

នៅលើបណ្ដាញសង្គម ទស្សនិកជនរាប់ពាន់នាក់បាននិយាយថា ពួកគេបានបួងសួងឲ្យតារាប្រុសរូបនេះបានសម្រាកក្នុងភាពសុខសាន្ត និងអរគុណគាត់សម្រាប់ខ្សែភាពយន្តដែលបានបន្សល់ទុកនូវចំណាប់អារម្មណ៍ចំពោះកុមារភាពរបស់ពួកគេ។ អ្នកគាំទ្របានសរសេរថា គាត់ជាតួអង្គ Zhang Sanfeng តាមការស្រមើស្រមៃរបស់ខ្ញុំ គ្មាននរណាម្នាក់អាចលើសពីគាត់ក្នុងតួអង្គនេះទេ។ ជាពិសេស មុខមាត់របស់គឺទន់ភ្លន់សមនឹងតួអង្គនោះបំផុត។ឮ

តារាសម្តែងកើតនៅឆ្នាំ ១៩៣២ នៅទីក្រុងហុងកុង ចូលប្រឡូកក្នុងវិស័យភាពយន្តនៅឆ្នាំ ១៩៥៥ គាត់បានលេចមុខនៅក្នុងផលិតកម្មភាពយន្ត និងទូរទស្សន៍រាប់រយ ហើយត្រូវបានគេដាក់រហស្សនាមថា «ជីតាលើកញ្ចក់ទូរទស្សន៍» សារតែគាត់តែងតែដើរតួជាឪពុក និងជីតាជារឿយៗ។

ក្នុងវិស័យភាពយន្ត តារាជើងចាស់រូបនេះបានសម្ដែងក្នុងរឿងភាគ «Love Undercover, Call of Heroes និង Time។ នៅឆ្នាំ ១៩៧៤ លោកបានចុះកិច្ចសន្យាជាមួយ TVB ដោយចូលរួមក្នុងរឿងភាគជាច្រើន The Con Artist (១៩៨០), Cruel Challenge (១៩៩១), The Heaven Sword និង Dragon Saber 2001 ស៊េរីរឿង Stormy Heart, Steel Proof, Strength of Love ។ ភាពយន្តចុងក្រោយរបស់គាត់គឺរឿង The Case Against the Heavens ដែលចេញនៅឆ្នាំ ២០២១៕

អត្ថបទ៖ សាង ស្រីល័ក្ខ

ចុចអាន៖រឿងភាគកូរ៉េ ៥ នេះ ក្លាយជាភាពយន្តមានអ្នកទស្សនាទូទាំងពិភពលោក