សមាគមសិល្បករខ្មែរ ក្រើនរំលឹកយុវជនត្រូវខិតខំរៀនសូត្រស្វែងយល់ពីប្រវត្តិសាស្ត្រនិងវប្បធម៌ជាតិ

សមាគមសិល្បករខ្មែរស្របពេលនៃឱកាសអបអរសាទរខួប ១៧ឆ្នាំ នៃការចុះបញ្ជីប្រាសាទព្រះវិហារជាបេតិកភណ្ឌពិភពលោកបានចេញសារអំពាវនាវក៏ដូចជាក្រើនរំលឹកយុវជនខ្មែរឲ្យត្រូវខិតខំសិក្សារៀនសូត្រស្វែងយល់ពីប្រវត្តិសាស្ត្រនិងវប្បធម៌ជាតិ។

ទន្ទឹមគ្នានេះសមាគមសិល្បករខ្មែរ ក៏បានឲ្យដឹងថា សូមចូលរួមអបអរសាទរយ៉ាងអធិកអធមនូវខួបគម្រប់ ១៧ឆ្នាំនៃការសម្រេចចិត្តជាប្រវត្តិសាស្ត្ររបស់អង្គការ UNESCO ដែលបានចុះបញ្ជីប្រាសាទព្រះវិហារទៅក្នុងបញ្ជីបេតិកភណ្ឌពិភពលោកកាលពីថ្ងៃទី០៧ ខែកក្កដា ឆ្នាំ២០០៨ ។ ព្រឹត្តិការណ៍នេះ បាននាំមកនូវមោទនភាពជាតិយ៉ាងក្រៃលែងសម្រាប់ប្រជាជនកម្ពុជាទាំងមូល។

ប្រាសាទព្រះវិហារ គឺមិនមែនត្រឹមតែជាសំណង់ស្ថាបត្យកម្មដ៏អស្ចារ្យមួយប៉ុណ្ណោះទេ ប៉ុន្តែក៏ជានិមិត្តរូបនៃវប្បធម៌ អរិយធម៌ និងអធិបតេយ្យភាពរបស់ជាតិខ្មែរផងដែរ។ការបញ្ចូលប្រាសាទព្រះវិហារទៅក្នុងបញ្ជីបេតិកភណ្ឌពិភពលោកគឺជាជ័យជម្នះដ៏ធំធេងមួយរបស់កម្ពុជាដែលកើតចេញពីការតស៊ូមតិផ្នែកការទូត និងផ្លូវច្បាប់អស់រយៈពេលជាច្រើនទសវត្សរ៍។

រាជរដ្ឋាភិបាលកម្ពុជាបានតស៊ូក្តីយ៉ាងស្វិតស្វាញ នៅទីក្រុងឡាអេ(LaHague) ដែលជាទីតាំងនៅតុលាការយុត្តិធម៌អន្តរជាតិ (ICJ) ដើម្បីយកឈ្នះប្រទេសថៃលើបញ្ហាអធិបតេយ្យភាពជុំវិញប្រាសាទនេះ។ ជ័យជម្នះនេះបានបង្ហាញដល់ពិភពលោកនូវតម្លៃជាសកលដ៏ឆ្នើមរបស់ប្រាសាទនេះ ក៏ដូចជាសិទ្ធិស្របច្បាប់របស់កម្ពុជាក្នុងការគ្រប់គ្រងនិងថែរក្សាបេតិកភណ្ឌដ៏មានតម្លៃនេះ។

ជាមួយគ្នានេះសមាគមសិល្បករខ្មែរក៏អំពាវនាវដល់យុវជនទាំងអស់ខិតខំសិក្សារៀនសូត្រស្វែងយល់ពីប្រវត្តិសាស្ត្រ និងវប្បធម៌ជាតិ ដើម្បីរួមគ្នាថែរក្សាបេតិកភណ្ឌដែលបុព្វបុរសបានបន្សល់ទុក។ លើសពីនេះទៀត សូមយុវជនចូលរួមបានកាន់តែសកម្មក្នុងការអភិវឌ្ឍសង្គមជាតិ និងការពារអធិបតេយ្យភាពរបស់កម្ពុជាបន្តទៅមុខទៀត​ព្រោះថាយុវជន​ជាទំពាំងស្នងឫស្សី និងជាអនាគតរបស់ប្រទេសជាតិ៕ ចាន់រ៉ា