ក្រុមចម្រៀង K-POP មកកម្ពុជាលើកដំបូង ទាំងសប្បាយរីករាយ និងបង្ហាញស្ទីលរាំនៅ Walk Street មិនភ័យខ្លាច

ក្រុមតារាចម្រៀងកូរ៉េខាងត្បូង K-POP បែបយុវវ័យ NCHIVE កាលពីប៉ុន្មានថ្ងៃមុននេះ បានបង្ហាញជាលើកដំបូង នៃដំណើរទស្សនកិច្ចអមដោយការប្រគំតន្ត្រីនៅកម្ពុជា ដោយបានធ្វើឲ្យអ្នកគាំទ្រ និងសិស្សានុសិស្សានៅសាលាម្តុំពោធិចិនតុងពេញចិត្តជាខ្លាំង ក្រោយបានជួបសំណេះសំណាលផ្ទាល់ និងមានការសម្តែងយ៉ាងពិសេសមិនអាចបំភ្លេចបាន។

ទន្ទឹមគ្នានោះដែរ ក្រុមចម្រៀងបែបយុវវ័យនេះក៏បាននូវទស្សនីយភាពដ៏អស្ចារ្យនៅក្នុងព្រឹត្តិការណ៍មួយដែលគេហៅថា «K-pop Random Dance» ដែលធ្វើឡើងនៅផ្លូវថ្មើរជើងចតុមុខ (Chaktomuk Walk Street)  ក្នុងទីក្រុងភ្នំពេញ ដោយសកម្មភាពនៃការរាំ ក្រោមបរិយាកាសពេញដោយភាពសប្បាយ និងរស់រវើក។

ថ្វីដ្បិតតែថា ស្ថានភាពនាពេលនេះប្រឈមមុខនឹងវិបត្តិជម្លោះព្រំដែនរវាងកម្ពុជា និងថៃ កំពុងស្ថិតនៅភាពតានតឹងដោយពុំទាន់បានបញ្ចប់ក៏ពិតមែន។ ប៉ុន្តែនៅក្នុងដំណើររបស់ក្រុមច្រៀង K-pop កូរ៉េមកកាន់ប្រទេសកម្ពុជា មិនពួកគេមកតែម្នាកឯង ឬជាក្រុមនោះទេ តែបានសបញ្ចាក់ឲ្យដឹងថា កម្ពុជាគឺត្រូវសន្តិភាពមិនចង់បង្កជម្លោះ ឬបង្កអសន្តិភាពណាមួយដល់អ្នកទេចរណ៍ឡើយ។

តាមរយៈឃ្លិបវីដេអូរបស់ក្រុម NCHIVE បានបង្ហាញនូវស្ទីលរាំដោយមិនអាចខ្លាច ឬព្រួយបារម្ភណ៍អំពីសុវត្ថិភាពផ្ទាល់ខ្លួនឡើយ យ៉ាងណាពួកម្នាក់ៗបែរជាបញ្ចេញសកម្មភាពរាំយ៉ាងស្រុះដៃគ្នា ហាក់ដូចជាប្រទេសកម្ពុជាគឺជាស្រុកកំណើតពួកគេយ៉ាងដូច្នោះដែរ។

មិនទាន់អស់នោះទេ នៅក្នុងដំណើរមកកម្ពុជារយៈពេល ២០ថ្ងៃនេះ ក្រុមចម្រៀងប្រុសនឹងធ្វើដំណើរទៅលេងប្រាសាទអង្គរវត្ត ព្រមទាំងទាំងតាំងសំខាន់ៗនៅក្នុងប្រទេសកម្ពុជា ស្របពេលដែលពួកគេក៏ហាត់រៀនភាសាខ្មែរចងចាំយ៉ាងស្ទាត់ជំនាញដែរ។ ដែលនោះបានបង្ហាញច្បាស់ៗថា ប្រទេសខ្មែរពិតជាមានសន្តិភាព និងគ្មានរឿងណាមួយដែលបង្កការព្រួយបាម្ភដល់អ្នកទេសចរឡើយ។

សូមជម្រាបជូនថា នេះជាដំណើរទស្សនកិច្ចដំបូងរបស់ក្រុមចម្រៀងកូរ៉េបែបយុវវ័យ Nchive សម្រាប់ដំណើរទស្សនកិច្ចអមដោយការប្រគំតន្ត្រីនៅកម្ពុជា ដែលចូលរួមព្រឹត្តការណ៍បើកដំណើរការកម្មវិធីជាផ្លូវការ AngkorLife នៅថ្ងៃទី២ ខែសីហា ឆ្នាំ២០២៥ នៅផ្សារទំនើបអូឡាំព្យារម៉ល ជាមួយការចុះហត្ថលេខាដល់ហ្វេនៗអ្នកគាំទ្រទៀតផង។

សម្រាប់  NCHIVE គឺជាក្រុមតារាចម្រៀងកូរ៉េខាងត្បូងនៅក្រោមស្ទូឌីយោ Aubemoon ដែលបានបង្ហាញខ្លួនជាផ្លូវការនៅថ្ងៃទី ៩ ខែមេសា ឆ្នាំ ២០២៤ ជាមួយនឹងអាល់ប៊ុមទោលក្រោមចំណងជើងថា «Drive» ។ ដើមឡើយត្រូវបានបង្កើតឡើងជាអង្គភាពដែលមានសមាជិកចំនួន៧រូប។ ក្រោយមក ក្រុមនេះនៅសល់សមាជិកតែ ៦រូបប៉ុណ្ណោះ រួមមាន E.aN, H.L, Kang San, Yu Chan, Ju Young និង N. អតីតសមាជិក Min Jun បានចាកចេញពីក្រុមកាលពីខែកក្កដា ឆ្នាំ ២០២៤ ដោយសារការព្រួយបារម្ភទាក់ទងនឹងរបួសលើរាងកាយ៕

អត្ថបទ៖ សាង ស្រីល័ក្ខ

ចុចអាន៖ភេសជ្ជៈ Highball របស់ G-Dragon លក់លើស ១០ លានកំប៉ុង ត្រឹមតែ ៣ ខែប៉ុណ្ណោះ