Jimin រងការវាយប្រហារ ​ក្រោយធ្លាយ​វីដេអូ​ណាត់​ជួបជាមួយតារាសម្ដែង Song Da Eun

វីដេអូឃ្លិបមួយបានលេចចេញនៅលើបណ្ដាញសង្គម TikTok ដោយធ្វើឲ្យប្រព័ន្ធផ្សព្វផ្សាយសង្គមកូរ៉េមានការភ្ញាក់ផ្អើលជាខ្លាំង នៅពេលដែលបង្ហាញថា Jimin សមាជិកក្រុម BTS បែរជាឈានជើងចេញពីជណ្តើរយន្តក្នុងអគារដែលតារាសម្តែង Song Da Eun រស់នៅទៅវិញ។

យ៉ាងណា វីដេអូមួយនោះ ត្រូវបានលុបចេញយ៉ាងឆាប់រហ័ស ប៉ុន្តែវានៅតែអាចរីករាលដាលយ៉ាងទូលំទូលាយ និងក្លាយជាចំណុចកណ្តាលនៃភាពចម្រូងចម្រាសពេញទំហឹងតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្ទុយពីការព្យាករណ៍ដំបូងដែលថា Song Da Eun នឹងប្រឈមមុខនឹងការរិះគន់ ប៉ុន្តែមតិសាធារណៈបានងាកមកវាយប្រហារ Jimin ទៅវិញ។ អ្នកលេងអ៊ីនធឺណេតជាច្រើនជឿថា តារាប្រុសរូបនេះបាននៅស្ងៀមយូរពេក ទុកឲ្យមិត្តស្រីដែលមានពាក្យចចាមអារ៉ាមរបស់ខ្លួននៅម្នាក់ឯង ដើម្បីប្រឈមមុខនឹងសម្ពាធពីមតិសាធារណៈ ត្រូវគេចំអក បង្ខូចកេរ្តិ៍ និងថែមទាំងជេរប្រមាថលើបណ្តាញសង្គមទៀតផង។

ការអត្ថាធិប្បាយជាបន្តបន្ទាប់បានលេចឡើងនៅលើវេទិកាសម្តែងទាំងការខឹងសម្បារក្នុងន័យខុសៗគ្នាថា អស់ជាច្រើនឆ្នាំហើយ ដែលនាងត្រូវបានគេហៅថាជាអ្នកដើរតាម និងជាអ្នកភូតកុហក ខណៈដែលនាងមិនអាចនិយាយចេញមកបាន ឬពន្យល់ឲ្យគេបានដឹង។ ចំណែកអ្នកផ្សេងទៀតបានបញ្ចេញមតិដែរថា ប្រសិនបើពួកគេពិតជាមានទំនាក់ទំនងស្នេហាមែន Jimin មិនគួរទុកនាងចោលបែបនេះឡើយ ពិតជាគួរឲ្យអាណិតនាងណាស់។

ទន្ទឹមគ្នានោះដែរ ក៏មានមតិខ្លះបាននិយាយផ្ទយពីនេះថា ភាពស្ងៀមស្ងាត់របស់ Jimin គឺជាការមិនគោរពចំពោះអ្នកដ៏ទៃ ថែមទាំងបង្កើនសម្ពាធផ្លូវចិត្តលើ Song Da Eun ទៀតផង។ មតិមួយចំនួនក៏បានរិះគន់យ៉ាងចាស់ដៃទៅលើអ្នកគាំទ្រ BTS ដែលតែងតែវាយប្រហារទៅលើតារាស្រី ខណៈដែល Idol របស់ពួកគេមិនបានចាត់វិធានការណាមួយដើម្បីការពារនាងសូម្បីតែម្ដងណាឡើយ។

យ៉ាងណាមិញ ក្រៅពីការរិះគន់ ក៏នៅតែមានមតិដែលថា ការបង្ហោះវីដេអូឃ្លីបឯកជនរបស់ Song Da Eun ជាសាធារណៈក៏ជាទង្វើដ៏ចម្រូងចម្រាសផងដែរ។ អ្នកគាំទ្ររបស់ Jimin បានសម្តែងការខឹងសម្បារ ដោយនិយាយថា នាងមានចេតនាទាញយកផលប្រយោជន៍ពីជីវិតឯកជនរបស់នាង ដើម្បីទាក់ទាញការចាប់អារម្មណ៍។

មកដលពេលនេះ Jimin មិនទាន់ធ្វើអត្ថាធិប្បាយលើភាពចម្រូងចម្រាសនេះទេ ដោយបង្កើតក្តីបារម្ភថាវាអាចប៉ះពាល់ដល់ផែនការត្រលប់មកវិញរបស់ក្រុម BTS ថែមទៀតផង៕

អត្ថបទ៖ សាង ស្រីល័ក្ខ

ចុចអាន៖តារា​ចម្រៀងកូរ៉េម្នាក់ ​កំពុងស្ថិត​ក្រោម​ការ​ស៊ើប​អង្កេត​របស់​ប៉ូលិស ​ពី​បទ​ប្រើ​គ្រឿង​ញៀន​