ផន ស្រីពី សុំចិត្តភាគីថៃ ងាកមករួមគ្នាកសាងព្រំដែនសន្តិភាពនឹងកម្ពុជា ឈប់រុញឱ្យស្ថានការណ៍តានតឹង

ក្រោយថៃកងទ័ពថៃចេះតែបង្កហេតុម្តងហើយម្តងទៀត រុញឱ្យស្ថានការណ៍តាមបន្ទាត់ព្រំដែនកម្ពុជា-ថៃកាន់តែក្តៅ កញ្ញា ផន ស្រីពី ក្នុងនាមជា Miss Cosmo Cambodia ឆ្នាំ២០២៥ ស្នើសុំទៅកាន់ក្រុមជ្រុលនិយមជាតិថៃ ងាកមករួមគ្នាកសាងព្រំដែនសន្តិភាពជាមួយកម្ពុជា ជំនួសឱ្យការបង្កអស្ថិរភាពព្រំដែននឹងគ្នាមិនចប់មិនហើយ។

តាមរយៈវីដេអូជាភាសាអង់គ្លេសជាង ១នាទី ផន ស្រីពី រៀបរាប់ថា “យើងទាំងអស់គ្នាសុទ្ធតែបានមើលឃើញអំពីស្ថានភាពព្រំដែនប្រទេសយើងទាំងពីរ តាមរយៈព័ត៌មាន”។ បវរកញ្ញារូបនេះសង្កត់ធ្ងន់ទៀតថា ជម្លោះសង្គ្រាម គឺមានតែនាំមកនូវការឈឺចាប់ប៉ុណ្ណោះ ហើយវាក៏អាចបន្សល់ស្លាកស្នាមបន្តសម្រាប់មនុស្សជំនាន់ក្រោយផងដែរ។ ដូចនេះ ជំនួសឱ្យការប្រើអាវុធ ក្នុងនាមជាអ្នកជិតខាងនឹងគ្នា គួរតែយោគយល់និងគោរពគ្នាទៅវិញទៅមក។

ជាមួយគ្នានេះ ផន ស្រីពី ក៏ទទូចសុំទៅកាន់ភាគីថៃ ដោយបង្ហាញបំណងឱ្យមានការសន្ទនា និងដោះស្រាយគ្នាដោយសន្តិវិធី ព្រោះថា ព្រំដែននៃអ្នកជិតខាងនឹងគ្នាមិនគួរឃារឃាំងការប្រាស្រ័យទាក់ទងគ្នាបែបនេះឡើយ ហើយ កម្ពុជា ​និង​ ថៃ​ គួរ​តែបន្តចំណងការទូតនឹងគ្នា។

លើសពីនេះ ប្រជាជាតិទាំងពីរគួរតែងាកមកសំឡឹងពីកិច្ចសហប្រតិបត្តិការ និងចក្ខុវិស័យសម្រាប់មនុស្សជំនាន់ក្រោយ ព្រោះព្រំដែនប្រទេសទាំងពីរ ពិតមិនអាចកាត់ផ្តាច់ពីគ្នាបានឡើយ។ ដូចនេះ កម្ពុជា និង ថៃ គួរតែរួមគ្នាកសាងព្រំដែនសន្តិភាព។