ព័ត៌មានអន្ដរជាតិ

លោក ត្រាំ ផ្ញើលិខិតប្រាប់នាយករដ្ឋមន្ត្រីថៃ ឲ្យដោះស្រាយភាពតានតឹងតាមព្រំដែនជាមួយកម្ពុជា

បានផុស

៩ ខែ មុន

នៅ

ថ្ងៃព្រហស្បតិ៍ ៩ តុលា ២០២៥

ដោយ

Chheang

នៅថ្ងៃព្រហស្បតិ៍ទី៩ខែតុលានេះថា ប្រធានាធិបតីសហរដ្ឋអាមេរិក លោក ដូណាល់ ត្រាំ បានផ្ញើលិខិតមួយច្បាប់ទៅកាន់នាយករដ្ឋមន្ត្រីថៃ លោក Anutin Charnvirakul ដោយបង្ហាញពីបំណងចង់ឃើញប្រទេសថៃ និងកម្ពុជា ដោះស្រាយភាពតានតឹងនៅតាមព្រំដែនដែលកំពុងបន្ត។

លោក ដូណាល់ ត្រាំ និងលោក Anutin Charnvirakul

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារនេះបានធ្វើឡើងមួយថ្ងៃបន្ទាប់ពីនាយករដ្ឋមន្ត្រីថៃបានបញ្ជាក់ថា ថៃមិនខ្វល់ពីការចូលរួមរបស់លោក ត្រាំ ក្នុងដំណើរការសន្តិភាព និងមិនខ្វល់សូម្បីតែប្រធានាធិបតីអាមេរិកទទួលបានរង្វាន់ណូបែលសន្តិភាពសម្រាប់តួនាទីសម្របសម្រួលរបស់គាត់ផងដែរ។

ការប៉ះទង្គិចគ្នាយ៉ាងសាហាវបានផ្ទុះឡើងក្នុងខែកក្កដាតាមបណ្តោយព្រំដែនកម្ពុជា-ថៃ ដែលអាក្រក់បំផុតក្នុងរយៈពេលជាច្រើនទសវត្សរ៍មកនេះ បានបណ្តាលឲ្យមនុស្សស្លាប់ជាច្រើន និងបង្ខំឲ្យពលរដ្ឋរាប់សិបម៉ឺននាក់ភៀសខ្លួនចេញពីផ្ទះសម្បែង។ ប្រទេសទាំងពីរបានយល់ព្រមលើបទឈប់បាញ់ ក្រោមការសម្របសម្រួលមួយផ្នែកដោយលោក ត្រាំ បន្ទាប់ពីការប្រយុទ្ធគ្នារយៈពេលប្រាំថ្ងៃ ប៉ុន្តែចាប់តាំងពីពេលនោះមកបានចោទប្រកាន់គ្នាទៅវិញទៅមកថាបានរំលោភលើបទឈប់បាញ់។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្រោយមកបានគាំទ្រលោក ត្រាំ ឲ្យទទួលរង្វាន់ណូបែលសន្តិភាព ដោយបានសរសើរ«ការទូតប្រកបដោយភាពច្នៃប្រឌិត» របស់គាត់ ដែលបានជួយបញ្ចប់ការប្រយុទ្ធគ្នា។

សម្ដេច ហ៊ុន ម៉ាណែត នាយករដ្ឋមន្ត្រីកម្ពុជា

លោក Anutin បានប្រាប់អ្នកយកព័ត៌មាននៅទីក្រុងបាងកកថា «ប្រធានាធិបតី ត្រាំ បានផ្ញើលិខិតមកខ្ញុំ ដោយបង្ហាញពីបំណងចង់ឃើញប្រទេសទាំងពីរ ថៃ និងកម្ពុជា ចរចាដើម្បីស្វែងរកដំណោះស្រាយចំពោះជម្លោះ។ ខ្ញុំនឹងឆ្លើយតបទៅគាត់តាមគោលជំហររបស់យើង… ហើយប្រសិនបើកម្ពុជាធ្វើតាម ថៃត្រៀមខ្លួនជាស្រេចដើម្បីអនុវត្តតាមដំណើរការ»។

លោក Anutin បានបន្តថា ប្រទេសថៃបានត្រៀមខ្លួនរួចជាស្រេចក្នុងការចរចាប្រសិនបើកម្ពុជាដកអាវុធធុនធ្ងន់ចេញពីតំបន់ព្រំដែន បោសសម្អាតមីន បង្ក្រាបអ្នកបោកប្រាស់តាមប្រព័ន្ធអ៊ីនធឺណែត និងផ្លាស់ប្តូរទីលំនៅពលរដ្ឋរបស់ខ្លួនចេញពីតំបន់ដែលប្រទេសថៃចាត់ទុកជារបស់ខ្លួន។

នៅពេលសួរថាតើការតែងតាំងលោក ត្រាំ របស់កម្ពុជាសម្រាប់រង្វាន់ណូបែលអាចផ្តល់អត្ថប្រយោជន៍ដល់ទីក្រុងភ្នំពេញឬអត់ លោក Anutin បានច្រានចោលគំនិតនេះ។ លោកបានថ្លែងថា៖ «ខ្ញុំគិតតែពីផលប្រយោជន៍របស់ប្រទេសថៃ សុវត្ថិភាពរបស់ប្រជាជនថៃ និងអធិបតេយ្យភាពរបស់ប្រទេសជាតិប៉ុណ្ណោះ។ ប្រសិនបើនរណាម្នាក់ឈ្នះរង្វាន់ គឺល្អសម្រាប់ពួកគេ ប៉ុន្តែវាមិនពាក់ព័ន្ធនឹងអ្វីដែលថៃនឹងធ្វើនោះទេ»៕

ដោយ៖ ឈាង