តើម្ចាស់ជ័យលាភីរង្វាន់ណូបែលសន្តិភាពឆ្នាំ២០២៥ លោកស្រី María Corina Machado ជានរណា?

ទីបំផុត ម្ចាស់ជ័យលាភីរង្វាន់ណូបែលសន្តិភាពឆ្នាំ២០២៥ ត្រូវរកឃើញហើយ គឺបានទៅលើលោកស្រី María Corina Machado មកពីប្រទេសវ៉េណេស៊ុយអេឡា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណៈកម្មាធិការណូបែលបញ្ជាក់ថា ខ្លួនសម្រេចផ្តល់រង្វាន់ណូបែលសន្តិភាពនេះដល់ Machado ​ព្រោះលោកស្រីធ្វើការមិនចេះនឿយហត់ ក្នុងការលើកកម្ពស់សិទ្ធិប្រជាធិបតេយ្យសម្រាប់ប្រជាជនវ៉េណេស៊ុយអេឡា និងការតស៊ូរបស់លោកស្រីដើម្បីសម្រេចបានការផ្លាស់ប្តូរដោយយុត្តិធម៌ និងសន្តិភាពពីរបបផ្តាច់ការទៅលទ្ធិប្រជាធិបតេយ្យ។

ទន្ទឹមនោះ ប្រធានគណៈកម្មាធិការនេះនិយាយថា Machado បានបំពេញតាមលក្ខណៈវិនិច្ឆ័យទាំងអស់។ លោកស្រី​បាន​​នាំ​ក្រុម​ប្រឆាំង​របស់​ប្រទេស​ ឲ្យមក​រួម​គ្នា​ជាមួយ​ជំហរដ៏​រឹងមាំ​ក្នុង​ការ​គាំទ្រឲ្យមាន​ការ​ផ្លាស់​ប្តូរ​ដោយ​សន្តិវិធី​ឆ្ពោះទៅ​កាន់​លទ្ធិប្រជាធិបតេយ្យ។ ម្ចាស់ជយលាភីរូបនេះ តំណាងឲ្យក្តីសង្ឃឹមសម្រាប់អនាគត កន្លែងមួយដែលការពារសិទ្ធិពលរដ្ឋ។ ​នៅ​ថ្ងៃ​អនាគត ​ប្រជាជន​នឹង​មាន​សេរីភាព​ក្នុង​ការ​រស់នៅ​ដោយ​សន្តិភាព។

លោកស្រី Machado កើតនៅថ្ងៃទី៧ខែតុលាឆ្នាំ១៩៦៧ ក្នុងទីក្រុង ការ៉ាកាស នៃប្រទេសវ៉េណេស៊ុយអេឡា។ លោកស្រីរៀនចប់ផ្នែកវិស្វកម្មឧស្សាហកម្មនៅសាកលវិទ្យាល័យ Andrés Bello Catholic និងសញ្ញាបត្រឯកទេសផ្នែកហិរញ្ញវត្ថុ។

មុនចូលប្រឡូកក្នុងឆាកនយោបាយ, នៅឆ្នាំ១៩៩២ លោកស្រីបានបង្កើតមូលនិធិ Atenea Foundation ដែលធ្វើការដើម្បីជួយកុមារគ្មានទីពឹងនៅតាមដងផ្លូវក្នុងទីក្រុងការ៉ាកាស។

នៅឆ្នាំ២០០១ លោកស្រីបានចូលរួមបង្កើតក្រុម Súmate ដែលជាអង្គការមិនមែនរដ្ឋាភិបាលផ្តោតលើការត្រួតពិនិត្យការបោះឆ្នោត និងលើកកម្ពស់តម្លាភាព។

លុះមកដល់ឆ្នាំ២០១០ លោកស្រីបានឈរឈ្មោះជាសមាជិករដ្ឋសភាវ៉េណេស៊ុយអេឡា ហើយឈ្នះដោយទទួលសំឡេងឆ្នោតច្រើនជាងគេក្នុងចំណោមបេក្ខជនទាំងអស់។ លោកស្រីបានបំពេញតួនាទីជាសមាជិកសភារហូតដល់ឆ្នាំ២០១៤ មុនពេលត្រូវបានបណ្តេញចេញ ដោយរបបដឹកនាំ។

នៅឆ្នាំ ២០១២ លោកស្រីបានបង្កើតគណបក្សនយោបាយប្រឆាំងដែលហៅថា VENTE Venezuela ដែលលោកស្រីបន្តដឹកនាំជាអ្នកសម្របសម្រួលថ្នាក់ជាតិ។ លោកស្រីត្រូវបានចាត់ទុកជា មេដឹកនាំគណបក្សប្រឆាំង ដែលមានឥទ្ធិពលបំផុតបន្ទាប់ពីលោក Hugo Chávez ហើយមានប្រជាប្រិយភាពខ្ពស់ក្នុងការប្រឆាំងរដ្ឋាភិបាលលោក ម៉ាឌូរ៉ូ។

នៅខែតុលាឆ្នាំ២០២៣ លោកស្រីបានឈ្នះការបោះឆ្នោតបឋមរបស់គណបក្សប្រឆាំងដោយសំឡេងគាំទ្រលើស ៩២% ដើម្បីក្លាយជាបេក្ខភាពប្រធានាធិបតីសម្រាប់ឆ្នាំ២០២៤។

ទោះជាយ៉ាងណាក៏ដោយ លោកស្រីត្រូវបានរដ្ឋាភិបាលហាមឃាត់ មិនឲ្យឈរឈ្មោះក្នុងការបោះឆ្នោតរយៈពេល១៥ឆ្នាំ ក្រោមបទចោទប្រកាន់មិនច្បាស់លាស់ ពាក់ព័ន្ធការរារាំងដំណើរការប្រជាធិបតេយ្យ។

ដ្បិតត្រូវបានហាមឃាត់ក៏ដោយ លោកស្រីនៅតែបន្តដឹកនាំយុទ្ធនាការគាំទ្របេក្ខភាពដែលជំនួសលោកស្រីគឺលោក Edmundo González Urrutia ដែលបានឈ្នះការបោះឆ្នោតប្រធានាធិបតីខែកក្កដា ឆ្នាំ ២០២៤៕

អត្ថបទ៖ សុខ សុវណ្ណ

ចុចអាន៖ ​តើ​ហេតុអ្វី​បាន​ជា​ ត្រាំ​ មិនទទួលពាន​​ណូបែលសន្តិភាព​​ឆ្នាំ​២០២៥​?​