ព័ត៌មានអន្ដរជាតិ

រដ្ឋបាលត្រាំជូនដំណឹងបញ្ឈប់មន្ត្រីរដ្ឋសហព័ន្ធច្រើនក្រសួង ខណៈការបិទរដ្ឋាភិបាលលើស១១ថ្ងៃ

បានផុស

៨ ខែ មុន

នៅ

ថ្ងៃអាទិត្យ ១២ តុលា ២០២៥

ដោយ

ខណៈពេលដែលការបិទរដ្ឋាភិបាលសហរដ្ឋអាមេរិកបានបន្តអូសបន្លាយរហូតដល់ជាង១០ថ្ងៃរហូតដល់ថ្ងៃអាទិត្យនេះ ប្រធានាធិបតីអាមេរិកលោក ដូណាល់ ត្រាំ (Donald Trump) កាលពីថ្ងៃសុក្របានការពារការសម្រេចចិត្តរបស់ខ្លួនក្នុងការចាប់ផ្តើមការបញ្ឈប់ការងារទ្រង់ទ្រាយធំនៅតាមបណ្តាក្រសួងជាច្រើនរបស់រដ្ឋាភិបាលសហព័ន្ធ។

ប្រធានាធិបតីអាមេរិក លោក ដូណាល់ ត្រាំ ដឹកនាំការប្រជុំនៅសេតវិមាន។ WH

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរំសាយបុគ្គលិករដ្ឋសហព័ន្ធដែលត្រូវបានគេរំពឹងថា មានរហូតដល់រាប់ពាន់នាក់ ដោយលោកប្រធានាធិបតី ដូណាល់ ត្រាំ បានដាក់ការស្តីបន្ទោសដល់គណបក្សប្រជាធិបតេយ្យចំពោះការបង្ខំ ឲ្យប្រធានាធិបតី ដូណាល់ ត្រាំ សម្រេចចិត្តបែបនេះ។

ការកាត់បន្ថយការងារត្រូវបានបញ្ជាក់នៅ ក្នុងក្រសួងរតនាគារ ក្រសួងសុខាភិបាល និងភ្នាក់ងារធនធានមនុស្ស ភ្នាក់ងារចំណូលផ្ទៃក្នុង ក្រសួងអប់រំ ក្រសួងពាណិជ្ជកម្ម និងភ្នាក់ងារផ្នែកសន្តិសុខតាមអ៊ីនធឺណិតរបស់ក្រសួងមហាផ្ទៃ (សន្តិសុខមាតុភូមិ)។ ចំនួនសរុបនៃមន្ត្រីដែលរងផលប៉ះពាល់នៅតែមិនច្បាស់លាស់ ប៉ុន្តែរបាយការណ៍ដំបូងបង្ហាញថា បុគ្គលិកសហព័ន្ធរាប់ពាន់នាក់បានទទួលការជូនដំណឹងអំពីការបញ្ចប់ការងាររួចហើយ។

កាលថ្ងៃសុក្រ មន្ត្រីនៃស្ថាប័នខាងលើបានទទួលសារអេឡិចត្រូនិកខ្លះៗរួចទៅហើយ អំពីផែនការបញ្ឈប់ពួកគេ។ រដ្ឋបាលសហរដ្ឋអាមេរិករបស់លោក ដូណាល់ ត្រាំ បាន មានផែនការកាត់បន្ថយបុគ្គលិកតាំងពីចូលកាន់អំណាចមកម៉្លេះ ជាពិសេសក្រោមការបង្កើនក្រសួងប្រសិទ្ធភាពរដ្ឋាភិបាល ដែលដឹកនាំដោយលោក Elon Musk ដែលក្រោយមកបានលាលែងពីអ្នកដឹកនាំក្រសួងនេះវិញ។

ខណៈដែលច្បាប់ចំណាយរបស់ប្រធានាធិបតី លោក ដូណាល់ ត្រាំ មិនទទួលបានការគាំទ្រគ្រប់គ្រាន់ចំនួន៦០សំឡេងក្នុងចំណោមសមាជិកព្រឹទ្ធសភា១០០រូប ដោយក្នុងនោះ បក្សសាធារណៈរបស់លោក ត្រាំ មាន៥៣សំឡេង គណបក្សប្រជាធិបតេយ្យមាន ៤៥សំឡេង និងព្រឹទ្ធសមាជិកឯករាជ្យ២រូប ហើយការជំទាស់ចេញពីគណបក្សប្រជាធិបតេយ្យដែលទាមទារឲ្យ លោក ត្រាំ បញ្ចូលកម្មវិធីថែទាំសុខភាពទៅក្នុងច្បាប់វិញ។

លោគដូណាល់ ត្រាំ បានអះអាងពីការខ្ជះខ្ជាយលុយរាប់ពាន់លានដុល្លារទៅលើកម្មវិធីសុខភាព Obamacare ដែលបន្ទុចបង្អាក់ការវិនិយោគដោយសារតែកាតព្វកិច្ចនិយោជកច្រើនសម្រាប់ការបង់ធានារ៉ាប់រងឲ្យបុគ្គលិកនិយោជិត ប៉ុន្តែគណបក្សប្រជាធិបតេយ្យវិញចាត់ទុកថា កញ្ចប់ថែទាំសុខភាពនោះជាការទទួលបានសេវាដ៏មានអត្ថប្រយោជន៍ចំពោះអ្នកមានចំណូលទាប និងមធ្យម។

លោក ដូណាល់ ត្រាំ ត្រូវប្រព័ន្ធផ្សព្វផ្សាយ ស្រង់សម្តី ដូចបាននិយាយថា ការបញ្ឈប់បុគ្គលិករដ្ឋសហព័ន្ធជាការជំរុញដោយ«គណបក្សលទ្ធិប្រជាធិបតេយ្យ» ដោយអះអាងថាសមាជិកសភាបក្សប្រឆាំងបានរារាំងកិច្ចខិតខំប្រឹងប្រែងដើម្បីផ្តល់ថវិកាដល់រដ្ឋាភិបាល។

គាត់បានប្រាប់អ្នកយកព័ត៌មាននៅឯសេតវិមានថា «ពួកគេបានចាប់ផ្តើមរឿងនេះ»៕

រ៉ាន់ រើយ