លោក គីម ជុងអ៊ុន ប្រកាស​ប្តេជ្ញាពង្រឹងទំនាក់ទំនងកាន់តែស៊ីជម្រៅជាមួយប្រទេសចិន

មេដឹកនាំកូរ៉េខាងជើង លោក គីម ជុងអ៊ុន បានសន្យាពង្រឹងទំនាក់ទំនងជាមួយប្រទេសចិនបន្ថែមទៀត ដោយសម្តែងការដឹងគុណចំពោះប្រធានាធិបតីចិន ស៊ី ជីនពីង សម្រាប់សារលិខិតរបស់គាត់ ក្នុងពិធីរំលឹកខួបលើកទី​៨០​​នៃការបង្កើតគណបក្សពលករកូរ៉េ។ នេះបើតាមប្រព័ន្ធផ្សព្វផ្សាយរដ្ឋ KCNA ដែល​បានរាយការណ៍​នា​ថ្ងៃសុក្រ​ទី​១៧​ខែតុលា​ឆ្នាំ​២០២៥។

នៅក្នុងសំបុត្រដែលបានផ្ញើកាលពីថ្ងៃព្រហស្បតិ៍ លោក គីម បានថ្លែងអំណរគុណចំពោះលោក ស៊ី សម្រាប់ការថ្លែងអបអរសាទររបស់គាត់ និងបានបញ្ជាក់ជាថ្មីនូវការប្តេជ្ញាចិត្តរបស់ទីក្រុងព្យុងយ៉ាង ក្នុងការជំរុញទំនាក់ទំនងមិត្តភាព«ប្រពៃណី និងកិច្ចសហប្រតិបត្តិការ» រវាងប្រជាជាតិទាំងពីរ។

លោក គីម បាន​លើក​ឡើង​ថា «វាគឺជាជំហរដ៏រឹងមាំរបស់គណបក្ស និងរដ្ឋាភិបាលរបស់យើង ដែលយើងនឹងបន្តទំនាក់ទំនងប្រពៃណី និងកិច្ចសហប្រតិបត្តិការរវាងកូរ៉េខាងជើង និងចិន និងអភិវឌ្ឍបន្ថែមទៀត»។

លោក​បាន​បន្ថែម​ថា ភាគី​ទាំង​ពីរ​នឹង​ធ្វើ​ការ​រួម​គ្នា ​ដើម្បី​លើក​កម្ពស់​សុខុមាលភាព​របស់​ប្រជាជន​ និង«ការពារ​ស្ថិរភាព​នៃ​តំបន់ និង​ពិភពលោក»។

ខណៈពេលដែលលោក គីម មិនបាននិយាយ​សំដៅ​ដោយផ្ទាល់ទៅកាន់ឧបទ្វីបកូរ៉េ ឬតៃវ៉ាន់ អ្នកវិភាគបានលើកឡើង​ថា ការកត់សម្គាល់របស់គាត់ជាសញ្ញាបន្តគាំទ្រចំពោះមុខតំណែងក្នុងតំបន់របស់ទីក្រុងប៉េកាំង និងឆន្ទៈក្នុងការសម្របសម្រួលជាមួយប្រទេសចិនលើបញ្ហាផលប្រយោជន៍រួម។

សារនេះ បានធ្វើឡើងបន្ទាប់ពីកិច្ចប្រជុំនៅទីក្រុងព្យុងយ៉ាងកាលពីសប្តាហ៍មុនរវាងនាយករដ្ឋមន្ត្រីកូរ៉េខាងជើង Pak Thae-song និងនាយករដ្ឋមន្ត្រីចិន Li Qiang ក្នុងអំឡុងពេលដែលលោក Pak បានសម្តែងការគាំទ្រចំពោះកិច្ចខិតខំប្រឹងប្រែងរបស់ប្រទេសចិនក្នុងការ«ការពារយ៉ាងរឹងមាំនូវផលប្រយោជន៍ស្នូលរបស់ខ្លួន រួមទាំងបញ្ហាតៃវ៉ាន់ផងដែរ»។

មួយ​វិញទៀត ការផ្សព្វផ្សាយ​អំពី​ការ​បង្កើន​ចំណង​មិត្តភាព​នេះ​របស់លោក គីម ធ្វើឡើងបន្ទាប់ពីដំណើរទស្សនកិច្ចរបស់លោកទៅកាន់ទីក្រុងប៉េកាំងកាលពីខែមុន ជាកន្លែងដែលលោកបានចូលរួមពិធីព្យុហយាត្រាយោធារបស់ប្រទេសចិន និងបានជួបពិភាក្សាលើកដំបូងជាមួយលោក ស៊ី ក្នុងរយៈពេលជាង​៦​ឆ្នាំ ដែលជាសញ្ញាបង្ហាញថា ទំនាក់ទំនងរវាងប្រទេសទាំងពីរត្រូវបាន​បន្ត​ឡើង​វិញ បន្ទាប់​ពី​ភាព​ស្ងប់ស្ងាត់​ ចំពេលទំនាក់ទំនង​​​​កាន់តែជិតស្និទ្ធរបស់ក្រុងព្យុងយ៉ាងជាមួយទីក្រុងមូស្គូ៕

ដោយ៖ ឈាង