ព័ត៌មានអន្ដរជាតិ

អ៊ីស្រាអែលទទួលសាកសពចំណាប់ខ្មាំងម្នាក់ទៀតពីហ្គាហ្សា ខណៈភាពតានតឹងបទឈប់បាញ់កើនឡើង

បានផុស

៨ ខែ មុន

នៅ

ថ្ងៃសៅរ៍ ១៨ តុលា ២០២៥

ដោយ

Chheang

អ៊ីស្រាអែល បាននិយាយនៅព្រឹកថ្ងៃសៅរ៍ទី១៨ខែតុលានេះថា កាកបាទក្រហមបានប្រគល់សាកសពចំណាប់ខ្មាំងម្នាក់ទៀតមកពីតំបន់ហ្គាហ្សា ខណៈដែលភាពតានតឹងកាន់តែកើនឡើងទោះកំពុងស្ថិតក្រោមកិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហាម៉ាសក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជូននេះ ជាសាកសពចំណាប់ខ្មាំងទី១០ ដែលអ៊ីស្រាអែលបានទទួល ក្នុងចំណោមសាកសពចំណាប់ខ្មាំង២៨នាក់ ដែលត្រូវបានគេជឿថាត្រូវបានឃាត់ទុកនៅក្នុងតំបន់ហ្គាហ្សា។ ក្រុមហាម៉ាស បានលើកឡើងថា ខ្លួនប្រឈមនឹង«បញ្ហាបច្ចេកទេស» ក្នុងការស្វែងរកទីតាំងផ្សេងទៀត ដោយលើកឡើងពីតម្រូវការសម្រាប់គ្រឿងចក្រធុនធ្ងន់ និងឧបករណ៍ជីកកកាយ ដើម្បីសង្គ្រោះសាកសពដែលកប់នៅក្រោមគំនរបាក់បែក។

យ៉ាងណាមិញ អ៊ីស្រាអែលបានចោទក្រុមហាម៉ាសថាបានធ្វើឲ្យកិច្ចព្រមព្រៀងជាប់គាំង ហើយបានព្រមានថា ក្រុមនេះ«ជិតអស់ពេលហើយ»។ ក្រុមហាម៉ាសទទូចថា ខ្លួននៅតែប្តេជ្ញាចិត្តចំពោះបទឈប់បាញ់ និងប្រគល់សាកសពទាំងអស់ដែលនៅសេសសល់។

ភាពតានតឹងនេះ ឆ្លុះបញ្ចាំងពីភាពផុយស្រួយនៃបទឈប់បាញ់ ដែលជាដំណាក់កាលដំបូងនៃផែនការ២០ចំណុចរបស់ប្រធានាធិបតីអាមេរិក ដូណាល់ ត្រាំ ដើម្បីបញ្ចប់សង្រ្គាម ដែលបានបញ្ឈប់ការប្រយុទ្ធគ្នាយ៉ាងសាហាវ ចាប់តាំងពីចូលជាធរមានកាលពីសប្តាហ៍មុន។

នៅក្នុងសន្និសីទសារព័ត៌មានមួយក្នុងទីក្រុងអង់ការ៉ា រដ្ឋមន្ត្រីការបរទេសតួកគី លោក Hakan Fidan បានព្រមានថា អ៊ីស្រាអែលអាចនឹងប្រើការពន្យារពេលរបស់ក្រុមហាម៉ាសជាលេសដើម្បីបន្តធ្វើអរិភាពឡើងវិញ។ លោកបាននិយាយថា «តើអ៊ីស្រាអែលនឹងប្រើអសមត្ថភាពរបស់ក្រុមហាម៉ាស ដើម្បីកំណត់ទីតាំងសាកសពដែលបន្សល់ទុកនៅក្រោមគំនរបាក់បែក ជាលេស និងបំបែកបទឈប់បាញ់ដែរឬទេ? មានការព្រួយបារម្ភនៅក្នុងសហគមន៍អន្តរជាតិជុំវិញរឿងនេះ»។

នៅព្រឹកថ្ងៃសុក្រ ក្រុមហាម៉ាសបានជំរុញឲ្យអ្នកសម្របសម្រួលអេហ្ស៊ីប កាតា និងតួកគី ពន្លឿនដំណាក់កាលបន្ទាប់នៃបទឈប់បាញ់ រួមទាំងការបើកព្រំដែនហ្គាហ្សាឡើងវិញ អនុញ្ញាតឲ្យមានការចែកចាយជំនួយ ចាប់ផ្តើមការកសាងឡើងវិញ និងការបញ្ចប់ការដកទ័ពរបស់អ៊ីស្រាអែល។

ទោះបីជាមានបទឈប់បាញ់ក៏ដោយ ភ្នាក់ងារការពារស៊ីវិលរបស់ហ្គាហ្សាបានប្រាប់ថា មនុស្ស១១នាក់ រួមទាំងកុមារ៧នាក់ និងស្ត្រី៣នាក់ត្រូវបានសម្លាប់កាលពីថ្ងៃសុក្រ នៅពេលដែលកងកម្លាំងអ៊ីស្រាអែលបានបើកការបាញ់ប្រហារទៅលើរថយន្តមួយនៅភាគអាគ្នេយ៍នៃទីក្រុងហ្គាហ្សា។ យោធាអ៊ីស្រាអែលមិនបានធ្វើអត្ថាធិប្បាយលើរបាយការណ៍នេះទេ។

រថយន្តកាកបាទក្រហមដែលទទួលសាកសពចំណាប់ខ្មាំងជនជាតិអ៊ីស្រាអែល (រូបថត៖ AP)

ការដោះដូរចំណាប់ខ្មាំងត្រូវបានសម្របសម្រួលដោយកាកបាទក្រហម ដោយបច្ចុប្បន្នចំណាប់ខ្មាំងនៅរស់ចំនួន២០នាក់ដែលត្រូវបានចាប់ខ្លួនក្នុងកំឡុងថ្ងៃទី៧ខែតុលាឆ្នាំ២០២៣ ត្រូវបានដោះលែងកាលពីដើមសប្តាហ៍នេះ។

អ៊ីស្រាអែលបានប្រកាសកាលពីថ្ងៃព្រហស្បតិ៍ថា ខ្លួនកំពុងរៀបចំបើកច្រកទីក្រុង Rafah ឡើងវិញជាមួយអេហ្ស៊ីប ដើម្បីអនុញ្ញាតឲ្យមានចលនាចេញចូលពីតំបន់ហ្គាហ្សា ប៉ុន្តែមិនទាន់បានកំណត់កាលបរិច្ឆេទទេ ខណៈដែលភាគីទាំងពីរនៅតែចោទប្រកាន់គ្នាទៅវិញទៅមកអំពីការរំលោភបទឈប់បាញ់៕

ដោយ៖ ឈាង