ព័ត៌មានអន្ដរជាតិ

ម្ចាស់ណូបែលសន្តិភាព២០២៥ គាំទ្រអ៊ីស្រាអែលក្នុងគោលនយោបាយការបរទេស

បានផុស

៩ ខែ មុន

នៅ

ថ្ងៃសៅរ៍ ១៨ តុលា ២០២៥

ដោយ

ម្ចាស់ពានរង្វាន់ណូបែលសន្តិភាពឆ្នាំ២០២៥ និងជាបេក្ខជនប្រឆាំងដ៏មានប្រជាប្រិយភាពក្នុងប្រទេសវេណេស៊ុយអេឡា លោកស្រី ម៉ារៀ កូរីណា ម៉ាឆាដូ (Maria Corina Machado) បានបង្ហាញការគាំទ្រដល់ប្រទេសអ៊ីស្រាអែល ខណៈប្រទេសជាច្រើននៅក្នុងពិភពលោកងាកទៅគាំទ្រប៉ាឡេស្ទីន និងថ្កោលទោសអ៊ីស្រាអែលចំពោះសង្គ្រាមដ៏ព្រៃផ្សៃនៅតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការផ្សាយរបស់ទីភ្នាក់ងារព័ត៌មានរ៉យទ័រ ការិយាល័យនាយករដ្ឋមន្ត្រីអ៊ីស្រាអែលបានឲ្យដឹងកាលថ្ងៃសុក្រថា មេដឹកនាំប្រឆាំងដ៏មានប្រជាប្រិយនៃប្រទេសវេណេស៊ុយអេឡា និងជាអ្នកឈ្នះរង្វាន់ណូបែលសន្តិភាពថ្មី លោកស្រី លោកស្រី ម៉ារៀ កូរីណា ម៉ាឆាដូ បានសម្តែងការគាំទ្រដល់អ៊ីស្រាអែល។ ការគាំទ្រនេះ បានស្តែងឲ្យឃើញនៅក្នុងការសន្ទនាតាមទូរស័ព្ទជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu)។

សេចក្តីថ្លែងការណ៍ដដែលនោះ បានបន្តថា លោកស្រី ម៉ាឆាដូ បានស្វាគមន៍ការវិលត្រឡប់របស់ចំណាប់ខ្មាំងអ៊ីស្រាអែលក្រោមកិច្ចព្រមព្រៀងឈប់បាញ់នៅហ្គាហ្សា និងបានសម្តែងការកោតសរសើរចំពោះកិច្ចខិតខំប្រឹងប្រែងរបស់អ៊ីស្រាអែលប្រឆាំងនឹងអ៊ីរ៉ង់ ដែលលោកស្រីបានពិពណ៌នាថាជាការគំរាមកំហែងដល់ប្រទេសទាំងពីរ។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ដាក់កម្រងផ្កាឧទ្ទិសដល់ចំណាប់ខ្មាំងស្លាប់។FB

ជាថ្នូរនឹងការគាំទ្ររដ្ឋាភិបាលអ៊ីស្រាអែល លោក ណេតានយ៉ាហ៊ូ បានអបអរសាទរលោកស្រី ម៉ាឆាដូ ចំពោះការឈ្នះរង្វាន់ណូបែលរបស់លោកស្រី ហើយបានសរសើរការខិតខំប្រឹងប្រែងរបស់លោកស្រីក្នុងការលើកកម្ពស់លទ្ធិប្រជាធិបតេយ្យ និងសន្តិភាព។

ទីភ្នាក់ងាររ៉យទ័រ បានរាយការណ៍ថា លោកស្រី ម៉ាឆាដូ ធ្លាប់បានសន្យាថានឹងផ្លាស់ប្តូរស្ថានទូតវេណេស៊ុយអេឡាក្នុងប្រទេសអ៊ីស្រាអែលទៅកាន់ទីក្រុងហ្សេរុយសាឡឹម ប្រសិនបើចលនាតស៊ូរបស់លោកស្រីឡើងកាន់អំណាច។

មេដឹកនាំប្រឆាំងរបស់វេណេស៊ុយអេឡារូបនេះ បានដើរស្របគ្នាជាមួយមេដឹកនាំអាមេរិកឡាទីនផ្សេងទៀតដែលបានប្រកាន់ជំហរគាំទ្រអ៊ីស្រាអែល រួមទាំងប្រធានាធិបតីអាហ្សង់ទីន លោក Javier Milei និងអតីតប្រធានាធិបតីប្រេស៊ីល លោក Jair Bolsonaro ដែលកំពុងជាប់ទោសដោយសារតែការប៉ងធ្វើរដ្ឋប្រហារក្រោយចាញ់ឆ្នោត។ ប្រទេសភាគច្រើនមានស្ថានទូតរបស់ពួកគេនៅក្នុងទីក្រុង Tel Aviv ដោយជៀសវាងទីក្រុង ហ្សេរុយសាឡឹម ដែលប៉ាឡេស្ទីនទាមទារជារដ្ឋធានីនៃរដ្ឋឯករាជ្យនាពេលអនាគត។

លោកស្រី ម៉ាឆាដូ បានស្វែងរកទំនាក់ទំនងកាន់តែជិតស្និទ្ធជាមួយអ៊ីស្រាអែល និង ណេតានយ៉ាហ៊ូ ជាយូរមកហើយ ដោយដាក់ជំហរនយោបាយរបស់លោកស្រី ផ្ទុយពីរដ្ឋាភិបាលបច្ចុប្បន្នរបស់ប្រទេសវេណេស៊ុយអេឡា ដឹកនាំដោយប្រធានាធិបតី ម៉ាឌូរ៉ូ ដែលរក្សាទំនាក់ទំនងល្អូកល្អើនជាមួយអ៊ីរ៉ង់ និងសត្រូវផ្សេងទៀតរបស់អ៊ីស្រាអែល៕

រ៉ាន់ រើយ