ព័ត៌មានអន្ដរជាតិ

ពេលទៅដល់ប្រទេសភ្លាម អានុទីន ប្រឈមសំណួរដំបូងរឿងចុះហត្ថលេខារ៉ែកម្រជាមួយអាមេរិក

បានផុស

៦ ខែ មុន

នៅ

ថ្ងៃពុធ ២៩ តុលា ២០២៥

ដោយ

ក្រោយវិលត្រឡប់ចូលដល់ប្រទេសភ្លាម នាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) បានប្រឈមទៅនឹងសំណួរជុំវិញការចុះហត្ថលេខាលើរ៉ែកម្រជាមួយសហរដ្ឋអាមេរិក ដោយមិនបានប្រកាសដំណឹងជាសាធារណៈជាមុនដល់ប្រជាជនថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការមិនប្រកាសជួនដំណឹងជាសាធារណៈមុនការចុះហត្ថលេខារវាងនាយករដ្ឋមន្ត្រីថៃ លោក អានុទីន ឆានវីរៈគុល និង ប្រធានាធិបតីសហរដ្ឋអាមេរិក លោក ដូណាល់ ត្រាំ បានបង្កឲ្យមានការចោទជាសំណួរជុំវិញរដ្ឋាភិបាលរបស់លោក អានុទីន ដែលមានសុពលភាពត្រឹមតែ៤ខែ និងអាចនាំទៅដល់ការតវ៉ាផ្នែកនយោបាយថែមទៀត។

យោងការដកស្រង់សម្តីដោយសារព័ត៌មានថៃ The Nation ពេលចុះចតនៅព្រលានយន្តហោះដនមឿងនាទីក្រុងបាងកកនៅព្រលប់ថ្ងៃអង្គារទី២៨ តុលា ពេលត្រឡប់ពីកិច្ចប្រជុំកំពូលអាស៊ាននៅទីក្រុងគូឡាឡាំពួ ប្រទេសម៉ាឡេស៊ី លោក អានុទីន បានទទួលសំណួរដំបូងអំពីការចុះហត្ថលេខាលើអនុស្សរណៈយោគយល់គ្នា (MOU) ជាមួយសហរដ្ឋអាមេរិកជុំវិញអាជីវកម្មរ៉ែកម្រនេះ។

លោក អានុទីន បានពន្យល់ថា MOU មានគោលបំណងជាក្របខណ្ឌត្រៀមទុកមុនក្នុងករណីដែលមានកំណប់រ៉ែកម្រស្រាវជា្រវឃើញនិងដែលអាចធ្វើពាណិជ្ជកម្មបាននៅក្នុងប្រទេសថៃនាពេលអនាគត»។

លោក អានុទីន បន្តថា៖«ប្រសិនបើធនធានទាំងនោះត្រូវបានរកឃើញ ពួកគេអាចប្រើប្រាស់ដើម្បីផ្តល់ផលប្រយោជន៍ដល់ប្រទេស។ យើងនឹងសិក្សារួមគ្នា និងស្វែងរកកិច្ចសហប្រតិបត្តិការជាមួយសហរដ្ឋអាមេរិក ជាពិសេសដោយសារតែពួកគេមានបច្ចេកវិទ្យាទំនើបជាង និងមានទីផ្សារប្រសើរជាង»។

រដ្ឋាភិបាលរបស់ លោក អានុទីន ហាក់កំពុងប្រឈមចរន្តតវ៉ាផ្នែកនយោបាយយ៉ាងខ្លាំង ក្រោយពីការចុះហត្ថលេខាលើរ៉ែកម្រនេះ ដោយសារតែ មន្ត្រីរដ្ឋាភិបាលរបស់លោក បានចេញមកបកស្រាយជាបន្តបន្ទាប់ ក្រោយការចុះហត្ថលេខានោះបានត្រឹមតែ១ថ្ងៃ។

លោក អានុទីន និយាយជាមួយស្តេចប្រ៊ុយណេក្នុងពេលកិច្ចប្រជុំកំពូលអាស៊ាន។ REUTERS

លោក អានុទីន បាននិយាយសម្រាលពេលមកដល់ប្រទេសថា កិច្ចព្រមព្រៀងនេះមិនមានលក្ខណៈធ្វើអាជីវកម្មផ្តាច់មុខឬផ្តល់សម្បទាននោះទេ ដោយអះអាងថា MOU នេះគ្រាន់តែជាមូលដ្ឋានគ្រឹះសម្រាប់កិច្ចសហប្រតិបត្តិការនាពេលអនាគត។

ប្រសិនបើថៃដំណើរការរ៉ែកម្រជាយថាហេតុ យើងនឹងបើកចំហរសម្រាប់ការស្រាវជ្រាវរួមគ្នា ឬភាពជាដៃគូ។ មិនមានកាតព្វកិច្ចផ្លូវច្បាប់អ្វីទាំងអស់។ ប្រសិនបើប្រទេសថៃអាចគ្រប់គ្រងធនធាន ធ្វើទីផ្សារ និងអភិវឌ្ឍបច្ចេកវិទ្យាដោយឯករាជ្យ យើងអាចបញ្ចប់ MOU ហើយដំណើរការដោយខ្លួនឯង»៕

យោងសេចក្តីសង្ខេបព័ត៌មានរបស់សេតវិមាន លោកប្រធានាធិបតី លោក ដូណាល់ ត្រាំ និងនាយករដ្ឋមន្ត្រី អានុទីន ឆានវីរៈគុល បានចុះហត្ថលេខាលើ MOU ដែលនឹងធានា និងធ្វើពិពិធកម្មការផ្គត់ផ្គង់រ៉ែកម្រសំខាន់ៗ លើកកម្ពស់ភាពជាដៃគូរវាងក្រុមហ៊ុនអាមេរិក និងថៃ និងបង្កើនភាពធន់នៃខ្សែសង្វាក់ផ្គត់ផ្គង់សកល៕

រ៉ាន់ រើយ