តៃវ៉ាន់ ព្រួយបារម្ភពីការថយចុះការគាំទ្ររបស់សហរដ្ឋអាមេរិក ខណៈ ត្រាំ និង ស៊ី ជីនពីង ជួបគ្នា

ខណៈពេលដែលប្រធានាធិបតីអាមេរិក ដូណាល់ ត្រាំ ធ្វើដំណើរទៅកាន់ប្រទេសកូរ៉េខាងត្បូងសម្រាប់កិច្ចប្រជុំផ្ទាល់លើកដំបូងរបស់លោកក្នុងអាណត្តិទីពីរជាមួយមេដឹកនាំចិនលោក ស៊ី ជីនពីង តៃវ៉ាន់កំពុងមានការថប់បារម្ភកាន់តែខ្លាំងឡើងអំពីថាតើសហរដ្ឋអាមេរិកនឹងបន្តគាំទ្រខ្លួនយ៉ាងរឹងមាំឬអត់។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី៣០ខែតុលា។

លោក ត្រាំ បាននិយាយថា លោកនឹងមិនច្រានចោលគំនិតនៃការពិភាក្សាអំពីតៃវ៉ាន់ជាផ្នែកមួយនៃកិច្ចចរចាពាណិជ្ជកម្មរវាងសហរដ្ឋអាមេរិក និងចិននោះទេ ដែលបានបង្កើនការភ័យខ្លាចថា លោកអាចនឹងប្រើប្រាស់តៃវ៉ាន់ជាបន្ទះចរចាសម្រាប់កិច្ចព្រមព្រៀងកាន់តែប្រសើរជាមួយទីក្រុងប៉េកាំង។

ប៉ុន្តែបើរដ្ឋមន្ត្រីការបរទេស Marco Rubio បាននិយាយថា សហរដ្ឋអាមេរិកនឹងមិនធ្វើកិច្ចព្រមព្រៀងពាណិជ្ជកម្មណាមួយដែលធ្វើឱ្យចុះខ្សោយជំហររបស់តៃវ៉ាន់ឡើយ។ រដ្ឋាភិបាលតៃវ៉ាន់នៅតែមានការប្រុងប្រយ័ត្នជាសាធារណៈ ប៉ុន្តែមានសុទិដ្ឋិនិយម ដោយចង្អុលបង្ហាញសេចក្តីថ្លែងការណ៍របស់លោក Rubio ថាជាការធានា។

យ៉ាងណាក៏ដោយ ការថប់បារម្ភរបស់ទីក្រុងតៃប៉ិបានកើនឡើងក្នុងអាណត្តិទីពីររបស់លោក ត្រាំ ខណៈដែលរដ្ឋបាលរបស់លោកបានផ្អាកការដឹកជញ្ជូនអាវុធមួយចំនួន និងធ្វើឱ្យទំនាក់ទំនងផ្លូវការកាន់តែពិបាក។ ក្នុងអាណត្តិទីមួយរបស់លោក ត្រាំ ត្រូវបានគេមើលឃើញថាគាំទ្រយ៉ាងខ្លាំងចំពោះតៃវ៉ាន់ ដោយអនុម័តការលក់អាវុធធំៗ ។ ប៉ុន្តែការកត់សម្គាល់ថ្មីៗរបស់លោកដែលចោទប្រកាន់តៃវ៉ាន់ថាលួចឧស្សាហកម្មបន្ទះឈីបរបស់សហរដ្ឋអាមេរិក និងជំហរដ៏ស្ងប់ស្ងាត់របស់លោកចំពោះទីក្រុងប៉េកាំង បាននាំឱ្យមនុស្សជាច្រើននៅក្នុងទីក្រុងតៃប៉ិសួរថាតើទីក្រុងវ៉ាស៊ីនតោននៅតែបន្តគាំទ្រតៃវ៉ាន់យ៉ាងរឹងមាំទៀតឬយ៉ាងណា៕

អត្ថបទ៖ ប៊ុន សុភាព