នៅថៃ ល្បីរឿងគ្រូពេទ្យចាក់​ទឹកក្តៅ​លើ​ក្មេងជនជាតិឡាវ ខណៈគេសង្ស័យថា កើតជំងឺផ្លូវចិត្ត

ទំព័រហ្វេសប៊ុក Than Pao កាលពីព្រឹកថ្ងៃព្រហស្បតិ៍ ទី៣០ ខែតុលា ឆ្នាំ២០២៥ បានទម្លាយនូវករណីគ្លីនិកមួយក្នុង ខេត្តឈុនបុរី ប្រទេសថៃ ដែលវេជ្ជបណ្ឌិតម្នាក់បានចាក់ទឹកក្តៅទីលើក្មេងប្រុសជនជាតិឡាវអាយុ ៣ ឆ្នាំម្នាក់ ដោយអះអាងថា ដើម្បីព្យាបាលជំងឺប្រកាច់។ ប៉ុន្តែគេដាក់ការសង្ស័យថា គ្រូពេទ្យនោះ ទំនងជាកំពុងមានជំងឺផ្លូវចិត្ត ឬជំងឺវិកលចរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចេញផ្សាយពីសារព័ត៌មាន thethaiger ដោយទទួលបានរបាយការណ៍ពីទំព័រ Than Pao បង្ហាញថា វេជ្ជបណ្ឌិតដែលពាក់ព័ន្ធហេតុការណ៍នេះ គឺជាគ្រូពេទ្យពិតប្រាកដដែលមានអាជ្ញាប័ណ្ណវិជ្ជាជីវៈត្រឹមត្រូវ ហើយគ្លីនិកក៏ត្រូវបានចុះបញ្ជីស្របច្បាប់ផងដែរ។

របាយការណ៍​បាន​បញ្ជាក់​ថា វេជ្ជបណ្ឌិត​រូប​នេះ​មានជំងឺផ្លូវចិត្តជា​យូរ​មក​ហើយ ប៉ុន្តែ​មិន​បាន​ទទួល​ការ​ព្យាបាល​ត្រឹមត្រូវ​ទេ។ ទំព័រដដែលបាន​ចង្អុល​បង្ហាញ​ថា នេះ​ជា​ស្ថានភាព​ដ៏​គ្រោះថ្នាក់​ខ្លាំង​ណាស់ ព្រោះ​អ្នកជំងឺ​ដែល​ស្វែងរក​ការ​ព្យាបាល​ទុកចិត្ត​លើ​ពាក្យវេជ្ជបណ្ឌិត ប៉ុន្តែ​កំពុង​ធ្វើ​ឲ្យ​ខ្លួនឯង​ប្រឈម​នឹង​ហានិភ័យ។

ទាក់ទងនឹងករណីនេះ នៅថ្ងៃពុធ ទី២៩ ខែតុលា ឪពុករបស់ក្មេងប្រុសជនជាតិឡាវ បានដាក់ពាក្យបណ្តឹង និងរបាយការណ៍របស់ប៉ូលិស បន្ទាប់ពីបាននាំកូនប្រុសទៅគ្លីនិកឯកជនមួយក្នុងឃុំបូវីន ស្រុកស៊ីរ៉ាចា ខេត្តឈុនបុរី ដើម្បីព្យាបាលគ្រុនក្តៅ និងប្រកាច់ កាលពីថ្ងៃទី២៤ ខែតុលា ឆ្នាំ២០១៥។

ឪពុកម្តាយក្មេងបានចោទប្រកាន់ថា គ្រូពេទ្យបានចាក់ថ្នាំឲ្យកូនពួកគាត់ បន្ទាប់មក គ្រូពេទ្យបានបញ្ជាឲ្យជំនួយការចាក់ទឹកក្តៅឧណ្ហៗលើទ្រូងរបស់កុមារម្តងហើយម្តងទៀត ដើម្បីជំរុញឲ្យកុមារមានស្មារតី។ តែសកម្មភាពនេះ បានបណ្តាលឲ្យរលាកធ្ងន់ធ្ងរ និងពងបែកនៅលើដងខ្លួនរបស់ក្មេង។

យ៉ាងណាមិញ គ្លីនិកនេះបានជំទាស់នឹងការអះអាងនេះ ដោយទទួលស្គាល់ថាបានប្រើប្រាស់ទឹកក្តៅមែន ប៉ុន្តែគ្រាន់តែជាវិធីសាស្ត្រព្យាបាល។ គ្លីនិកក៏បានចោទប្រកាន់ជនរងគ្រោះពីបទ ប្រឌិតរឿងដើម្បីជំរិតទារប្រាក់ ហើយបានបញ្ជាក់ថាពួកគេមិនខ្លាចត្រូវប្តឹងទេ។

ការិយាល័យអភិវឌ្ឍន៍សង្គម និងសន្តិសុខមនុស្សខេត្តឈុនបុរី (CPHO) បានទទួលពាក្យបណ្តឹងរបស់ក្រុមគ្រួសារ ដើម្បីរៀបចំកោះហៅបុគ្គលពាក់ព័ន្ធមកផ្តល់សក្ខីកម្ម និងផ្ទៀងផ្ទាត់អាជ្ញាប័ណ្ណរបស់ពួកគេ។ តាមរបាយការណ៍ថា PHO អាចពិចារណាបញ្ជាឲ្យគ្លីនិកផ្អាកសេវាកម្មបណ្តោះអាសន្ន ក្នុងអំឡុងពេលស៊ើបអង្កេត ក្រោមហេតុផល វិធីសាស្រ្តព្យាបាលរបស់គ្លីនិកគឺពោរពេញទៅដោយការអះអាងចម្លែក និងបានរំលោភលើគោលការណ៍វេជ្ជសាស្ត្រយ៉ាងធ្ងន់ធ្ងរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ថៃ រកឃើញសារធាតុពុលដាក់ក្នុងប្រេងកូឡា អាចឲ្យខូចសួត និងប្រព័ន្ធផ្លូវដង្ហើម