គ្រោះទឹកជំនន់កាចសាហាវជាប្រវត្តិសាស្រ្តនៅភាគកណ្តាលវៀតណាម ឆក់យកជីវិតមនុស្ស ១៤នាក់

គ្រោះទឹកជំនន់ដ៏កាចសាហាវជាប្រវត្តិសាស្រ្តនៅភាគកណ្តាលប្រទេសវៀតណាម បានឆក់យកជីវិតមនុស្សចំនួន១៤នាក់ របួស២២នាក់ខណៈ៨នាក់បាត់ខ្លួននិងបង្កការបំផ្លិចបំផ្លាញធំធេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះគឺជាទឹកជំនន់ដ៏ធ្ងន់ធ្ងរបំផុតក្នុងរយៈពេល៦០ឆ្នាំនៅភាគកណ្តាលប្រទេសវៀតណាម ហើយក្រៅពីបណ្តាលឲ្យមនុស្សស្លាប់ គ្រោះធម្មជាតិនេះក៏ជន់លិចផ្ទះជាង ១២៨ ០០០ខ្នងនៅក្នុងសហគមន៍ចំនួន៩០ផងដែរ។

តាមសេចក្តីរាយការណ៍របស់ VN Express កាលពីថ្ងៃព្រហស្បតិ៍ទី៣០ខែតុលាឆ្នាំ២០២៥ តំបន់ដែលរងគ្រោះខ្លាំងបំផុតគឺ Da Nang, Hue និង Quang Ngai ដោយផ្លូវទាំងឡាយត្រូវទឹកជន់លិចប្រែក្លាយប្រៀបដូចជាទន្លេ ដោយកន្លែងខ្លះលិចជម្រៅរហូតដល់ទៅ៣ម៉ែត្រ បង្ខំឲ្យពលរដ្ឋត្រូវជិះទូកដើម្បីធ្វើដំណើរ។

ទឹកជំនន់នេះគឺបណ្តាលមកពីភ្លៀងធ្លាក់ខ្លាំងឥតឈប់ បណ្តាលឲ្យទឹកទន្លេ Thu Bon ហក់ឡើងផុតច្រាំង កាត់ផ្តាច់ប្រព័ន្ធគមនាគមន៍រាប់សិបគីឡូម៉ែត្រ បង្កជាបំណាក់ដី ទឹកលិចបំផ្លាញផលដំណាំលើផ្ទៃដីជាង៥ ០០០ហិកតា និងសម្លាប់សត្វគោក្របីជាង ១៦ ០០០ក្បាលថែមទៀតផង។

វៀតណាម បានក្លាយជាប្រទេសមួយដែលរងឥទ្ធិពលខ្លាំងពីបម្រែបម្រួលអាកាសធាតុ។ ជាក់ស្តែងប្រទេសនេះ កាន់តែជួបគ្រោះធម្មជាតិច្រើនឡើងៗជាពិសេសព្យុះខ្លាំងៗ វាយប្រហារមិនឈប់ឈរ។

ត្រឹមតែ៩ខែប៉ុណ្ណោះនៃឆ្នាំនេះ វៀតណាម មានមនុស្សស្លាប់និងបាត់ខ្លួនរហូតដល់ ១៨៧នាក់ទៅហើយ ដោយសារតែគ្រោះធម្មជាតិដូចជាព្យុះ ទឹកជំនន់ និងបំណាក់ដី។

បន្ថែមពីលើនេះ បើយោងតាមតួលេខរបស់រដ្ឋាភិបាល វៀតណាមក៏ត្រូវខាតបង់ផ្នែកសេដ្ឋកិច្ច ជាទឹកប្រាក់ជាង ៦១០ លានដុល្លារអាមេរិកផងដែរ៕

អត្ថបទ៖ សុខ សុវណ្ណ

ចុចអាន៖ ទឹកជំនន់ធ្ងន់ធ្ងរនៅកណ្តាលប្រទេសវៀតណាមសម្លាប់មនុស្ស៩នាក់