ព័ត៌មានអន្ដរជាតិ

អ្នកស្លាប់ឡើងដល់១១៤នាក់ ព្រោះព្យុះទីហ្វុង «កាលម៉េហ្គី» នៅហ្វីលីពីន

បានផុស

៨ ខែ មុន

នៅ

ថ្ងៃព្រហស្បតិ៍ ៦ វិច្ឆិកា ២០២៥

ដោយ

Chheang

ចំនួនអ្នកស្លាប់ដោយសារព្យុះទីហ្វុង«កាលម៉េហ្គី (Kalmaegi)» ក្នុងប្រទេសហ្វីលីពីន បានកើនឡើងដល់យ៉ាងហោចណាស់១១៤នាក់ គិតត្រឹមព្រឹកថ្ងៃព្រហស្បតិ៍ទី៦ខែវិច្ឆិកាឆ្នាំ២០២៥នេះ ខណៈមនុស្ស១២៧នាក់នៅតែបាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Bernardo Rafaelito Alejandro IV អនុប្រធានការិយាល័យការពារជនស៊ីវិល បាននិយាយថា អ្នកស្លាប់ភាគច្រើនត្រូវបានរាយការណ៍នៅក្នុងខេត្ត Cebu ជាកន្លែងដែលភ្លៀងធ្លាក់ខ្លាំងបានបង្កជាទឹកជំនន់ភ្លាមៗ និងបណ្តាលឲ្យទឹកទន្លេហូរហៀរ។ លោកបានបន្ថែមថា យ៉ាងហោចណាស់មនុស្ស៧១នាក់ត្រូវបានគេបញ្ជាក់ថាបានស្លាប់ ៦៥នាក់បាត់ខ្លួន និង៦៩នាក់រងរបួសនៅក្នុងខេត្តនេះ។

អ្នកព្យាករបានប្រាប់ថា ព្យុះ«កាលម៉េហ្គី» បានបោកបក់កាត់កណ្តាលប្រទេសហ្វីលីពីនកាលពីថ្ងៃអង្គារ មុនពេលធ្វើដំណើរឆ្លងកាត់តំបន់ Palawan និងចូលទៅក្នុងសមុទ្រចិនខាងត្បូងកាលពីថ្ងៃពុធ ដោយឆ្ពោះទៅកាន់ប្រទេសវៀតណាម។

ក្នុងចំណោមជនរងគ្រោះមានសមាជិកនៃកងកម្លាំងអាកាសចំនួន៦នាក់ ដែលបានស្លាប់នៅពេលដែលឧទ្ធម្ភាគចក្រធ្លាក់ក្នុងខេត្ត Agusan del Sur ខណៈពេលដែលកំពុងផ្តល់ជំនួយដល់តំបន់ដែលរងគ្រោះដោយព្យុះទីហ្វុង។ អាជ្ញាធរបាននិយាយថា មូលហេតុនៃការធ្លាក់យន្តហោះនេះកំពុងស្ថិតក្រោមការស៊ើបអង្កេត។

អភិបាលខេត្ត Cebu លោកស្រី Pamela Baricuatro បានលើកឡើងថា ទឹកជំនន់បានកើតឡើងជាមួយនឹងការព្រមានតិចតួច។ លោកស្រីបានប្រាប់សារព័ត៌មាន Associated Press ថា «យើងបានធ្វើអ្វីគ្រប់យ៉ាងដែលយើងអាចធ្វើបានសម្រាប់ព្យុះទីហ្វុង ប៉ុន្តែវាពិតជាមានរឿងដែលមិននឹកស្មានដល់ ដូចជាទឹកជំនន់ភ្លាមៗ»។ ជាច្រើនឆ្នាំមកនេះ លោកស្រីបានស្តីបន្ទោសទៅលើការជីកយករ៉ែ និងគម្រោងគ្រប់គ្រងទឹកជំនន់មិនល្អ ដែលធ្វើឲ្យគ្រោះមហន្តរាយកាន់តែអាក្រក់ទៅៗ។

សូមជម្រាបថា ហ្វីលីពីនប្រឈមមុខនឹងព្យុះទីហ្វុង និងខ្យល់ព្យុះជាមធ្យមចំនួន២០ក្នុងមួយឆ្នាំៗ រួមជាមួយនឹងការរញ្ជួយដី និងសកម្មភាពភ្នំភ្លើងញឹកញាប់ ដែលធ្វើឲ្យវាក្លាយជាប្រទេសមួយដែលងាយរងគ្រោះនឹងគ្រោះមហន្តរាយបំផុតក្នុងពិភពលោក៕