ព័ត៌មានអន្ដរជាតិ

លោកត្រាំប្រកាសមិនឲ្យមន្ត្រីអាមេរិកណាម្នាក់ចូលរួមកិច្ចប្រជុំ G20 នៅអាហ្វ្រិកខាងត្បូង

បានផុស

៨ ខែ មុន

នៅ

ថ្ងៃសៅរ៍ ៨ វិច្ឆិកា ២០២៥

ដោយ

Chheang

ដោយចោទប្រកាន់អាហ្វ្រិកខាងត្បូងថាបានធ្វើបាបកសិករជនជាតិស្បែកស«Afrikaner» លោកប្រធានាធិបតីអាមេរិកដូណាល់ ត្រាំ បានប្រកាសកាលពីថ្ងៃសុក្រទី៧ខែវិច្ឆិកាថា ទាំងរូបលោក និងមន្ត្រីរដ្ឋាភិបាលអាមេរិកផ្សេងៗទៀត នឹងមិនមានវត្តមានចូលរួមកិច្ចប្រជុំកំពូល G20 នាឆ្នាំនេះឡើយ។

លោកត្រាំបង្ហាញច្បាប់ចម្លងនៃអត្ថបទមួយអំពីជនជាតិស្បែកសអាហ្វ្រិកខាងត្បូងដែលត្រូវបានសម្លាប់/រូបថត៖ រ៉យទ័រ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចេញផ្សាយថ្ងៃទី៧វិច្ឆិកា The Guardian បានឲ្យដឹងថា មុននេះលោកត្រាំធ្លាប់បានប្រកាសរួចហើយថា លោកនឹងមិនចូលរួមក្នុងការជួបជុំប្រចាំឆ្នាំរបស់ G20 ដែលគ្រោងនឹងធ្វើឡើងចាប់ពីថ្ងៃទី២២ដល់ថ្ងៃទី២៣ខែនេះក្នុងទីក្រុង Johannesburg នៃប្រទេសអាហ្វ្រិកខាងត្បូងទេ។ ដំបូងឡើយអនុប្រធានាធិបតី JD Vance ត្រូវបានគេរំពឹងថានឹងតំណាងឲ្យសហរដ្ឋអាមេរិក ប៉ុន្តែក្រោយមកការធ្វើដំណើររបស់ Vance ក៏ត្រូវបានលុបចោល។

នៅក្នុងការបង្ហោះលើប្រព័ន្ធផ្សព្វផ្សាយសង្គម លោកត្រាំបានស្ដីបន្ទោសថា «វាជាការអាម៉ាសទាំងស្រុងដែល G20 នឹងត្រូវបានប្រារព្ធឡើងនៅអាហ្វ្រិកខាងត្បូង» ដោយលើកឡើងនូវអ្វីដែលគាត់ហៅថា«ការរំលោភបំពាន» លើជនជាតិស្បែកស Afrikaner រួមទាំងអំពើហិង្សា និងការរឹបអូសដីធ្លី។

រដ្ឋបាលលោកត្រាំ បានចោទប្រកាន់អាហ្វ្រិកខាងត្បូងម្តងហើយម្តងទៀតថាអនុញ្ញាតឲ្យមានការវាយប្រហារ និងការរើសអើងប្រឆាំងនឹងកសិករស្បែកស បើទោះជាមន្ត្រីអាហ្វ្រិកខាងត្បូងបានបដិសេធការអះអាងទាំងនោះក៏ដោយ។

ប្រធានាធិបតីអាហ្រ្វិកខាងត្បូងលោក Cyril Ramaphosa បាននិយាយកាលពីមុនថា លោកបានប្រាប់លោកត្រាំថាការចោទប្រកាន់នេះគឺ«មិនពិតទាំងស្រុង» ដោយកត់សម្គាល់ថា ពលរដ្ឋស្បែកសបន្តទទួលបានកម្រិតជីវភាពខ្ពស់ជាងប្រជាជនអាហ្វ្រិកខាងត្បូងភាគច្រើន ជាងបីទសវត្សរ៍មកហើយបន្ទាប់ពីការបញ្ចប់នៃរបបរើសអើងពូជសាសន៍។

ទោះបីជាមានការបដិសេធក៏ដោយ លោកត្រាំបានបន្តការរិះគន់របស់គាត់ចំពោះអាហ្វ្រិកខាងត្បូង។ កាលពីដើមសប្តាហ៍នេះ លោកបានស្នើក្នុងអំឡុងសុន្ទរកថាសេដ្ឋកិច្ចនៅទីក្រុង Miami ថា អាហ្រ្វិកខាងត្បូងគួរតែត្រូវបានបណ្តេញចេញពី G20៕

ប្រែសម្រួល៖ ឈាង