វ៉េណេស៊ុយអេឡាចល័តយោធាទ្រង់ទ្រាយធំ ក្រោយ​អាមេរិកដាក់​ពង្រាយ​នាវាផ្ទុកយន្តហោះដ៏ធំបំផុត

ប្រទេសវ៉េណេស៊ុយអេឡា បានប្រកាសពីការចល័តយោធាទ្រង់ទ្រាយធំ ដើម្បីឆ្លើយតបទៅនឹងអ្វីដែលខ្លួនបានពិពណ៌នាថាជា«ការគំរាមកំហែងរបស់ចក្រពត្តិនិយម»ពីសហរដ្ឋអាមេរិក បន្ទាប់ពីទីក្រុងវ៉ាស៊ីនតោនបានពង្រីកវត្តមានយោធារបស់ខ្លួននៅក្នុងតំបន់ការ៉ាប៊ីន។

យោង​តាម​ការ​ចេញ​ផ្សាយ​នា​ថ្ងៃ​ពុធ​ទី​១២​ខែ​វិច្ឆិកា​របស់​​សារព័ត៍មាន CNN រដ្ឋមន្ត្រីក្រសួងការពារជាតិ​វ៉េណេស៊ុយអេឡា លោក Vladimir Padrino López បាននិយាយថា ប្រតិបត្តិការនេះ​បញ្ជាដោយប្រធានាធិបតី Nicolás Maduro និង​មាន​ការ​ចូលរួម​ពី​សំណាក់​កងទ័ពជើងគោក អាកាស ជើងទឹក និងកងកម្លាំងបម្រុង ក៏ដូចជាកងជីវពល Bolivarian។ លោក Padrino López បាន​ឲ្យ​ដឹង​ថា សមយុទ្ធដែល​ទាក់ទង​នឹង​ការ​ចល័ត​ទ័ព​នេះ មានគោលបំណង«បង្កើនប្រសិទ្ធភាពបញ្ជាការ ការគ្រប់គ្រង និងទំនាក់ទំនង» និងធានាដល់ការការពារប្រទេស។

សកម្មភាព​យោធា​របស់​វ៉េណេស៊ុយអេឡា កើត​ឡើងបន្ទាប់ពីការមកដល់​កាល​ពី​ថ្ងៃ​អង្គារ​នៃ USS Gerald R. Ford ដែលជានាវាផ្ទុកយន្តហោះដ៏ធំបំផុតរបស់កងទ័ពជើងទឹកសហរដ្ឋអាមេរិកទៅកាន់តំបន់ប្រតិបត្តិការ​ជា​ច្រើន​នៃបញ្ជាការ​ភាគ​ខាងត្បូងរបស់​ក្រុង​វ៉ាស៊ីនតោន ដែល​គ្រប​ដណ្ដប់​ភាគច្រើននៃអាមេរិកឡាទីន។ ក្រុមវាយប្រហារ​នៃ​នាវាផ្ទុកយន្តហោះរួមមាននាវិកជាង​៤០០០​នាក់ កងទាហានអាកាស​៨​ក្រុម និងនាវាពិឃាតមីស៊ីលជាច្រើន។

រដ្ឋមន្ត្រីការពារជាតិអាមេរិកលោក Pete Hegseth បានបញ្ជា​ឲ្យ​ដាក់ពង្រាយកាលពីចុងខែមុន ដោយលើក​ឡើង​ថា វាជាផ្នែក​មួយ​នៃកិច្ចខិតខំប្រឹងប្រែង ដើម្បីប្រយុទ្ធប្រឆាំងនឹងការជួញដូរគ្រឿងញៀន។ ក្រុង​វ៉ាស៊ីនតោន​បាន​ធ្វើ​​ការ​វាយ​ប្រហារ​​ជា​ច្រើន​​លើក​លើ​ទូក​ដែល​ត្រូវ​បាន​​ចោទ​ប្រកាន់​ថា​បាន​​រត់ពន្ធ​គ្រឿងញៀន​ ​ក្នុងរយៈពេល​​ប៉ុន្មាន​សប្តាហ៍​ថ្មីៗ​នេះ។

ទោះជាយ៉ាងណាក៏ដោយ វ៉េណេស៊ុយអេឡា បានចោទប្រកាន់ទីក្រុងវ៉ាស៊ីនតោនថាបានប្រើប្រាស់បេសកកម្មប្រឆាំងគ្រឿងញៀនជាការបិទបាំងសម្រាប់ការផ្លាស់ប្តូររបប។ រដ្ឋាភិបាល​របស់​លោក Maduro ជឿជាក់​ថា ការ​បង្កើត​ឡើង​នេះ​មាន​គោល​បំណង​ដាក់​សម្ពាធ​លើ​រដ្ឋបាល​របស់​លោក និង​ធ្វើ​ឲ្យ​ប្រទេស​​លោក​​អស្ថិរភាព។

កាលពីខែមុន ប្រធានាធិបតីអាមេរិក លោក ដូណាល់ ត្រាំ បានបញ្ជាក់ថា លោកបាន​បើក​ដៃ​​ឲ្យ​ CIA ធ្វើ​ប្រតិបត្តិការនៅក្នុងប្រទេសវ៉េណេស៊ុយអេឡា ស្របពេលដែលបង្ហាញពីជម្រើសយោធាដែលអាចមាន។ មន្ត្រីជាន់ខ្ពស់អាមេរិក ក្រោយមកបាននិយាយថា មិនមានផែនការបច្ចុប្បន្នសម្រាប់ការវាយប្រហារដោយផ្ទាល់នោះទេ។

លោក Padrino López បាននិយាយថា ការចល័តរបស់វ៉េណេស៊ុយអេឡាគឺជាផ្នែកមួយនៃ«ផែនការឯករាជ្យ២០០ (Independence Plan 200)» របស់លោក​ Maduro ដែលជាយុទ្ធសាស្ត្រស៊ីវិល និងយោធា ដើម្បីការពារអធិបតេយ្យភាពជាតិតាមរយៈការសម្របសម្រួលរវាងកងកម្លាំងប្រដាប់អាវុធ កងជីវពល និងប៉ូលិស។

កងកម្លាំងប្រដាប់អាវុធធម្មតារបស់វ៉េណេស៊ុយអេឡា​មាន​សមាជិកប្រហែល១២៣ ០០០​នាក់ ខណៈដែលលោក Maduro អះអាងថាមានអ្នកបម្រុងស្ម័គ្រចិត្តជាង​៨​លាននាក់ ដែល​​អ្នកវិភាគយល់​ថា​ជា​តួលេខ​បំប៉ោង​ខុស​ពី​​ការ​ពិត។

បច្ចុប្បន្ននេះសហរដ្ឋអាមេរិកមានបុគ្គលិកយោធាប្រហែល១៥ ០០០​នាក់ដែលឈរជើងនៅក្នុង ឬក្បែរសមុទ្រការ៉ាប៊ីន ខណៈ​ទាហានអាមេរិកប្រហែល​៥០០០​នាក់មានមូលដ្ឋាននៅ​ប្រទេស​ព័រតូរីកូ រួមជាមួយយន្តហោះចម្បាំង F-35 និងយន្តហោះគ្មានមនុស្សបើក MQ-9 Reaper៕

ប្រែសម្រួល៖ ឈាង