សមាជិកសភាថៃ បន្ទោស អនុទីន ដែលផ្អាកកិច្ចព្រមព្រៀងសន្តិភាពជាមួយ កម្ពុជា

ការប្រកាសជាឯកតោភាគីរបស់លោក អនុទីន ឆាន់វីរៈគុល ផ្អាកកិច្ចព្រមព្រៀងសន្តិភាពជាមួយកម្ពុជា បានបង្កការរិះគន់ ពីសំណាក់មន្ត្រីមួយចំនួននៅក្នុងប្រទេសថៃ ហើយក្នុងនោះសមាជិកសភានិងជាអនុប្រធានគណបក្សប្រជាជនថៃ លោក Rangsiman Rome បានបន្ទោសថា ការផ្អាកកិច្ចព្រមព្រៀងធ្វើឲ្យមានបញ្ហាដល់ប្រតិបត្តិការកម្ចាត់ពួក Scammer។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod នៅថ្ងៃព្រហស្បតិ៍ទី១៣ខែវិច្ឆិកាឆ្នាំ២០២៥ លោក Rangsiman បានសម្តែងការខកចិត្តចំពោះរដ្ឋាភិបាលថៃដែលមិនធ្វើបានគ្រប់គ្រាន់ដើម្បីដោះស្រាយស្ថានភាពព្រំដែន។

លោកនិយាយថា នៅពេលថៃនិងកម្ពុជា ដឹកដៃគ្នាទៅចុះកិច្ចព្រមព្រៀងសន្តិភាពនៅប្រទេសម៉ាឡេស៊ី មានបញ្ហាសំខាន់ពីរគឺ ១. ធនធានរ៉ែដ៏កម្រ និង ២. ស្ថានភាពព្រំដែន ដែលរួមមានទាំងបញ្ហាអ្នកបោកប្រាស់តាមអនឡាញផងដែរ។ ឥឡូវ រដ្ឋាភិបាលថៃបានផ្អាកកិច្ចព្រមព្រៀងសន្តិភាពបាត់ទៅហើយ ដូច្នេះ ដំណោះស្រាយចំពោះបញ្ហា Scammer ក៏ត្រូវបញ្ឈប់ភ្លាមៗផងដែរ។

ទន្ទឹមនោះ លោក Rangsiman បានចោទសួរថា៖ «តើរដ្ឋាភិបាលនេះកំពុងធ្វើការដើម្បីផលប្រយោជន៍ជាតិ ឬផលប្រយោជន៍ផ្ទាល់ខ្លួន ដើម្បីបើកផ្លូវសម្រាប់ការបោះឆ្នោតនាពេលខាងមុខ ដោយមិនគិតថាអ្នកណាក្លាយជាសត្រូវរបស់ថៃឬក៏យ៉ាងណា។ បច្ចុប្បន្ន យើងកំពុងប្រឈមមុខនឹងសង្គ្រាមចម្រុះ៖ ការប្រើប្រាស់ព័ត៌មាន កងកម្លាំងប្រដាប់អាវុធ និងឧបករណ៍អ៊ីនធឺណិត»។

ការបន្ទោសរបស់លោក Rangsiman កើតឡើងស្របពេលអតីតរដ្ឋមន្ត្រីការបរទេសថៃ Maris Sengiampong ផ្តល់ដំបូន្មានដល់រដ្ឋាភិបាលទីក្រុងបាងកក ត្រូវមានភាពចាស់ទុំផ្នែកការទូត ដើម្បីការពារអធិបតេយ្យភាពរបស់ខ្លួន កុំបិទទ្វារចំពោះពិភពលោក។

លើសពីនេះ លោកណែនាំឲ្យរដ្ឋាភិបាល ត្រូវសម្របសម្រួលជាមួយប្រធានអាស៊ានឆ្នាំនេះគឺម៉ាឡេស៊ីនិងប្រធានអាស៊ានឆ្នាំក្រោយគឺហ្វីលីពីន ដើម្បីដោះស្រាយបញ្ហាជាមួយកម្ពុជា ហើយពិភាក្សាជាមួយអាមេរិកនិងចិន ដែលសុទ្ធជាភាគីមានចំណែកក្នុងសេចក្តីប្រកាសសន្តិភាព និងកិច្ចព្រមព្រៀងបទឈប់បាញ់។

ម្យ៉ាង លោក Maris ក៏ជំរុញឲ្យរដ្ឋត្រូវប្រញាប់បំភ្លឺឲ្យច្បាស់ទៅកាន់អង្គការសហប្រជាជាតិផងដែរ និងប្រើប្រាស់សន្និសីទអនុសញ្ញាអូតាវ៉ាជាពិសេស សន្និសីទគណៈភាគីលើកទី២២ នៃអនុសញ្ញាអូតាវ៉ា ដែលនឹងត្រូវប្រព្រឹត្តទៅនៅទីក្រុង ហ្សឺណែវ ក្នុងខែធ្នូឆ្នាំ២០២៥ដើម្បីបំភ្លឺរឿងរ៉ាវជាមួយកម្ពុជា៕

អត្ថបទ៖ សុខ សុវណ្ណ

ចុចអាន៖ អតីតរដ្ឋមន្ត្រីការបរទេសថៃ ទូន្មានរដ្ឋាភិបាលទីក្រុងបាងកក «ត្រូវមានភាពចាស់ទុំផ្នែកការទូត»