ព័ត៌មានអន្ដរជាតិ

អតីតរដ្ឋមន្ត្រីការបរទេសថៃ ទូន្មានរដ្ឋាភិបាលទីក្រុងបាងកក «ត្រូវមានភាពចាស់ទុំផ្នែកការទូត»

បានផុស

៧ ខែ មុន

នៅ

ថ្ងៃព្រហស្បតិ៍ ១៣ វិច្ឆិកា ២០២៥

ដោយ

ស្របពេលសភាពការណ៍ឡើងកម្តៅ អតីតរដ្ឋមន្ត្រីការបរទេសថៃ Maris Sengiampong បានផ្តល់ដំបូន្មានដល់រដ្ឋាភិបាលទីក្រុងបាងកក ដែលមានលោក អនុទីន ឆាន់វីរៈគុល ជានាយករដ្ឋមន្ត្រី ត្រូវមានភាពចាស់ទុំផ្នែកការទូត ដើម្បីការពារអធិបតេយ្យភាពរបស់ខ្លួន កុំបិទទ្វារចំពោះពិភពលោក។ នេះបើតាមការផ្សាយរបស់ Amarin នៅថ្ងៃព្រហស្បតិ៍ទី១៣ខែវិច្ឆិកាឆ្នាំ២០២៥។

អតីតរដ្ឋមន្ត្រីការបរទេសថៃ Maris Sengiampong (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ លោកណែនាំឲ្យរដ្ឋាភិបាល ត្រូវសម្របសម្រួលជាមួយប្រធានអាស៊ានឆ្នាំនេះគឺម៉ាឡេស៊ីនិងប្រធានអាស៊ានឆ្នាំក្រោយគឺហ្វីលីពីន ដើម្បីដោះស្រាយបញ្ហាជាមួយកម្ពុជា ហើយពិភាក្សាជាមួយអាមេរិកនិងចិន ដែលសុទ្ធជាភាគីមានចំណែកក្នុងសេចក្តីប្រកាសសន្តិភាព និងកិច្ចព្រមព្រៀងបទឈប់បាញ់។

ម្យ៉ាង លោក Maris ក៏ជំរុញឲ្យរដ្ឋត្រូវប្រញាប់បំភ្លឺឲ្យច្បាស់ទៅកាន់អង្គការសហប្រជាជាតិផងដែរ និងប្រើប្រាស់សន្និសីទអនុសញ្ញាអូតាវ៉ាជាពិសេស សន្និសីទគណៈភាគីលើកទី២២ នៃអនុសញ្ញាអូតាវ៉ា ដែលនឹងត្រូវប្រព្រឹត្តទៅនៅទីក្រុង ហ្សឺណែវ ក្នុងខែធ្នូឆ្នាំ២០២៥ដើម្បីបំភ្លឺរឿងរ៉ាវជាមួយកម្ពុជា។

ការទូន្មានរបស់អតីតរដ្ឋមន្ត្រីការបរទេសថៃរូបនេះកើតឡើងក្រោយពេល អតីតឧបការីក្រសួងការបរទេសថៃ Russ Chaleejandra បានរិះគន់ អនុទីន ចំពោះការថ្លែងដែលបង្កជម្លោះលើវិធានការពន្ធរបស់អាមេរិក ដោយលើកឡើងថា សម្ដីអនុទីន ប្រថុយនឹងការធ្វើឲ្យថៃឯកោពីសម្ព័ន្ធមិត្តដ៏សំខាន់ ហើយអាចផ្តល់ផលប្រយោជន៍ដល់កម្ពុជាទៅវិញ។

កាលពីថ្ងៃពុធទី១២ខែវិច្ឆិកាឆ្នាំ២០២៥ថា លោកអនុទីន អះអាងថា ថៃនឹងស្វែងរកដៃគូធ្វើពាណិជ្ជកម្មជំនួសអាមេរិក បើទីក្រុងវ៉ាស៊ីនតោន យកពន្ធលើសនេះទៀតក្រោយការប្រកាសផ្អាកកិច្ចព្រមព្រៀងសន្តិភាពជាមួយកម្ពុជា។ លោកក៏ប្រាប់ទៅរដ្ឋាភិបាលទីក្រុងបាងកកផងដែរថា ទុករឿងពន្ធនៅមួយឡែកសិនទៅ ត្រូវគិតរឿងជាតិនិងប្រយោជន៍ពលរដ្ឋជាមុនសិន។

ជុំវិញបញ្ហានេះ លោក Russ និយាយថា សម្ដីអនុទីន អាចប៉ះពាល់ដល់ទំនាក់ទំនងថៃ-អាមេរិក ហើយអាចជួយពង្រឹងទំនាក់ទំនងរវាងកម្ពុជាជាមួយទីក្រុងវ៉ាស៊ីនតោនដោយអចេតនា។ លោករៀបរាប់ថា «ភាគីដែលនឹងទទួលបានផលប្រយោជន៍ច្រើនជាងគេពីសម្ដីទាំងនេះ គឺកម្ពុជា។ វាធ្វើឲ្យថៃឯកោពីសម្ព័ន្ធមិត្តមហាអំណាចពិភពលោក ហើយជំរុញកម្ពុជាឲ្យកាន់តែកៀកជាមួយសហរដ្ឋអាមេរិក»។

លោកក៏ព្រមានផងដែរថា ប្រជាជនថៃអាចប្រឈមមុខនឹងផលវិបាកសេដ្ឋកិច្ច ប្រសិនបើសហរដ្ឋអាមេរិកឆ្លើយតបដោយសកម្មភាពពន្ធសងសឹក។ លោកចោទសួរថា «តើនាយករដ្ឋមន្ត្រីត្រៀមខ្លួនទទួលខុសត្រូវឬទេ ប្រសិនបើជីវភាពរបស់ប្រជាជនរងផលប៉ះពាល់?»៕

អត្ថបទ៖ សុខ សុវណ្ណ

ចុចអាន៖ សារព័ត៌មាន Newsweek៖ សម្ព័ន្ធមិត្តសន្ធិសញ្ញារបស់អាមេរិក កំពុងសាកល្បងអំណាចរបស់លោក ត្រាំ