ព័ត៌មានអន្ដរជាតិ

ហ្វីលីពីនសន្យាជួយធ្វើឲ្យទីម័រកាន់តែរឹងមាំ និងមានភាពធន់

បានផុស

៨ ខែ មុន

នៅ

ថ្ងៃសុក្រ ១៤ វិច្ឆិកា ២០២៥

ដោយ

ប្រធានាធិបតីហ្វីលីពីន លោក Ferdinand R. Marcos Jr ដែលនឹងក្លាយជាប្រធានអាស៊ាននៅឆ្នាំ២០២៦ បានសន្យានៅថ្ងៃសុក្រ នេះថា នឹងជួយប្រទេសទីម័រខាងកើត ដែលជាសមាជិកថ្មីបំផុតទី១១នៃសមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន ដើម្បីធ្វើឱ្យប្លុកក្នុងតំបន់កាន់តែរឹងមាំ និងធន់ជាងមុន។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មានហ្វីលីពីន (PNA)។

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (ឆ្វេង) និង ប្រធានាធិបតី ប្រធានាធិបតីហ្វីលីពីន លោក Ferdinand R. Marcos Jr។ រូបភាព BERNAMA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំរដ្ឋមន្ត្រីច្បាប់អាស៊ានលើកទី១៣ (ALAWMM) នៅឯទីក្រុងម៉ានីល ប្រធានាធិបតីហ្វីលីពីន លោក Marcos បានសង្កត់ធ្ងន់លើតួនាទីសកម្មរបស់ហ្វីលីពីនក្នុងការកសាងសហគមន៍អាស៊ានឲ្យរួបរួមគ្នាដោយឈរលើគោលការណ៍យុត្តិធម៌ ការជឿទុកចិត្តគ្នាទៅវិញទៅមក និងនីតិរដ្ឋ។

លោក Marcos ត្រូវបានស្រង់សម្តីដូចនិយាយថា៖«ហ្វីលីពីនបញ្ជាក់ឡើងវិញនូវការប្តេជ្ញាចិត្តរបស់ខ្លួនក្នុងការធ្វើការជាមួយរដ្ឋសមាជិកទាំងអស់ឆ្ពោះទៅរកអាស៊ានដែលរឹងមាំ និងធន់ជាងមុន។ យើងក៏ទន្ទឹងរង់ចាំការពង្រីកការគាំទ្រនេះដល់ដៃគូថ្មីបំផុតរបស់យើងគឺទីម័រខាងកើត ហើយត្រៀមខ្លួនរួចជាស្រេចដើម្បីជួយពួកគេនៅពេលពួកគេរៀបចំដើម្បីចូលរួមជាមួយស្ថាប័នច្បាប់របស់យើង»។

លោកបានបន្ថែមថា៖ «ពិតណាស់ អាស៊ានរឹងមាំ ពេលមានការចូលរួមរបស់សមាជិកគ្រប់រូប គ្រប់រដ្ឋសមាជិក ហើយយើងឲ្យតម្លៃរាល់សំឡេងនៅតុនោះ»។

នេះជាលើកទីមួយហើយដែលទីម័រខាងកើតបានចូលរួមក្នុង ALAWMM ចាប់តាំងពីបានក្លាយជាសមាជិកពេញសិទ្ធិរបស់អាស៊ាន។

ត្រូវបានបង្កើតឡើងក្នុងឆ្នាំ ១៩៨៦ ALAWMM ដើរតួជាវេទិកាសំខាន់សម្រាប់ការសន្ទនា និងកិច្ចសហប្រតិបត្តិការក្នុងចំណោមរដ្ឋមន្ត្រីយុត្តិធម៌ អគ្គមេធាវី និងលេខាធិការយុត្តិធម៌នៃរដ្ឋសមាជិកអាស៊ាន៕

រ៉ាន់ រើយ