ត្រាំ គំរាមថា ប្រទេសណាក៏ដោយ ឲ្យតែហ៊ានរកស៊ីជាមួយរុស្ស៊ី នឹងរងទណ្ឌកម្មធ្ងន់ធ្ងរ

ជាការគំរាមដាក់សម្ពាធថ្មីទៀតលើទីក្រុងមូស្គូ ប្រធានាធីបតីអាមេរិក ដូណាល់ ត្រាំ បានប្រកាសថា ប្រទេសណាក៏ដោយ ឲ្យតែហ៊ានរកស៊ីជាមួយរុស្ស៊ី នឹងរងការដាក់ទណ្ឌកម្មធ្ងន់ធ្ងរពីទីក្រុងវ៉ាស៊ីនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលដៅនៅពីក្រោយការគំរាមនេះត្រូវគេដឹងយ៉ាងច្បាស់ថា គឺដើម្បីឲ្យរុស្ស៊ីថយចំណូលដែលយកទៅផ្គត់ផ្គង់ឲ្យកងទ័ពសម្រាប់ការច្បាំងក្នុងសង្គ្រាមជាមួយអ៊ុយក្រែន។

តាមការផ្សាយរបស់ EURO News កាលពីថ្ងៃចន្ទទី១៧ខែវិច្ឆិកាឆ្នាំ២០២៥, លោកត្រាំនិយាយថា៖ «សមាជិកបក្សសាធារណរដ្ឋកំពុងព្រាង ក្របខ័ណ្ឌច្បាប់ សម្រាប់ ការដាក់ទណ្ឌកម្មបន្ថែម។ ខ្ញុំពិតជាយល់ស្របចំពោះរឿងនេះ។ ប្រទេសណាក៏ដោយដែលធ្វើពាណិជ្ជកម្មជាមួយរុស្ស៊ី នឹងត្រូវទទួលរងការដាក់ទណ្ឌកម្មយ៉ាងធ្ងន់ធ្ងរ ហើយយើងអាចនឹងដាក់បញ្ចូលអ៊ីរ៉ង់ទៅក្នុងរូបមន្តនេះផងដែរ»។

ដើម្បីព្យាយាមទប់ស្កាត់ប្រភពចំណូលថាមពលរបស់រុស្ស៊ី ច្បាប់ដែលហៅថា «ច្បាប់ដាក់ទណ្ឌកម្មលើរុស្ស៊ីឆ្នាំ ២០២៥» មួយនេះ នឹងតម្រូវឲ្យសហរដ្ឋអាមេរិកដាក់ ពន្ធគយរហូតដល់៥០០% លើការនាំចូលពីប្រទេសណាដែលទិញអ៊ុយរ៉ាញ៉ូមឬផលិតផលប្រេងឥន្ធនៈរបស់រុស្ស៊ី។ ពន្ធគយ៥០០% ស្រដៀងគ្នានេះ ក៏អាចអនុវត្តចំពោះទំនិញឬសេវាកម្មពីប្រទេសរុស្ស៊ីផ្ទាល់ផងដែរ។

ដ្បិតលោកខាងលិចដាក់ទណ្ឌកម្មម្តងហើយម្តងទៀតលើរុស្ស៊ីក៏ដោយ ក៏រដ្ឋាភិបាលរបស់លោក វ្ល៉ាឌីមៀរ ពូទីន ហាក់មិនបង្ហាញសញ្ញាចុះខ្សោយសោះ ពោលគឺនៅតែឈរជើងយ៉ាងរឹងមាំ ជាពិសេសនៅតែបង្ហាញភាពខ្លាំងក្នុងសង្គ្រាមរយៈពេលជិត៤ឆ្នាំជាមួយអ៊ុយក្រែន។

ទាំងនោះរួមមានការដាក់ទណ្ឌកម្មរបស់សហរដ្ឋអាមេរិក ទៅលើក្រុមហ៊ុនប្រេងធំជាងគេបំផុតទាំងពីររបស់រុស្ស៊ី គឺ Rosneft និង Lukoil ដោយបង្កកទ្រព្យសម្បត្តិ ដែលពួកគេកាន់កាប់នៅក្នុងសហរដ្ឋអាមេរិក និង ហាមឃាត់ជនជាតិអាមេរិក ពីការធ្វើពាណិជ្ជកម្មជាមួយពួកគេ៕

អត្ថបទ៖ សុខ សុវណ្ណ

ចុចអាន៖ លោកត្រាំកំពុង​​ពិចារណា​ទម្លាក់​គ្រាប់បែក​ក្នុង​ប្រទេស​ម៉ិកស៊ិក​ ដើម្បី​កម្ចាត់​ក្រុម​​គ្រឿងញៀន