មន្ត្រីថៃ ជាបន្តបន្ទាប់ ចេញមុខបន្ទោស អនុទីន ដែលនិយាយប៉ះពាល់អាមេរិក

រឿងរ៉ាវជុំវិញជំហរនិងសម្តីរបស់លោក អនុទីន ឆានវីរៈគុល ដែលធ្វើឲ្យប៉ះពាល់ដល់អាមេរិក នៅតែជាក្តៅគគុកក្នុងប្រទេសថៃ ដោយមានមន្ត្រីចេញមុខជាបន្តបន្ទាប់ រិះគន់នាយករដ្ឋមន្ត្រីថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រម្លឹកទៅថ្ងៃទី ១២ ខែវិច្ឆិកា ឆ្នាំ២០២៥ លោកអនុទីននិយាយថា៖ «ខ្ញុំលែងខ្វល់កិច្ចចរចាពាណិជ្ជកម្ម ឬពន្ធគយជាមួយសហរដ្ឋអាមេរិកនឹងទៅជាយ៉ាងណាហើយ។ ប្រសិនបើយើងមិនអាចលក់ទំនិញទៅប្រទេសនេះបានទេ យើងនឹងរកផ្សេងលក់ជំនួសវិញ»។

សម្តីនេះបង្កឲ្យមានប្រតិកម្មជាបន្តបន្ទាប់ ដោយដំបូងគេគឺរដ្ឋមន្ត្រីពាណិជ្ជកម្មថៃលោកស្រី Suphajee Suthumpun ដែលចេញមុខបដិសេធជាសាធារណៈចំពោះការលើកឡើងរបស់លោក អនុទីន ដោយបញ្ជាក់ថា៖ «សហរដ្ឋអាមេរិកនៅតែជាដៃគូពាណិជ្ជកម្មចម្បង។ ប្រទេសថៃប្តេជ្ញាចំពោះតុល្យភាព ទំនាក់ទំនងល្អ និងកិច្ចសហប្រតិបត្តិការបន្ត»។

ក្រោយមក មានអ្នកនាំពាក្យគណបក្សភឿថៃ Suksit Sreejomkhwan ដែលបានរិះគន់នូវអ្វីដែលលោកហៅថាជា «សារច្របូកច្របល់និងក្មេងខ្ចី» របស់លោក អនុទីន។ លោកនិយាយថា សម្តីនេះធ្វើឲ្យខូចកិត្យានុភាពរបស់ប្រទេសថៃ និងធ្វើឲ្យជំហររបស់ថៃចុះខ្សោយក្នុងផ្នែកការទូតអន្តរជាតិ។

បន្ទាប់មកទៀត មន្ត្រីមួយចំនួនក្នុងជួរគណបក្សប្រជាជនថៃ ក៏ស្តីបន្ទោសលោក អនុទីន ដែរថា កំពុងសាងកំហុសយុទ្ធសាស្ត្រ នាំឲ្យកិច្ចចរចាពាណិជ្ជកម្មរបស់ថៃត្រូវបានផ្អាក ទាំងដែលរឿងនេះ អាមេរិកគួរតែយកទៅប្រើដើម្បីដាក់សម្ពាធលើកម្ពុជាវិញទើបត្រូវ។

ចុងក្រោយមេបក្សភឿថៃលោក Chulaphan Amornvivat បានបង្ហោះសារនៅលើបណ្តាញសង្គម Facebook ថា អភិបាលកិច្ចជាតិត្រូវតែផ្អែកលើការគិតប្រកបដោយសំឡេងនិងការវាយតម្លៃស្ថានការណ៍ទូលំទូលាយ មិនមែនផ្អែកលើការឆ្លើយតបតាមអារម្មណ៍ ឬ ពាក្យសម្តីដែលមិនបានថ្លឹងថ្លែងនោះទេ។ ពាក្យសម្តីរបស់ថ្នាក់ដឹកនាំ មិនមែនគ្រាន់តែឆ្លុះបញ្ចាំងពីគំនិតផ្ទាល់ខ្លួនប៉ុណ្ណោះទេ ប៉ុន្តែថែមទាំងឆ្លុះបញ្ចាំងពី ជំហររបស់ប្រទេសថៃ ចំពោះសហគមន៍អន្តរជាតិផងដែរ។

លោកបន្តថា ព្រឹត្តិការណ៍ថ្មីៗនេះ គូសបញ្ជាក់ពីកង្វះខាតនៃទំនាក់ទំនងដោយប្រុងប្រយ័ត្ន និង ការប្រើប្រាស់ពាក្យសម្តីមិនចេះគិត ដែលអាចមានផលវិបាកផ្នែកការទូតនិងសេដ្ឋកិច្ច៕

អត្ថបទ៖ សុខ សុវណ្ណ

ចុចអាន៖ មុនធ្វើបាតុកម្មនៅស្ថានទូតអាមេរិក, Jatuporn Prompan ប្រកាសថា៖ «យើងកុំខ្លាចការគំរាមយកពន្ធបដិការ»