រដ្ឋាភិបាលថៃ មិនទាន់មានប្រតិកម្មអ្វីឡើយចំពោះផែនការបាតុកម្មរបស់ក្រុមជ្រុលនិយម នៅស្ថានទូតអាមេរិក

រដ្ឋាភិបាលថៃ មិនទាន់មានប្រតិកម្មអ្វីឡើយចំពោះផែនការនៃបាតុកម្មរបស់ក្រុមជ្រុលនិយមនៅថ្ងៃទី២២ខែវិច្ឆិកាខាងមុខ ដែលពួកគេគ្រោងប្រមូលផ្តុំគ្នានៅមុខស្ថានទូតអាមេរិកនិងម៉ាឡេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Amarin, ក្រុមជ្រុលនិយមថៃ «កម្លាំងសាមគ្គីរបស់ជាតិដើម្បីការពារអធិបតេយ្យភាព» បានប្រកាសប្រមូលផ្តុំគ្នាធ្វើបាតុកម្មនិងអាចលុកលុយស្ថានទូតទាំងពីរផងដែរ ក្នុងទីក្រុងបាងកក ដោយចោទថា អាមេរិកនិងម៉ាឡេស៊ី រួមគំនិតបង្កើតឲ្យមានកិច្ចព្រមព្រៀងបទឈប់បាញ់ និងសេចក្តីប្រកាសសន្តិភាពកម្ពុជា-ថៃ។

ពួកគេចោទអាមេរិកចំៗថា បានយកកម្ពុជានិងម៉ាឡេស៊ីធ្វើជាឧបករណ៍ ក្រោមគោលនយោបាយ យុទ្ធសាស្ត្រសន្តិសុខ និងគោលនយោបាយ «អាមេរិកជាចម្បង» របស់លោក ដូណាល់ ត្រាំ និងចោទថា ជំហររបស់អាមេរិកនិងម៉ាឡេស៊ី ច្បាស់ជាខ្វះអព្យាក្រឹត្យភាព ហើយការអន្តរាគមន៍របស់ប្រទេសទាំងពីរនេះ មិនឲ្យតម្លៃលើការពិត និងសេចក្តីថ្លៃថ្នូររបស់ជនជាតិថៃសូម្បីតែបន្តិច។

ម្យ៉ាង ទីក្រុងវ៉ាស៊ីនតោន បានប្រកាសផ្អាកការចរចាពន្ធបដិការជាមួយថៃជាបណ្តោះអាសន្នសិន រហូតដល់ទីក្រុងបាងកក គោរពតាមកិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខានៅទីក្រុងគូឡាឡាំពួ មានប្រធានាធិបតីអាមេរិក ដូណាល់ ត្រាំ និងនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម ជាសាក្សី។

ជុំវិញបញ្ហានេះ Jatuporn Prompan ដែលជាម្នាក់ក្នុងចំណោមសកម្មជនច្រើននាក់នៃចលនាជ្រុលនិយមថៃ បានប្រកាសក្តែងៗថា៖ «យើងកុំខ្លាចការគំរាមយកពន្ធបដិការឲ្យសោះ»។

ទោះបែបណា មកទល់ឥឡូវ មិនទាន់មានប្រតិកម្មឬការលើកឡើងណាមួយពីសំណាក់មន្ត្រីក្នុងជួររដ្ឋាភិបាលថៃ ជុំវិញផែនការធ្វើបាតុកម្មនេះទេ ខណៈគេក៏មិនទាន់សន្និដ្ឋានដែរថា តើចលនានេះអាចប្រមូលគ្នាបានប៉ុន្មាននាក់។

ក៏មិនទាន់មានប្រតិកម្មឬការចេញសេចក្តីថ្លែងការណ៍អ្វីផងដែរ ពីភាគីអាមេរិកនិងម៉ាឡេស៊ី ពាក់ព័ន្ធគម្រោងបាតុកម្មនេះ ប៉ុន្តែគេនៅតែតាមដានស្ថានការណ៍យ៉ាងយកចិត្តទុកដាក់៕

អត្ថបទ៖ សុខ សុវណ្ណ

ចុចអាន៖ មុនធ្វើបាតុកម្មនៅស្ថានទូតអាមេរិក, Jatuporn Prompan ប្រកាសថា៖ «យើងកុំខ្លាចការគំរាមយកពន្ធបដិការ»