ព័ត៌មានអន្ដរជាតិ
ប្រេងឆៅរបស់វ៉េណេស៊ុយអេឡាច្រើនប៉ុណ្ណា ទើបលោកម៉ាឌូរ៉ូចេះតែចោទអាមេរិកថាចង់បាន?
ឋានៈរបស់ប្រទេសវ៉េណេស៊ុយអេឡាជាម្ចាស់ទុនបម្រុងប្រេងដ៏ធំជាងគេបំផុតក្នុងពិភពលោក នៅតែបន្តបង្កើតភាពចម្រូងចម្រាសជាមួយមហាអំណាចអាមេរិក ខណៈដែលលោកប្រធានាធិបតី នីកូឡាស ម៉ាឌូរ៉ូ បានចោទប្រកាន់ទីក្រុងវ៉ាស៊ីនតោនម្តងហើយម្ដងទៀតថា មានបំណងអាក្រក់ចង់លេបយកទ្រព្យសម្បត្តិប្រេងរបស់ប្រទេសលោក។
យោងតាម Al Jazeera វ៉េណេស៊ុយអេឡាមានទុនបម្រុងប្រេងឆៅប្រមាណ ៣០៣ពាន់លានបារ៉ែល ច្រើនជាងអារ៉ាប៊ីសាអូឌីត និងស្ទើរតែមួយភាគប្រាំនៃទុនបម្រុងដែលរកឃើញនៅលើពិភពលោក។ ភាគច្រើននៃទុនបម្រុងនេះស្ថិតនៅក្នុងតំបន់ Orinoco Belt ដែលជាតំបន់សម្បូរដោយប្រភេទប្រេងខាប់ខ្លាំង ដែលទាមទារការចំណាយថ្លៃដើមខ្ពស់ក្នុងការទាញយក និងការកែច្នៃជំនាញឯកទេស មុនពេលវាអាចត្រូវបានលក់នៅលើទីផ្សារសកល។
ទោះបីជាមានមូលដ្ឋានធនធានដ៏ធំសម្បើមក៏ដោយ ក៏វ៉េណេស៊ុយអេឡាផលិតបានតិចជាងសក្តានុពលរបស់ខ្លួនឆ្ងាយមែនទែន។ ការវិនិយោគមិនគ្រប់គ្រាន់ជាច្រើនឆ្នាំ ទណ្ឌកម្មអាមេរិក និងការធ្លាក់ចុះនៃប្រតិបត្តិការនៅក្រុមហ៊ុនប្រេងរដ្ឋ PDVSA បានកាត់បន្ថយទិន្នផលមកត្រឹមមួយចំណែកតូចប៉ុណ្ណោះនៃកម្រិតដែលធ្លាប់មាននៅដើមទសវត្សរ៍ឆ្នាំ២០០០។ អ្នកវិភាគឧស្សាហកម្ម បាននិយាយថា គម្លាតរវាងទុនបម្រុង និងផលិតកម្មបានរីកធំយ៉ាងខ្លាំង រហូតដល់ប្រេងរបស់វ៉េណេស៊ុយអេឡាបានក្លាយជានិមិត្តសញ្ញាភូមិសាស្ត្រនយោបាយដូចជាទ្រព្យសម្បត្តិសេដ្ឋកិច្ចមួយអ៊ីចឹង។
ការលក់ប្រេងបង្កើតបានយ៉ាងហោចណាស់៩៥%នៃប្រាក់ចំណូលនាំចេញរបស់វ៉េណេស៊ុយអេឡា ដែលធ្វើឲ្យប្រទេសនេះពឹងផ្អែកយ៉ាងខ្លាំងលើឧស្សាហកម្មប្រេងសម្រាប់ហិរញ្ញប្បទានរបស់រដ្ឋ។ នេះបើយោងតាម Bloomberg។
លោកម៉ាឌូរ៉ូ បានអះអាងម្តងហើយម្តងទៀតថា ទណ្ឌកម្ម និងសម្ពាធនយោបាយរបស់អាមេរិក មានគោលបំណងធ្វើឲ្យរដ្ឋាភិបាលរបស់លោកអស្ថិរភាព និងចង់ចូលទៅកាន់កាប់ប្រេងរបស់វ៉េណេស៊ុយអេឡា។ ទីក្រុងវ៉ាស៊ីនតោនបានបដិសេធការចោទប្រកាន់នេះ ដោយនិយាយថា ទណ្ឌកម្មកំណត់គោលដៅទៅលើអំពើពុករលួយ និងការធ្លាក់ចុះនៃលទ្ធិប្រជាធិបតេយ្យ មិនមែនទៅលើវិស័យថាមពលរបស់វ៉េណេស៊ុយអេឡាដោយផ្ទាល់នោះឡើយ។
ទោះជាយ៉ាងណាក៏ដោយ ទំហំនៃទុនបម្រុងនៅតែធ្វើឲ្យវ៉េណេស៊ុយអេឡាមានសារៈសំខាន់ជាយុទ្ធសាស្ត្រ។ ការគ្រប់គ្រងប្រេងខាប់នៅក្នុងតំបន់ Orinoco ដែលមានបញ្ហាប្រឈមផ្នែកបច្ចេកទេស ប៉ុន្តែសម្បូរហូរហៀរ នឹងផ្តល់ឲ្យរដ្ឋាភិបាល ឬវិនិយោគិនណាមួយនូវឥទ្ធិពលរយៈពេលវែងនៅក្នុងទីផ្សារថាមពលសកល។ អ្នកវិភាគបានលើកឡើងថា ការយល់ឃើញនេះហើយដែលជំរុញរឿងតំណាលមិនចេះចប់មិនចេះហើយរបស់លោកម៉ាឌូរ៉ូ ដែលថា មហាអំណាចបរទេសចេះតែលូកលាន់កិច្ចការផ្ទៃក្នុងវ៉េណេស៊ុយអេឡា ហេតុតែចង់បានផលប្រយោជន៍ថាមពល។
សម្រាប់ប្រជាជនវ៉េណេស៊ុយអេឡា ទ្រព្យសម្បត្តិប្រេងរបស់ប្រទេសខ្លួនផ្ទុយស្រឡះពីការពិតនៃសេដ្ឋកិច្ចរបស់ពួកគេ។ អតិផរណា កង្វះខាត និងហេដ្ឋារចនាសម្ព័ន្ធដែលដួលរលំនៅតែបន្តមាន ទោះបីជារដ្ឋគ្រប់គ្រងប្រេងច្រើនជាងប្រទេសដទៃក៏ដោយ។ ផលិតកម្មបានកើនឡើងបន្តិចបន្តួចក្នុងប៉ុន្មានឆ្នាំថ្មីៗនេះ ខណៈដែលទីក្រុង Caracas ស្វែងរកដៃគូថ្មី ប៉ុន្តែនៅតែទាបជាងកម្រិតដែលត្រូវការដើម្បីត្រឡប់វិបត្តិសេដ្ឋកិច្ចដ៏ធ្ងន់ធ្ងររបស់ប្រទេសមួយនេះ។
ស្របពេលដែលអាមេរិកនៅតែបន្តដាក់សម្ពាធដោយការដាក់ពង្រាយកងកម្លាំងជាច្រើនរួមទាំងនាវាចម្បាំងនៅក្នុងតំបន់ការ៉ាប៊ីន រដ្ឋាភិបាលលោកម៉ាឌូរ៉ូ ត្រូវបានគេរំពឹងថានឹងបន្តលើកយកទ្រព្យសម្បត្តិប្រេងរបស់ប្រទេសខ្លួនជាខែលការពារ និងចំណុចប្រមូលផ្តុំអំណាច ហើយចោទប្រកាន់អាមេរិកថា«ឈ្លានពានបែបអាណានិគម» និងប្រើលេសកម្ចាត់ក្រុមភេរវករគ្រឿងញៀនគ្រាន់តែចង់ប្ដូររបបគ្រប់គ្រង ព្រមទាំងដណ្ដើមយកការកាន់កាប់ទុនបម្រុងប្រេងដ៏មហិមារបស់វ៉េណេស៊ុយអេឡាតែប៉ុណ្ណោះ៕
ប្រែសម្រួល៖ ឈាង
-
ព័ត៌មានជាតិ១ សប្តាហ៍ ago៦ថ្ងៃក្នុងព្រឹត្តិការណ៍ «នគរសង្ក្រាន្ត» មន្ទីរសុខាភិបាលរាជធានីភ្នំពេញ បានពិនិត្យ និងព្យាបាលជូនពលរដ្ឋជាង២ពាន់នាក់
-
ព័ត៌មានអន្ដរជាតិ៤ ថ្ងៃ agoខេត្ត Kochi នៅជប៉ុនផ្តល់ប្រាក់ ១២៥ដុល្លារឲ្យអ្នកនៅលីវ ចំណាយលើការណាត់ចួបបង្កើតស្នេហា
-
ព័ត៌មានអន្ដរជាតិ៦ ថ្ងៃ agoត្រាំ ពន្លះ WSJ ថា ជាសារព័ត៌មានវង្វេងផ្លូវ និងជាកាកសំណល់នយោបាយ
-
ព័ត៌មានអន្ដរជាតិ៥ ថ្ងៃ agoវិមានក្រឹមឡាំង៖ ពូទីន ត្រៀមជួបហ្សេលេនស្គី ទាល់តែមានការចុះហត្ថលេខាលើកិច្ចព្រមព្រៀងសន្តិភាព
-
ព័ត៌មានជាតិ៣ ថ្ងៃ agoតំណាងអយ្យការសម្រេចចោទប្រកាន់លោកផ្កាយបីនិងលោកផ្កាយពីរ រួមអ្នកពាក់ព័ន្ធ៤នាក់ផ្សេងទៀត
-
សន្តិសុខសង្គម៣ ថ្ងៃ agoតុលាការខេត្តកំពត បង្គាប់ឲ្យឃុំខ្លួនមន្ត្រីនគរបាលដែលគប់កែវស្រាលើអ្នកចាប់ទឹកកកដាក់ពន្ធនាគារ
-
ព័ត៌មានជាតិ៧ ថ្ងៃ agoមន្រ្តីបរិស្ថានស្នើពលរដ្ឋកុំបរិភោគត្រីងាប់ និងផ្អាកប្រើប្រាស់ទឹកព្រែកត្រែង នៅស្រុករតនៈមណ្ឌល ខេត្តបាត់ដំបង
-
ព័ត៌មានជាតិ១៤ ម៉ោង agoអាជ្ញាធរទាត់ចោលព័ត៌មានដែលផ្សាយថា ថៃបានឈ្លានពានចូលទឹកដីខ្មែរនៅខេត្តប៉ៃលិន