ព័ត៌មានអន្ដរជាតិ

សហរដ្ឋអាមេរិកជំពាក់អង្គការសហប្រជាជាតិជិត១៦០០លានដុល្លាររយៈពេល២ឆ្នាំ

បានផុស

៥ ខែ មុន

នៅ

ថ្ងៃពុធ ៣ ធ្នូ ២០២៥

ដោយ

អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរ៉េស (Antonio Guterres) បានថ្លែងពីផែនការកាត់បន្ថយការចំណាយរបស់ស្ថាប័នកំពូលមួយនេះកាលពីថ្ងៃចន្ទថ្ងៃទី១ខែធ្នូ ដោយបានបញ្ចេញតួលេខដែលសហរដ្ឋអាមេរិកជំពាក់ស្ថាប័នអន្តរជាតិកំពូលមួយនេះ។

ថ្លែងប្រាប់ក្រុមតំណាងប្រទេសជាសមាជិកអង្គការសហប្រជាជាតិទាំង១៩៣ នៅមហាសន្និបាត U.N. លោក អង់តូនីញ៉ូ ហ្គុយតឺរ៉េស បានលើកឡើងនូវភាពកម្សោយនៃហិរញ្ញវត្ថុរបស់អង្គការសហប្រជាជាតិសម្រាប់ឆ្នាំ២០២៦ ដោយសារតែការបាត់បង់ចំណូលពីសហរដ្ឋអាមេរិកដែលជាអ្នកបង់ជំនួយវិភាគទានធំបំផុតដល់អង្គការនេះ។

រ៉យទ័របានស្រង់សម្តី លោក អង់តូនីញ៉ូ ហ្គុយតឺរ៉េស ដូចបានថ្លែងថា៖«យើងបានបញ្ចប់ឆ្នាំ ២០២៤ជាមួយនឹងសាច់ប្រាក់ដែលបានសន្យា ៧៦០លានដុល្លារ ដែលក្នុងនោះ៧០៩លានដុល្លារនៅតែជំពាក់ពីឆ្នាំ២០២៤។ យើងក៏មិនបានទទួល ៨៧៧លានដុល្លារក្នុងឆ្នាំ២០២៥ដែរ ដូច្នេះហើយជំពាក់ឥឡូវនេះមានចំនួន ១៥៨៦លានដុល្លារ»។

ប្រឈមវិបត្តិខ្វះខាតថវិកាបែបនេះ អគ្គលេខាធិការអង្កការសហប្រជាជាតិ បានស្នើជាផ្លូវការកាត់បន្ថយថវិកាស្នូលរបស់អង្គការសហប្រជាជាតិសម្រាប់ឆ្នាំ២០២៦ ចំនួន ៥៧៧លានដុល្លារ និងកាត់បន្ថយការងារជាង ១៨ភាគរយ។

តាមសេចក្តីរាយការណ៍របស់រ៉យទ័រ អគ្គលេខាធិការរបស់អង្គការសហប្រជាជាតិ កំពុងស្វែងរកមធ្យោបាយធ្វើឲ្យប្រសិទ្ធភាពការងារប្រសើរឡើង និងកាត់បន្ថយការចំណាយ នៅពេលដែលស្ថាប័នកំពូលរបស់ពិភពលោកមួយនេះ ឈានចូលដល់ខួប៨០ឆ្នាំនៅឆ្នាំនេះ ចំពេលមានវិបត្តិសាច់ប្រាក់ ដែលជំរុញភាគច្រើនដោយបំណុលរបស់សហរដ្ឋអាមេរិក។

សម្រាប់ការចំណាយនៅឆ្នាំ២០២៦ លោក អង់តូនីញ៉ូ ហ្គុយតឺរ៉េស បានដាក់ស្នើសុំថវិកាស្នូលចំនួន ៣២៣៨លានដុល្លារដែលថយចុះ១៥ភាគរយធៀបនឹងការចំណាយឆ្នាំ២០២៥។ ថវិកានោះរួមមានផ្នែកនយោបាយ មនុស្សធម៌ ការរំសាយអាវុធ សេដ្ឋកិច្ច សង្គមកិច្ច និងការងារទំនាក់ទំនង។ ការរួមចំណែកដល់ទីភ្នាក់ងារ មូលនិធិ និងកម្មវិធីរបស់អង្គការសហប្រជាជាតិភាគច្រើន ដូចជាកម្មវិធីស្បៀងអាហារពិភពលោក និងក្រុមកុមារ UNICEF គឺជាការស្ម័គ្រចិត្ត។

លោក Guterres បាននិយាយថា៖«រំហូរសាច់ប្រាក់នៅតែមានភាពផុយស្រួយ ហើយបញ្ហាប្រឈមនេះនឹងនៅតែបន្តកើតមាន ដោយមិនគិតពីថវិកាចុងក្រោយដែលត្រូវបានអនុម័តដោយមហាសន្និបាត ដែលបានផ្តល់ឱ្យនូវបរិមាណបំណុលដែលមិនអាចទទួលយកបាន»។

សហរដ្ឋអាមេរិកគឺជាអ្នកផ្តល់វិភាគទានកំពូលដល់ថវិកាស្នូលរបស់អង្គការសហប្រជាជាតិ ដោយបង់ប្រាក់អតិបរមា២២% យោងតាមការវាយតម្លៃដែលបានព្រមព្រៀងដោយមហាសន្និបាត។ ប្រធានាធិបតីអាមេរិក លោក ដូណាល់ ត្រាំ បានពណ៌នាអង្គការសហប្រជាជាតិថា មាន «សក្ដានុពលដ៏សម្បើម» ប៉ុន្តែបាននិយាយថា ស្ថាប័ននេះមិនបំពេញតួនាទីរបស់ខ្លួនបាននោះទេ។ គាត់ចង់កាត់បន្ថយការផ្តល់មូលនិធិរបស់សហរដ្ឋអាមេរិក។

Guterres បានចាប់ផ្តើមក្រុមការងារកំណែទម្រង់នៅក្នុងខែមីនា ដែលត្រូវបានគេស្គាល់ថា UN80 ដែលព្យាយាមកាត់បន្ថយការចំណាយ និងបង្កើនប្រសិទ្ធភាព។

ការរក្សាសន្តិភាពរបស់អង្គការសហប្រជាជាតិមានថវិកាដាច់ដោយឡែក។ កាលពីខែតុលា មន្ត្រីជាន់ខ្ពស់របស់អង្គការសហប្រជាជាតិបាននិយាយថា កងរក្សាសន្តិភាពមួយភាគបួននៃប្រតិបត្តិការចំនួនប្រាំបួននៅជុំវិញពិភពលោកនឹងត្រូវកាត់បន្ថយដោយសារតែការខ្វះខាតថវិកា ហើយដោយសារតែមូលនិធិនាពេលអនាគតពីសហរដ្ឋអាមេរិកនៅតែមិនប្រាកដប្រជា៕

រ៉ាន់ រើយ