ហាម៉ាសឲ្យលោកត្រាំជួយអន្តរាគមន៍ ក្រោយ​អ៊ីស្រាអែល​សម្លាប់មេបញ្ជាការជាន់​ខ្ពស់​របស់​ខ្លួន

ការធ្វើឃាតមេបញ្ជាការជាន់ខ្ពស់របស់ក្រុមហាម៉ាសដោយអ៊ីស្រាអែល គំរាមកំហែងដល់លទ្ធភាពនៃបទឈប់បាញ់នៅ​តំបន់​ហ្គាហ្សា។ នេះបើយោងតាម​ការ​លើក​ឡើង​របស់​ប្រធានគណៈប្រតិភូហាម៉ាស កាលពីថ្ងៃអាទិត្យ​ទី​១៤​ខែ​ធ្នូ​ឆ្នាំ​២០២៥ ដោយអំពាវនាវដល់ប្រធានាធិបតីអាមេរិក លោក ដូណាល់ ត្រាំ ​ឲ្យ​ដាក់សម្ពាធលើអ៊ីស្រាអែល​ឲ្យ​គោរពតាមលក្ខខណ្ឌនៃបទឈប់បាញ់។

បើ​តាម​រ៉យទ័រ អ្នកគាំទ្រក្រុមហាម៉ាសរាប់ពាន់នាក់បានប្រមូលផ្តុំគ្នានៅកណ្តាលទីក្រុងហ្គាហ្សា ដើម្បីចូលរួមក្នុងពិធីបុណ្យសពលោក Raed Saed ដែលជាមេបញ្ជាការជាន់ខ្ពស់ដែលត្រូវបានសម្លាប់កាលពីថ្ងៃសៅរ៍ រួមជាមួយគ្នីគ្នាបីនាក់ទៀត ដែល​នេះ​គឺ​​​ជា​ការ​ប្រមូល​ផ្ដុំ​ជា​សាធារណៈដ៏ធំបំផុតមួយរបស់ក្រុមនេះ ចាប់តាំងពីបទឈប់បាញ់ដែលគាំទ្រដោយសហរដ្ឋអាមេរិកបានចូលជាធរមានកាលពីខែតុលា។

នៅក្នុងសុន្ទរកថាផ្សាយតាមទូរទស្សន៍ អ្នកចរចារបស់ហាម៉ាស លោក Khalil al-Hayya បានបញ្ជាក់ពីមរណភាពរបស់លោក Saed ដោយពណ៌នាថាជាការសម្លាប់មេដឹកនាំហាម៉ាសជាន់​ខ្ពស់បំផុតចាប់តាំងពីបទឈប់បាញ់បានចាប់ផ្តើម។ លោក Hayya បានរៀបរាប់​ថា «ការបំពានជាបន្តបន្ទាប់របស់អ៊ីស្រាអែលលើកិច្ចព្រមព្រៀងបទឈប់បាញ់ និងការធ្វើឃាតចុងក្រោយនេះ គំរាមកំហែងដល់លទ្ធភាពនៃកិច្ចព្រមព្រៀង» ដោយជំរុញ​ឲ្យ​អ្នកសម្របសម្រួល «ជាពិសេសអ្នកធានាចម្បង គឺរដ្ឋបាល​​អាមេរិក និងប្រធានាធិបតី ដូណាល់ ត្រាំ» ត្រូវបង្ខំ​ឲ្យ​អ៊ីស្រាអែលប្រកាន់ខ្ជាប់នូវកិច្ចព្រមព្រៀង។

ហាម៉ាសក្រោយ​មក​បាន​អះអាង​ថា ខ្លួនបានតែងតាំងអ្នកជំនួសលោក Saed រួច​រាល់​ហើយ និង​បាន​បញ្ជាក់​ថា ការសម្លាប់នេះនឹងមិនរារាំង​ដល់​យុទ្ធនាការរបស់ពួកគេឡើយ។

អ៊ីស្រាអែលបាន​ឲ្យ​ដឹង​​ថា លោក Saed គឺជាអ្នក​រួម​គំនិត​ដ៏សំខាន់នៃការវាយប្រហារនៅថ្ងៃទី៧​ខែតុលា​ឆ្នាំ​២០២៣ ដែលបង្ក​ឲ្យ​មានសង្គ្រាម​​​ផ្ទុះ​ឡើង។

សូម​ជម្រាប​ថា អ៊ីស្រាអែល​នៅ​តែ​បន្ត​ទាមទារ​ឲ្យ​ក្រុមហាម៉ាសរំសាយអាវុធ និងត្រូវ​ដក​ចេញពីការគ្រប់គ្រង​នា​ពេល​អនាគត​នៅ​ហ្គាហ្សា ខណៈក្រុមហាម៉ាសបដិសេធការរំសាយអាវុធ និងទទូច​ឲ្យ​មានការដកទ័ពអ៊ីស្រាអែលទាំងស្រុង៕

ប្រែសម្រួល៖ ឈាង