អាន់វ៉ា៖ កម្ពុជា-ថៃ យល់ព្រមចូលរួមកិច្ចពិភាក្សាអាស៊ានសប្ដាហ៍ក្រោយ ដើម្បីកាត់បន្ថយភាពតានតឹង

លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី បានមានប្រសាសន៍ថា ប្រទេសកម្ពុជា និង​ថៃ បានព្រមព្រៀងគ្នាចូលរួមកិច្ចប្រជុំរដ្ឋមន្ត្រីការបរទេសអាស៊ាន នៅទីក្រុងគូឡាឡាំពួ នាថ្ងៃទី២២ខែធ្នូ ដែលជាគំនិតផ្ដួចផ្ដើមដឹកនាំដោយប្រទេសម៉ាឡេស៊ី និងប្លុកតំបន់ ដើម្បីបន្ធូរបន្ថយភាពតានតឹង និងបង្ការការរីករាលដាលជម្លោះបន្ថែមទៀត នៅតាមបណ្តោយព្រំដែនកម្ពុជា-ថៃ។ នេះ​បើ​យោង​តាម​ការ​ចុះ​ផ្សាយ​របស់​ Malay Mail នា​ថ្ងៃ​ព្រហស្បតិ៍​ទី​១៨​ធ្នូ​២០២៥។

លោក​អាន់វ៉ា បានបញ្ជាក់ថា កិច្ចប្រជុំនេះនឹងអនុញ្ញាត​ឲ្យ​អាស៊ានធ្វើការវាយតម្លៃស្ថានភាពជារួម និងបង្កើនកិច្ចខិតខំប្រឹងប្រែងដើម្បីបញ្ចុះបញ្ចូលភាគីទាំងពីរ​ឲ្យ​បញ្ឈប់ការវាយលុកនៅជួរមុខ ដោយចាប់ផ្តើមពីការឈប់បាញ់ជាបន្ទាន់។

លោក​អាន់វ៉ា បានប្រាប់អ្នកយកព័ត៌មានថា «យើងកំពុងអំពាវនាវ​ឲ្យ​ពួកគេបញ្ឈប់ការវាយលុកនៅជួរមុខ ហើយ​បើអាចធ្វើទៅបាន ត្រូវអនុវត្តការឈប់បាញ់ជាបន្ទាន់»។

លោកបានបន្តថា ការសម្រេចចិត្តនេះបានធ្វើឡើងបន្ទាប់ពីការពិគ្រោះយោបល់ជាមួយនាយករដ្ឋមន្ត្រីនៃប្រទេសទាំងពីរ ក៏ដូចជាការពិភាក្សាជាមួយប្រធានាធិបតី​អាមេរិក លោក ដូណាល់ ត្រាំ ដែលបានជំរុញឲ្យ​មានការអត់ធ្មត់។

ទោះបីជាមានការព្រួយបារម្ភកាលពីមុន អំពីការរៀបចំកិច្ចពិភាក្សានៅចំពេលដែលមានការប្រយុទ្ធគ្នាកំពុងបន្តក៏ដោយ ប៉ុន្តែលោក​អាន់វ៉ា​ បានឲ្យ​ដឹងថា ឥឡូវនេះទាំងទីក្រុងភ្នំពេញ និង​ទីក្រុងបាងកក បានយល់ព្រមចូលរួមកិច្ចប្រជុំនេះហើយ ដែលនេះគឺជាជំហានវិជ្ជមានមួយសម្របសម្រួលដោយតួនាទីរបស់អាស៊ាន។

លោកបានបន្ថែមថា ភាគីទាំងពីរក៏បានយល់ព្រមជាគោលការណ៍លើការដាក់ពង្រាយក្រុមអ្នកសង្កេតការណ៍អាស៊ាន ខណៈដែលម៉ាឡេស៊ីនៅតែបន្តការចូលរួមទាំងក្នុងកម្រិតការទូត និងកម្រិតយោធា។

លោក​អាន់វ៉ា បានបញ្ជាក់ថា លោកនៅតែមានសុទិដ្ឋិនិយមថា កិច្ចប្រជុំថ្ងៃទី២២ធ្នូ អាចជួយធានាឲ្យមានការបញ្ឈប់អរិភាពជាជំហានដំបូង និងបើកផ្លូវសម្រាប់កិច្ចពិភាក្សាឲ្យ​បានទូលំទូលាយលើការដោះស្រាយរយៈពេលវែង៕

ប្រែសម្រួល៖ ឈាង