រដ្ឋមន្ត្រីការពារជាតិថៃ សារភាព​ថា កម្ពុជា​ពិត​ជាមាន​សមត្ថភាព​បាញ់​ទម្លាក់​ដ្រូនរបស់​ខ្លួនមែន​

រដ្ឋមន្ត្រីក្រសួងការពារជាតិថៃ បាន​សារភាព​ថា កងកម្លាំងកម្ពុជាពិត​ជា​អាច​​បាញ់ទម្លាក់ដ្រូនស៊ើបការណ៍យោធារបស់ថៃមួយគ្រឿង​មែន ដោយលោកបានពណ៌នាថាការបាត់បង់នេះជារឿងដែលគួរ​ឲ្យ​សោកស្តាយ ប៉ុន្តែមិនអាចជៀសផុតបានឡើយ ខណៈដែលភាពតានតឹងរវាងប្រទេសជិតខាងទាំងពីរកំពុងកើនឡើង។

យោង​តាម Thai Enquirer រដ្ឋមន្ត្រីការពារជាតិ លោក Natthaphon Narkphanit បានបញ្ជាក់​នា​ថ្ងៃ​ទី​១៩​ធ្នូ​នេះ​ថា យន្តហោះនោះគឺជាដ្រូនស៊ើបការណ៍ប្រភេទ DP-20 ហើយលោកបានទទួលស្គាល់ថា កម្ពុជាមានសមត្ថភាពការពារអាកាសដែលអាចកំណត់គោលដៅលើប្រព័ន្ធបែបនេះបាន។ លោកបានបន្តថា ប្រតិបត្តិការយោធាតែងតែមានការបាត់បង់ដោយជៀសមិនរួច ហើយទ្រព្យសម្បត្តិការពារជាតិត្រូវតែប្រើប្រាស់នៅពេលចាំបាច់។

លោក Natthaphon ក៏បានលើកឡើងផងដែរអំពីការរកឃើញដ្រូននាពេលថ្មីៗនេះ នៅជិតប្លុក​បូមប្រេងក្នុងឈូងសមុទ្រថៃ ដែលបង្ក​ឲ្យ​មានការព្រួយបារម្ភអំពីលទ្ធភាពនៃ​ការគំរាមកំហែង។ លោកបាននិយាយថា ការតាមដានមានភាពស្មុគស្មាញដោយសារចរាចរណ៍ផ្លូវទឹកស៊ីវិលដ៏មមាញឹក រួមទាំងទូកនេសាទដែលប្រើប្រាស់ដ្រូនផងដែរ ហើយការស៊ើបអង្កេតកំពុងបន្តធ្វើឡើង។

លោកបានបន្ថែមថា បញ្ជាត្រូវបានដាក់ទៅកាន់គ្រប់អង្គភាពនៃកងកម្លាំងប្រដាប់អាវុធទាំងអស់ ឲ្យរឹតបន្តឹងសន្តិសុខ។ ជាមួយគ្នានេះ ក្រុមហ៊ុនថាមពលរដ្ឋ PTT កំពុងស្វែងរកការអនុម័តដើម្បីដំឡើងប្រព័ន្ធប្រឆាំងដ្រូននៅតាមទីតាំងនានាក្នុងសមុទ្រ ខណៈដែលកងទ័ពអាកាស និងកងទ័ពជើងទឹក បានបង្កើនការត្រួតពិនិត្យ និងការតាមដានយ៉ាងយកចិត្តទុកដាក់៕

ប្រែសម្រួល៖ ឈាង