EU យល់ព្រមផ្តល់កម្ចី​៩០​ពាន់លានអឺរ៉ូដល់អ៊ុយក្រែន ដោយ​មិនប្រើ​ទ្រព្យ​បង្កករបស់រុស្ស៊ី

មេដឹកនាំសហភាពអឺរ៉ុប (EU) បានឯកភាពគ្នាកាលពីថ្ងៃសុក្រ​ទី​១៩​ខែ​ធ្នូ​ឆ្នាំ​២០២៥ ក្នុងការផ្តល់ប្រាក់កម្ចីចំនួន​៩០​ពាន់លានអឺរ៉ូ​ដល់ប្រទេសអ៊ុយក្រែន ដើម្បីបំពេញតម្រូវការហិរញ្ញវត្ថុសម្រាប់ឆ្នាំ​២០២៦ និង ២០២៧។ នេះគឺជាការសម្រេចចិត្តផ្អាកផែនការប្រើប្រាស់ទ្រព្យសម្បត្តិធនាគារកណ្តាលរបស់រុស្ស៊ីដែលត្រូវបានបង្កកដោយផ្ទាល់ បន្ទាប់ពីមានការជជែកដេញដោលផ្នែកច្បាប់និងនយោបាយអស់រយៈពេលជាច្រើនខែ។

បើ​តាម BBC បន្ទាប់ពីកិច្ចប្រជុំកំពូល​​នៅទីក្រុងប្រ៊ុចសែល សហភាពអឺរ៉ុបនឹងប្រមូលមូលនិធិនេះពីទីផ្សារមូលធន ដោយប្រើប្រាស់ថវិការួមរបស់ខ្លួនជាទ្រព្យបញ្ចាំ។ អ៊ុយក្រែននឹងត្រូវសងប្រាក់កម្ចីដែលគ្មានការប្រាក់នេះវិញ លុះត្រាតែរុស្ស៊ីបង់សំណងសង្គ្រាម ខណៈដែលទ្រព្យសម្បត្តិរុស្ស៊ីប្រហែល២១០​ពាន់លានអឺរ៉ូ នឹងនៅតែត្រូវបានបង្កកដដែល។

លោក Petteri Orpo នាយករដ្ឋមន្ត្រីហ្វាំងឡង់ បានមានប្រសាសន៍ថា «នេះគឺជាដំណោះស្រាយដែលអាចទទួលយកបាន ទោះបី​មិនមែនជាអ្វីដែលយើងរំពឹងទុកក៏ដោយ» ដោយបន្ថែមថា ការធានាហិរញ្ញវត្ថុសម្រាប់អ៊ុយក្រែនគឺជាអាទិភាពចម្បង។

ប្រធានក្រុមប្រឹក្សាសហភាពអឺរ៉ុប លោក António Costa បានលើកឡើងថា ប្លុកនេះបានបំពេញតាមការសន្យារបស់ខ្លួនចំពោះទីក្រុងកៀវ ហើយបានកត់សម្គាល់ថា ទ្រព្យសម្បត្តិរុស្ស៊ីដែលត្រូវបានបង្កកនឹងនៅតែជាប្រភពបម្រុងដ៏មានសក្តានុពលសម្រាប់ពេលអនាគត។

ប្រាក់កម្ចីនេះ នឹងត្រូវចេញនៅក្រោមយន្តការកិច្ចសហប្រតិបត្តិការពិសេស ដែលអនុញ្ញាត​ឲ្យ​រដ្ឋសមាជិកមួយចំនួនមិនចាំបាច់​​រ៉ាប់រង​លើបំណុលហិរញ្ញវត្ថុ​នេះ​ឡើយ។ ប្រទេសហុងគ្រី ស្លូវ៉ាគី និងសាធារណរដ្ឋឆែក បានយល់ព្រមមិនរារាំងកិច្ចព្រមព្រៀង បន្ទាប់ពី​មាន​យន្តការ​ពិសេស​នេះ។

ប្រធានាធិបតីអ៊ុយក្រែន លោក វ៉ូឡូឌីមៀរ​ ហ្សេលេនស្គី បានស្វាគមន៍កិច្ចព្រមព្រៀងនេះ ដោយហៅវាថាមានសារៈសំខាន់ណាស់ក្នុងការរក្សាស្ថិរភាពហិរញ្ញវត្ថុ។ យ៉ាង​ណា​មិញ រុស្ស៊ីបានរិះគន់ការសម្រេចចិត្តរបស់​សហភាពអឺរ៉ុប ហើយ​ចាត់ទុក​​ថាវា​ជាសំណើខុសច្បាប់។

សហភាពអឺរ៉ុបបានបញ្ជាក់ថា ខ្លួននឹងស្វែងរកការរួមចំណែកបន្ថែមពីសម្ព័ន្ធមិត្ត រួមទាំងចក្រភពអង់គ្លេសនិងកាណាដា ដើម្បីបំពេញតម្រូវការមូលនិធិសរុបប្រមាណ១៣៥ពាន់លានអឺរ៉ូរបស់អ៊ុយក្រែន សម្រាប់ឆ្នាំ២០២៦–២៧៕

​ប្រែសម្រួល៖ ឈាង