ថៃព្រមានពីការ​បំពុល​ខ្យល់នៅសប្តាហ៍ក្រោយ ខណៈ PM2.5 កើនហួសកម្រិតសុវត្ថិភាព

នាយកដ្ឋានត្រួតពិនិត្យការបំពុលរបស់ប្រទេសថៃ បានព្រមាននា​​ថ្ងៃសៅរ៍​​ទី​២០​ខែ​ធ្នូ​ឆ្នាំ​២០២៥​នេះ​ថា កម្រិតផ្សែងអ័ព្ទដែលមានគ្រោះថ្នាក់ ត្រូវបានរំពឹងថានឹងកាន់តែអាក្រក់ទៅៗនៅសប្តាហ៍ក្រោយ ដោយមានភាគល្អិតតូចៗលើសពីស្តង់ដារសុវត្ថិភាពសុខភាពនៅក្នុងតំបន់ជាច្រើន រួមទាំងទីក្រុងបាងកកផងដែរ។

យោង​តាម​បាងកក​ប៉ុស្តិ៍ នាយកដ្ឋានបានលើកឡើងថា កំហាប់ភាគល្អិត PM2.5 បានកើនឡើងដល់កម្រិត «ពណ៌ទឹកក្រូច» ដែលបង្កហានិភ័យដល់សុខភាព នៅតាមផ្នែកខ្លះនៃភាគឦសាន និងតំបន់វាលទំនាបកណ្តាល ព្រមទាំងនៅស្ថានីយត្រួតពិនិត្យចំនួន៣១ ក្នុងទីក្រុងបាងកក និងតំបន់ជុំវិញ។ លទ្ធផលនៃការវាស់ស្ទង់នៅកន្លែងខ្លះ បានកើនឡើងលើសកម្រិតសុវត្ថិភាពរបស់រដ្ឋាភិបាល ដែលកំណត់ត្រឹម ៣៧.៥មីក្រូក្រាមក្នុងមួយម៉ែត្រគូប។

កម្រិតបំពុលខ្ពស់បំផុតត្រូវបានកត់ត្រានៅក្នុងបណ្តាខេត្តភាគឦសានដូចជា Nong Khai និង Khon Kaen និងខេត្តនៅតំបន់កណ្តាលរួមមាន Ayutthaya និង Saraburi។ នៅក្នុងទីក្រុងបាងកក ខណ្ឌមួយចំនួនដូចជា Bang Na, Prawet និង Chatuchak បានរាយការណ៍ពីកម្រិតបំពុលដែលកើនឡើងខ្ពស់បំផុត។

អាជ្ញាធរបាន​ឲ្យ​ដឹងថា ការបំពុលទំនងជានឹងបន្តស្ថិតនៅកម្រិតលើសពីសុវត្ថិភាពរហូតដល់ថ្ងៃទី​២៦​ខែធ្នូ ដោយសារតែម៉ាស់ខ្យល់ត្រជាក់បានទប់ភាគល្អិតធូលីមិន​ឲ្យ​ហើរចេញ និងធ្វើ​ឲ្យ​ខ្យល់មិនសូវមានចលនា ជាពិសេសនៅក្នុងទីក្រុងបាងកក តំបន់ភាគឦសាន និងតំបន់កណ្តាល។

មន្ត្រីបានជំរុញ​ឲ្យ​សាធារណជនជៀសវាងការដុតកាកសំណល់នៅទីវាល និងកាត់បន្ថយការប្រើប្រាស់យានយន្ត ខណៈក្រុមមនុស្សដែលងាយរងគ្រោះ រួមមានកុមារ មនុស្សចាស់ និងស្ត្រីមានផ្ទៃពោះ ត្រូវបានណែនាំ​ឲ្យ​ផ្អាក​សកម្មភាពនៅខាងក្រៅផ្ទះ៕

ប្រែសម្រួល៖ ឈាង