តើឥណ្ឌា នឹងមានចំណាត់ការបែបណាចំពោះថៃ ដែលបំផ្លាញរូបសំណាកព្រះវិស្ណុ?

ប្រជាជនឥណ្ឌាទូទាំងពិភពលោក កំពុងខឹងសម្បានិងកើតទុក្ខមិនសុខចិត្តចំពោះការដែលទាហានថៃ កម្ទេចរូបសំណាកព្រះវិស្ណុនៅតំបន់អានសេះ នៃប្រទេសកម្ពុជា។

ប្រជាជនឥណ្ឌា ជាអ្នកគោរពប្រតិបត្តិសាសនាយ៉ាងខ្ជាប់ខ្ជួន ដូច្នេះហើយទង្វើរបស់ថៃ មិនមែនប៉ះពាល់ត្រឹមសាសនាទេ ពោលគឺប៉ះពាល់ដល់ប្រទេសឥណ្ឌទាំងមូល ហើយកុំថាឡើយត្រឹមឥណ្ឌា សូម្បីប្រទេសកាន់សាសនាហិណ្ឌូដទៃទៀត ក៏ប៉ះពាល់ដែរ។

សម្រាប់ប្រជាជនឥណ្ឌាជាង ១ពាន់លាននាក់ដែលកាន់សាសនាហិណ្ឌូ ព្រះវិស្ណុមិនមែនគ្រាន់តែជារូបសំណាកទេ ប៉ុន្តែគឺស្មើនឹង «ដង្ហើមនិងជីវិត»។

ការកម្ទេចរូបសំណាកត្រូវបានគេចាត់ទុកថាជាការប្រមាថមើលងាយយ៉ាងធ្ងន់ធ្ងរដល់អាទិទេពខ្ពស់បំផុតរបស់ពួកគេ។ សាសនាហិណ្ឌូនិងអរិយធម៌ឥណ្ឌាមានទំនាក់ទំនងគ្នាយ៉ាងជិតស្និទ្ធ។ ប្រជាជនឥណ្ឌាភាគច្រើនលើសលប់ (ប្រហែល ៦០% ទៅ ៧០% នៃអ្នកកាន់សាសនាហិណ្ឌូ) គឺជាអ្នកដើរតាមនិកាយវិស្ណុនិយម។ ពួកគេចាត់ទុកព្រះវិស្ណុគឺជាព្រះខ្ពស់បំផុត ឬជាព្រះអាទិទេពតែមួយគត់ដែលគ្រប់គ្រងចក្រវាល។

ដូច្នេះហើយ ការបំផ្លាញបេតិកភណ្ឌហិណ្ឌូនៅក្រៅប្រទេស ត្រូវបានគេមើលឃើញថាជាការវាយប្រហារលើមោទនភាព និងអត្តសញ្ញាណនៃពូជសាសន៍ឥណ្ឌាផងដែរ។

ក្នុងករណីដូចទង្វើរបស់ថៃនេះ, ប្រជាជននិងក្រុមសាសនានៅក្នុងប្រទេសឥណ្ឌានឹងដាក់សម្ពាធឲ្យរដ្ឋាភិបាលចេញមុខតវ៉ា ឬចាត់វិធានការការទូតឲ្យបានម៉ឺងម៉ាត់បំផុត។

ជារឿងដែលមិនអាចព្រងើយកន្តើយបាន! បច្ចុប្បន្ន រដ្ឋាភិបាលឥណ្ឌាក្រោមការដឹកនាំរបស់បក្ស BJP គឺមានគោលនយោបាយការពារនិងលើកតម្កើងតម្លៃសាសនាហិណ្ឌូនៅជុំវិញពិភពលោក។ ដូច្នេះ ភាពស្ងប់ស្ងាត់ចំពោះការបំផ្លាញរូបសំណាកសាសនា ច្បាស់ជាធ្វើឲ្យរដ្ឋាភិបាលបាត់បង់ប្រជាប្រិយភាព ជាក់ជាមិនខាន។

លើសពីនេះ ឥណ្ឌាក៏នឹងប្រើប្រាស់ភាសាការទូតធ្ងន់ៗផងដែរ ដើម្បីសម្តែងការសោកស្តាយ និងទាមទារឲ្យប្រទេសថៃផ្តល់ការពន្យល់ ឬចាត់វិធានការចំពោះអ្នកបង្កហេតុ។ ម្យ៉ាង ព្រឹត្តិការណ៍បែបនេះអាចធ្វើឲ្យទំនាក់ទំនងឥណ្ឌា-ថៃ មានភាពរកាំរកូសផងដែរ។

សម្រាបប្រជាជន! ជនជាតិឥណ្ឌា អាចនឹងធ្វើពហិកាទំនិញថៃ ឬលុបចោលដំណើរកម្សាន្តទីនោះផងដែរ ដែលចំណាត់ការនេះ នឹងធ្វើឲ្យសេដ្ឋកិច្ចថៃដាំក្បាលចុះមួយកម្រិត ស្របពេលកំពុងយ៉ាប់យ៉ឺន ដោយសារការឈ្លានពានកម្ពុជា រួចទៅហើយនោះ៕ 

អត្ថបទ៖ សុខ សុវណ្ណ