ព័ត៌មានអន្ដរជាតិ

អ៊ីស្រាអែលគ្រោងចាយប្រាក់១១០ប៊ីលានដុល្លារឈានទៅផលិតសព្វារុធដោយខ្លួនឯង

បានផុស

៦ ខែ មុន

នៅ

ថ្ងៃសុក្រ ២៦ ធ្នូ ២០២៥

ដោយ

នាយករដ្ឋមន្ត្រីលោក Benjamin Netanyahu បានលើកឡើងពីការផ្លាស់ប្តូរគោលនយោបាយដ៏សំខាន់មួយគឺអ៊ីស្រាអែលចង់បំបែកកំណត់ត្រាថ្មីដោយមិនពឹងផ្អែកសព្វាវុធបរទេស និងមានភាពឯករាជ្យលើយោធាខ្លួនឯង ហើយរដ្ឋយូដាមួយនេះនឹងវិនិយោគលុយចំនួន១១០ប៊ីលានដុល្លាដើម្បីផលិតអាវុធដោយខ្លួនឯង ដោយមិនឱ្យលើសពី១០ឆ្នាំខាងមុខ។

នាយករដ្ឋមន្រ្តីអ៊ីស្រាអែល Benjamin Netanyahu។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក Benjamin Netanyahu ចំនួនវិនិយោគនេះគឺមានតម្លៃខ្ពស់ខ្លាំងណាស់ ដែលមានទំហំទឹកប្រាក់ ៣៥០ ប៊ីលានដុល្លាសេក [shekels] ឬ ស្មើ ១១០ប៊ីលានដុល្លារក្នុងរយៈពេលដប់ឆ្នាំ។

នាយករដ្ឋមន្ត្រីអ៊ីស្រាអែល បាននិយាយពីមូលដ្ឋានទ័ពអាកាសមួយនៅភាគខាងត្បូងនៃប្រទេសថា៖ «ច្បាស់ណាស់នឹងមានគោលបំណងដើម្បីកសាងឧស្សាហកម្មអាវុធគ្រប់គ្រាន់ដោយខ្លួនឯង» ជាការរាយការណ៍ពីអ្នកឆ្លើយឆ្លងព័ត៌មានរបស់លោកនៅទីក្រុងហ្សេរុយសាឡឹម។

នាយករដ្ឋមន្ត្រីបានប្រកាសថា៖ «យើងប្រាថ្នាចង់ឱ្យមានអាវុធរបស់យើងផលិតខ្លួនឯងឱ្យបានច្រើនតាមដែលអាចធ្វើទៅបាននៅក្នុងប្រទេសអ៊ីស្រាអែល។ ហើយវារួមបញ្ចូលទាំងកន្លែងផលិតយន្តហោះមួយចំនួនដែរ។ យើងចង់កាត់បន្ថយការពឹងផ្អែកលើប្រទេសណាមួយ សូម្បីតែប្រទេសជាមិត្តរបស់យើងក៏ដោយ»។

អ្នកកាសែតឱ្យដឹងទៀតថា នេះជាការនិយាយប្រយោលដោយផ្ទាល់ទៅកាន់សហរដ្ឋអាមេរិក ដែលជាអ្នកផ្គត់ផ្គង់ឃ្លាំងអាវុធមួយភាគធំរបស់អ៊ីស្រាអែល ប៉ុន្តែក៏សំដៅលើដៃគូអឺរ៉ុបផ្សេងទៀតរបស់ខ្លួនផងដែរ ដែលបានដាក់កម្រិតនៃការបញ្ជូនអាវុធរបស់ពួកគេមកឱ្យអ៊ីស្រាអែល ដោយសារតែសង្រ្គាមដ៏រ៉ាំរៃនៅហ្គាហ្សា។

បន្ទាប់ពីពីរឆ្នាំនៃជម្លោះដែលមិនមានការអន្តរាគមន៍ពីខាងណា ប្រឆាំងនឹងក្រុមហាម៉ាស ហេសបូឡាហ៍[ Hezbollah] និងសង្រ្គាមរយៈពេល ១២ថ្ងៃ ប្រឆាំងនឹងអ៊ីរ៉ង់កាលពីខែមិថុនាកន្លងទៅ អ៊ីស្រាអែលកំពុងរៀនពីភាពងាយរងគ្រោះផ្នែកដឹកជញ្ជូនរបស់ខ្លួន។

សម្រាប់លោក Benjamin Netanyahu បានអះអាងថា៖ «សន្តិភាពត្រូវបានបង្កើតឡើងដោយអ្នកខ្លាំងប៉ុណ្ណោះ»៕

ប្រែសម្រួលដោយ៖ ណឺ មិនា