ព័ត៌មានអន្ដរជាតិ

អាល្លឺម៉ង់ថា បទឈប់បាញ់កម្ពុជា-ថៃ ជាក្តីសង្ឃឹមនិងជំរុញភាគីទាំងពីរបន្តចរចាគ្នា

បានផុស

៦ ខែ មុន

នៅ

ថ្ងៃអាទិត្យ ២៨ ធ្នូ ២០២៥

ដោយ

ក្រោយបទឈប់បាញ់រវាងប្រទេសថៃនិងកម្ពុជាចូលជាធរមាន ប៉ុន្មានម៉ោង រដ្ឋមន្ត្រីការបរទេសអាល្លឺម៉ង់ បានចាត់ទុក បទឈប់បាញ់នោះ ជាក្តីសង្ឃឹម បន្ទាប់ពីការប្រយុទ្ធគ្នាលើកទី២រយៈពេល៣សប្តាហ៍ក្នុងឆ្នាំ២០២៥ ដែលមានអន្តរជាតិអន្តរាគមន៍យ៉ាងច្រើនឲ្យភាគីទាំងពីរងាកទៅរកការចរចាការទូត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត Johann Wadephul រដ្ឋមន្ត្រីការបរទេសសហព័ន្ធអាល្លឺម៉ង់លើបណ្តាញសង្គម X ថា៖«បទឈប់បាញ់រវាងប្រទេសថៃ និងកម្ពុជាផ្តល់ក្តីសង្ឃឹម។ បន្ទាប់ពីអំពើហិង្សាជាច្រើនសប្តាហ៍ វាគឺជាជំហានដ៏សំខាន់មួយឆ្ពោះទៅរកសន្តិសុខ និងស្ថិរភាព ជាពិសេសសម្រាប់ជនភៀសខ្លួនក្នុងស្រុក។ ឥឡូវនេះ វាជារឿងសំខាន់ដែលភាគីទាំងពីរត្រូវប្រកាន់ខ្ជាប់នូវកិច្ចព្រមព្រៀងនេះជាប់លាប់»។

កម្ពុជានិងប្រទេសថៃក្នុងកិច្ចប្រជុំគណៈកម្មាធិការព្រំដែនទូទៅ ដឹកនាំដោយរដ្ឋមន្ត្រីការពារជាតិនៃប្រទេសទាំងពីរ បានសម្រេចនូវបទឈប់បាញ់បន្ទាន់មួយកាលថ្ងៃទី២៧ បន្ទាប់ពីការចរចាដ៏តានតឹងរបស់លេខាធិការដ្ឋាននៃគណៈកម្មាធិការព្រំដែនទូទៅអស់រយៈពេល៣ថ្ងៃ។

បទឈប់បាញ់ដែលដាក់ឲ្យសាកល្បងរយៈពេល៧២ម៉ោងចាប់ពីម៉ោង១២ថ្ងៃត្រង់ថ្ងៃទី២៧ខែធ្នូ គឺជាការបើកផ្លូវសម្រាប់ការអនុវត្តពេញលេញនូវកិច្ចព្រមព្រៀងសន្តិភាពទីក្រុងកូឡាឡាំពូ ដែលប្រមុខរដ្ឋាភិបាលនៃភាគីទាំងពីរបានចុះហត្ថលេខា ក្រោមវត្តមានប្រធានាធិបតីសហរដ្ឋអាមេរិក លោក ដូណាល់ ត្រាំ និង អ្នកសម្របសម្រួលរបស់ប្រធានអាស៊ាន លោក អាន់វ៉ា អ៊ីប្រាហ៊ីម។

រដ្ឋមន្ត្រីការបរទេសអាល្លឺម៉ង់ ក៏មិនខុសពីមហាអំណាចផ្សេងៗមានសហរដ្ឋអាមេរិក ចិន បារាំង អង់គ្លេស បានថ្លែងអំណរគុណយ៉ាងជ្រាលជ្រៅចំពោះប្រធានអាស៊ាន និងក្រុមសង្កេតការណ៍។

លោកបណ្ឌិត Johann Wadephul បានលើកឡើងថា៖«តួនាទីរបស់ពួកគេនៅតែមានសារៈសំខាន់ក្នុងការទប់ស្កាត់ការកើតឡើងវិញនៃអំពើហិង្សា។ កិច្ចព្រមព្រៀងបទឈប់បាញ់អាចជាជំហានដំបូងឆ្ពោះទៅរកសន្តិភាពយូរអង្វែង ដើម្បីសម្រេចបាននូវគោលដៅនេះ ការសន្ទនាត្រូវតែបន្ត»៕

រ៉ាន់ រើយ