ត្រាំ ថា​ ផែនការសន្តិភាពអ៊ុយក្រែនសម្រេចបាន «៩៥%» ហើយ

ប្រធានាធិបតីអាមេរិក លោក ដូណាល់ ត្រាំ បានមានប្រសាសន៍កាលពីថ្ងៃអាទិត្យ​ទី​២៨​ខែ​ធ្នូ​ឆ្នាំ​២០២៥​ថា កិច្ច​ចរចាដើម្បីបញ្ចប់សង្រ្គាមនៅអ៊ុយក្រែនគឺ «កាន់តែខិតជិតមែនទែនហើយ ប្រហែលជាជិតខ្លាំងណាស់» បន្ទាប់ពីកិច្ចពិភាក្សាជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ទោះបីជាមេដឹកនាំទាំងពីរបានទទួលស្គាល់ថា ជម្លោះសំខាន់ៗ ជាពិសេសលើបញ្ហាតំបន់ភាគខាងកើតអ៊ុយក្រែន នៅមិនទាន់មានដំណោះស្រាយក៏ដោយ។

យោង​តាម​ France24 ថ្លែងនៅក្នុងសន្និសីទសារព័ត៌មានរួមគ្នានៅរីសត Mar-a-Lago លោកត្រាំ​បាន​លើក​ឡើង​ថា វានឹងដឹងច្បាស់ «ក្នុងរយៈពេលប៉ុន្មានសប្តាហ៍ទៀត» ថាតើកិច្ចខិតខំប្រឹងប្រែងសម្របសម្រួលដោយ​អាមេរិកនឹងទទួលបានជោគជ័យដែរឬទេ ដោយលោកបានរៀបរាប់ពីវឌ្ឍនភាពលើធាតុផ្សំភាគច្រើននៃកិច្ចព្រមព្រៀងដែលអាចកើតមាន។

លោកត្រាំ បានរៀបរាប់​ថា «តំបន់ Donbas នៅមិនទាន់ដោះស្រាយរួចរាល់ទេ ប៉ុន្តែវាកំពុងខិតជិតគ្នាខ្លាំងហើយ។ នោះគឺជាបញ្ហាដ៏លំបាកបំផុត»។

លោកហ្សេលេនស្គី បាននិយាយថា អ៊ុយក្រែន និង​អាមេរិកបានឈានដល់កិច្ចព្រមព្រៀងលើការធានាសន្តិសុខ ខណៈដែលលោកត្រាំ បានប្រាប់​ថា ការចរចាគឺសម្រេចបានប្រហែល«៩៥% ហើយ» ដោយបន្ថែមថា បណ្តាប្រទេសនៅអឺរ៉ុបត្រូវបានរំពឹងថានឹងទទួលបន្ទុកភាគច្រើន ក្រោមការគាំទ្រពី​អាមេរិក។

អនាគតនៃតំបន់ Donbas ដែលជាមជ្ឈមណ្ឌលឧស្សាហកម្មភាគខាងកើតរបស់អ៊ុយក្រែន ហើយដែលភាគច្រើនត្រូវបានគ្រប់គ្រងដោយកងកម្លាំងរុស្ស៊ី នៅតែជាឧបសគ្គចម្បង។ ទីក្រុងមូស្គូកំពុងទាមទារឲ្យ​អ៊ុយក្រែនដកទ័ពទាំងស្រុងចេញពីតំបន់នោះ ដែលជាជំហរមួយដែលទីក្រុងកៀវ​​បដិសេធ។

ជំនួបនេះបានកើតឡើងខណៈដែលរុស្ស៊ីបានបង្កើនការវាយប្រហារលើអ៊ុយក្រែន ដោយបានបាញ់បង្ហោះមីស៊ីល និងដ្រូនរាប់រយគ្រឿងកាលពីចុងសប្តាហ៍ ដែលបានធ្វើ​ឲ្យ​ខូចខាតដល់ហេដ្ឋារចនាសម្ព័ន្ធថាមពលក្នុងទីក្រុងកៀវ និងទីក្រុងផ្សេងៗទៀត។

លោកត្រាំ បាននិយាយ​ថា លោកជឿជាក់ថា ទាំងលោកហ្សេលេនស្គី និងប្រធានាធិបតីរុស្ស៊ី លោក វ្ល៉ាឌីមៀរ ពូទីន សុទ្ធតែមានចេតនាពិតប្រាកដចំពោះសន្តិភាព ដោយបញ្ជាក់ថា លោកមានគម្រោងនឹងពិភាក្សាជាមួយលោកពូទីនម្តងទៀត បន្ទាប់ពីកិច្ចប្រជុំនៅរដ្ឋផ្លរីដានេះ។ កាលពីព្រឹកថ្ងៃអាទិត្យ លោកត្រាំ ក៏បានធ្វើការសន្ទនាតាមទូរសព្ទដែលលោកបានពណ៌នាថាជាការពិភាក្សា «ប្រកបដោយផ្លែផ្កា» ជាមួយមេដឹកនាំរុស្ស៊ីផងដែរ។

ជំនួយការជាន់ខ្ពស់វិមានក្រឹមឡាំងម្នាក់បានប្រាប់​ថា លោកពូទីន បានព្រមានលោកត្រាំ ថា ការស្នើឲ្យមានបទឈប់បាញ់រយៈពេល៦០ថ្ងៃ មានតែធ្វើឲ្យជម្លោះអូសបន្លាយពេលប៉ុណ្ណោះ និងបានជំរុញឲ្យអ៊ុយក្រែនសម្រេចចិត្តឲ្យបានឆាប់រហ័សលើបញ្ហាតំបន់ Donbas។

លោកហ្សេលេនស្គី បាន​បញ្ជាក់​ថា ខណៈពេលដែលទីក្រុងវ៉ាស៊ីនតោន និងទីក្រុងកៀវ បានកាត់បន្ថយភាពខុសគ្នាលើការរៀបចំសន្តិសុខ និងសេដ្ឋកិច្ច ប៉ុន្តែសំណួរបញ្ហាទឹកដី និងអនាគតនៃរោងចក្រថាមពលនុយក្លេអ៊ែរ Zaporizhzhia ដែលកាន់កាប់ដោយរុស្ស៊ី នៅតែមិនទាន់ដោះស្រាយនៅឡើយ។

ក្របខ័ណ្ឌសន្តិភាព២០ចំ​ណុចដែលត្រូវបានកែសម្រួល កំពុងស្ថិតនៅក្រោមការពិភាក្សា ទោះបីជាភាគីទាំងពីរនិយាយថា ការសម្រេចចិត្តចុងក្រោយនឹងតម្រូវ​ឲ្យ​មានកិច្ចព្រមព្រៀងកម្រិតប្រធានាធិបតី ហើយក្នុងករណីរបស់អ៊ុយក្រែន អាចនឹងត្រូវធ្វើប្រជាមតិថ្នាក់ជាតិថែមទៀតផងលើ​បញ្ហា​បោះបង់ចោល​ទឹកដី​ទៅ​ឲ្យ​រុស្ស៊ី៕

ប្រែសម្រួល៖ ឈាង