ត្រាំ ប្រកាសចាប់បានប្រធានាធិបតី វ៉េណេស៊ុយអេឡា និងភរិយា រួចបញ្ជូនចេញពីប្រទេសតាមយន្តហោះ

តាមរយៈបណ្តាញសង្គម Truth Social បង្ហោះ​​នៅថ្ងៃសៅរ៍ទី៣ខែមករាឆ្នាំ២០២៦ ប្រធានាធិបតីអាមេរិក ដូណាល់ ត្រាំ ប្រកាសថា លោកចាប់ខ្លួនប្រធានាធិបតី វ៉េណេស៊ុយអេឡា នីកូឡាស់ ម៉ាឌូរ៉ូ និងភរិយារបស់គាត់បានហើយ។

លោកត្រាំសរសេរថា៖ «សហរដ្ឋអាមេរិក បានទទួលជោគជ័យក្នុងការបើកការវាយប្រហារទ្រង់ទ្រាយធំលើវ៉េណេស៊ុយអេឡា និងមេដឹកនាំរបស់ប្រទេសនេះ គឺប្រធានាធិបតី នីកូឡាស ម៉ាឌូរ៉ូ ដែលរូបលោក រួមជាមួយភរិយា ត្រូវបានចាប់ខ្លួន និងបញ្ជូនចេញពីប្រទេសតាមយន្តហោះ។ ប្រតិបត្តិការនេះ ធ្វើឡើងដោយសហការជាមួយស្ថាប័នអនុវត្តច្បាប់របស់សហរដ្ឋអាមេរិក»។

មុននេះលោកត្រាំ បានបញ្ជាឲ្យកងទ័ពអាមេរិក បើកការវាយប្រហារវ៉េណេស៊ុយអេឡា បង្កឲ្យមានការផ្ទុះធំៗនៅក្នុងរដ្ឋធានីការ៉ាកាស និងច្រើនកន្លែងទៀត រួមទាំងផ្ទុះនៅមូលដ្ឋានយោធាផងដែរ។

ប្រតិបត្តិការនេះកើតឡើង បន្ទាប់ពីរដ្ឋបាលទីក្រុងវ៉ាស៊ីនតោន ដាក់សម្ពាធលើលោកម៉ាឌូរ៉ូ ជាច្រើនសប្តាហ៍មកហើយ ដោយចោទប្រកាន់ថា ប្រធានាធិបតីវ៉េណេស៊ុយអេឡា នៅពីក្រោយលំហូរនៃការជួញដូរគ្រឿងញៀន និងបទឧក្រិដ្ឋ ដែលជ្រៀតចូលក្នុងទឹកដីអាមេរិក៕

អត្ថបទ៖ សុខ សុវណ្ណ