វៀតណាម​បារម្ភ​ពីការចាប់ខ្លួនមេដឹកនាំវ៉េណេស៊ុយអេឡារបស់អាមេរិក​ និងស្នើឱ្យគ្រប់ភាគីអត់ធ្មត់

វៀតណាមបានសម្តែងការព្រួយបារម្ភអំពីស្ថានភាពនៅវេណេស៊ុយអេឡា ក្រោមសហរដ្ឋអាមេរិកវាយប្រហាររដ្ឋធានី និងចាប់ខ្លួនមេដឹកនាំ លោក នីកូឡាស ម៉ាឌូរ៉ូ (Nicolas Maduro) របស់ប្រទេសអាមេរិកឡាទីនមួយ​នេះ​  ហើយបានអំពាវនាវឱ្យគ្រប់ភាគីទាំងអស់អត់ធ្មត់ និងដោះស្រាយជម្លោះ និងការខ្វែងគំនិតគ្នាដោយផ្អែកលើច្បាប់អន្តរជាតិ។ នេះបើតាមការចុះផ្សាយសារព័ត៌មាន​ Vietnamnet។

ថ្លែងទៅកាន់អ្នកសារព័ត៌មាន​អំពីជំហររបស់វៀតណាមជុំវិញហេតុការណ៍នៅវ៉េណេស៊ុយអេឡា អ្នកនាំពាក្យក្រសួងការបរទេសវៀតណាម លោកស្រី Pham Thu Hang បាន​ថ្លែងយ៉ាងដូច្នេះថា៖ «វៀតណាមមានការព្រួយបារម្ភយ៉ាងខ្លាំងចំពោះការវិវត្តចុងក្រោយបំផុតនៅ​វេណេស៊ុយអេឡា»។​

វៀតណាមបានជំរុញឱ្យគ្រប់ភាគីពាក់ព័ន្ធទាំងអស់គោរពច្បាប់អន្តរជាតិ និងធម្មនុញ្ញអង្គការសហប្រជាជាតិ ​ជាពិសេសគោលការណ៍នៃអធិបតេយ្យភាពជាតិ ការមិនប្រើប្រាស់កម្លាំង និងការជៀសវាងការគំរាមកំហែងដោយកម្លាំងក្នុងទំនាក់ទំនងអន្តរជាតិ។

អ្នកនាំពាក្យរូប​ដដែលបានអំពាវនាវដល់គ្រប់ភាគីទាំងអស់ឱ្យអត់ធ្មត់ ចូលរួមសន្ទនា និងដោះស្រាយជម្លោះ និងភាពខុសគ្នាដោយផ្អែកលើច្បាប់អន្តរជាតិ។ លោកស្រីបានសង្កត់ធ្ងន់លើសារៈសំខាន់នៃកិច្ចខិតខំប្រឹងប្រែងដែលរួមចំណែកដល់សន្តិភាព សន្តិសុខ ស្ថិរភាព និងកិច្ចសហប្រតិបត្តិការនៅក្នុងតំបន់ និងទូទាំងពិភពលោក។

គួររំឭកថា ​កាលពីថ្ងៃសៅរ៍ ប្រធានាធិបតីអាមេរិក លោក​ ដូណាល់ ត្រាំ បានប្រកាសថា កងកម្លាំងអាមេរិកបានចាប់ខ្លួនឃុំខ្លួនប្រធានាធិបតីវេណេស៊ុយអេឡា លោក នីកូឡាស ម៉ាឌូរ៉ូ និងភរិយារបស់លោក ប៉ុន្មានម៉ោងក្រោយវាយប្រហារ​រដ្ឋធានីការ៉ាកាស និងខេត្តមួយចំនួនរបស់​វ៉េណេស៊ុយអេឡា។ មុនពេលប្រកាសចាប់ខ្លួនលោក ម៉ាឌូរ៉ូ បានប្រកាសដាក់ប្រទេសក្នុងគ្រាអាសន្នទូទាំងប្រទេស។

​ក្នុងសន្និសីទសារព័ត៌មានមួយ ប្រធានាធិបតី ត្រាំ បានថ្លែងថា៖ «យើងនឹងគ្រប់គ្រងប្រទេសវ៉េណេស៊ុយអេឡារហូតដល់ការផ្ទេរអំណាច​ប្រកបដោយ​សុវត្ថិភាព សមស្រប និងប្រុងប្រយ័ត្ន អាចកើតឡើង។ ទីក្រុងវ៉ាស៊ីនតោននឹងកំណត់ថាពេលណាត្រូវប្រគល់ការគ្រប់គ្រងទៅឱ្យប្រទេសវេណេស៊ុយអេឡាវិញ»៕